ܩܛܪܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܝܘܡ ܚܕܒܫܒܐ 16 ܐܕܪ 2025، ܡܢ ܟܪܘܟܝܗ ܒܐܘܚܕܢܐ ܕܐܝܠܝܢܘܝ ܐܡܪܝܟܝܐ، ܬܦܩܬܐ ܪܘܝܚܬܐ ܥܡ ܡܓܘܒܝ̈ܐ ܡܢ ܐܡܢ̈ܐ ܘܡܘܪ̈ܕܢܐ ܕܥܡܢ ܒܡܕܝܢ̄ܬܐ ܕܫܝܟܓܼܘ، ܒܒܢܝܢܐ ܕܡܘܬܒܐ ܐܘܡܬܢܝܐ ܐܬܘܪܝܐ ܓܘ ܐܝܠܝܢܘܝ، ܒܢܝܫܐ ܕܕܘܪܫܐ ܕܩܐܡ ܡܪܕܘܬܢܝܐ ܘܐܡܢܝܐ ܕܥܡܢ ܒܐܬܪܐ ܘܓܠܘܬܐ ܘܛܘܪܢܬܗ.
ܘܡܘܩܪܒܠܗ (ܐܘܓܼܢܐ) ܒܡܬܚܐ ܕܬܦܩܬܐ، ܗܝ ܕܦܝܫܠܗܿ ܡܬܘܓܒܪܬܐ ܒܝܕ ܚܦܝܛܐ ܐܘܡܬܢܝܐ (ܗܘܪܡܙ ܛܝܪܘ)، ܩܘܒܠܛܝܒܘܬܗ ܠܡܛܝܒ̈ܐ ܘܠܡܕܒܪܢܘܬܐ ܘܗܕܡ̈ܐ ܕܓܘܫܡܐ ܡܕܒܪܢܝܐ ܕܡܘܬܒܐ ܐܘܡܬܢܝܐ ܐܬܘܪܝܐ ܓܘ ܐܝܠܝܢܘܝ ܠܝܗ̄ܒܠܬܗܿ ܗܕ ܦܘܪܣܐ ܓܘ ܡܫܪܝܐ ܕܡܘܬܒܐ، ܘܦܝܫܠܗ ܕܪܝܫܐ ܓܘ ܬܦܩܬܐ ܩܐܡ ܡܪܕܘܬܢܝܐ ܕܥܡܢ، ܥܡ ܕܘܪܫܐ ܕܩܐܡ ܐܡܢܝܐ ܘܐܝܟܢܝܘܬܐ ܕܛܘܪܢܬܗ ܒܢܝܫܐ ܕܐܡܝܢܝܘܬܗ ܒܐܬܪܐ ܘܓܠܘܬܐ، ܘܦܘܠܚܢܐ ܠܫܢܝܬܗ ܠܝܘܒܠ̈ܐ ܐܬܝܢ̈ܐ ܠܢܛܪܬܗ ܡܢ ܬܠܩܬܐ ܒܐܬܪ̈ܘܬܐ ܕܓܠܘܬܐ ܪ̈ܚܝܩܐ ܡܢ ܐܬܪܐ.
ܘܟܐܬܝܐ ܗܕ ܬܦܩܬܐ ܡܢ ܟܪܘܟܝܐ ܕܒܩܝܡܐܝܠܗ ܓܘܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܓܘ ܐܘܚܕܢ̈ܐ ܡܚܝܕ̈ܐ ܐܡܪ̈ܝܟܝܐ، ܗܘ ܕܚܒܫܠܗ ܫܘܬܦܬܗ ܒܠܘܡܕܐ ܕRootsTech 2025 ܒܐܘܚܕܢܐ ܕܝܘܬܐ، ܟܕ ܫܘܬܦܠܗ ܓܘ ܥܒܘܕܘ̈ܬܗ ܐܝܟ ܐܪܚܐ ܕܐܝܩܪܐ. ܘܡܘܩܪܒܠܗ ܐܡܘܪܘܬܐ ܐܢܢܩܝܬܐ ܓܘ ܒܝܬ ܨܘܒܐ ܕܗܐܪܦܪܕ ܥܠ ܢܛܪܬܐ ܕܝܪܬܘܬܐ ܡܪܕܘܬܢܝܬܐ ܕܥܡܢ ܘܚܝܠܢܬܗ ܒܥܝܪܩ ܕܪܝܐ.
