ܣܥܪܠܗܿ ܡܫܕܪܘܬܐ ܡܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ، ܚܒܫܠܗܿ ܟܠ ܡܢ ܡܕܒܪܢܐ ܓܘܢܝܐ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ܘܡܕܒܪܢܐ ܕܒܝܬ ܥܬܝܩ݁̈ܬܐ ܕܝܪܬܘܬܐ ܣܘܪܝܝܬܐ ܡܝܩܪܐ ” ܒܪܢܐܪܕ ܝܘܣܦ”، ܝܘܡ ܫܒܬܐ 9 ܟܢܘܢ ܩܕܡܝܐ 2023، ܣܥܪܠܗܿ ܠܒܝܬ ܥܬܝܩ̈ܬܐ ܕ(ܢܐܒܘ) ܓܘ ܦܢܝܬܐ ܕܒܬܪܘܢ ܒܓܪܒܝܐ ܕܠܒܢܢ، ܘܝܗ̄ܘܐ ܒܣܩܒܠܬܝܗܝ ܡܫܬܐܣܢܐ ܕܒܝܬ ܥܬܝܩ̈ܬܐ ܓܒܪܐ ܕܦܘܠܚܢ̈ܐ ܠܒܢܢܝܐ “ܓ̰ܘܐܕ ܥܕܪܐ”.
ܘܟܪܟܼܠܗ “ܥܕܪܐ” ܥܡ ܡܫܕܪܘܬܐ ܒܡܢܘ̈ܬܐ ܕܒܝܬ ܥܬܝܩ̈ܬܐ ܘܒܝܬ ܐܪ̈ܟܐ ܕܐܝܬ ܓܘܗ ܘܥܡ ܩܢܛܪܘܢ ܕܚܘܕܬܐ ܘܬܪܨܬܐ ܕܨܘܪ̈ܬܐ ܘܟܬܒ̈ܐ ܥܬܝܩ̈ܐ، ܘܚܝܪܗܿ ܡܫܕܪܘܬܐ ܒܡܬܚܐ ܕܣܥܘܪܘܬܐ ܥܠ ܬܫܥܝܬܐ ܘܥܠܠ̈ܬܐ ܕܒܢܝܢܐ ܕܒܝܬ ܥܬܝܩ̈ܬܐ ܘܩܢܝ̈ܬܐ ܕܐܝܬ ܓܘܗ، ܥܡ ܚܙܝܬܐ ܕܟܫܝܪ̈ܘܬܗ ܡܫܚܠܦ̈ܐ ܡܢ ܣܝܡܝܢܪ̈ܐ ܘܐܡܘܪ̈ܘܬܐ ܐܢܝ ܕܦܝܫܝ ܥܒܝܕܐ ܘܕܪ̈ܫܝܬܐ ܒܝܕ ܝܠܘܦ̈ܐ ܕܒܬܝ̈ ܨܘܒ̈ܐ.
ܘܕܪܫܠܗܘܢ ܓܘ ܬܦܩܬܐ ܣܘܘܕܐ ܚܕܪ ܡܪܕܘܬܐ ܘܝܪܬܘܬܐ ܕܥܡܢ ܓܘ ܡܕܢܚܐ ܘܫܒܝܠ̈ܐ ܕܥܒܕܬܐ ܕܟܫܝܪ̈ܘܬܐ ܘܬܪ̈ܡܝܬܐ ܡܪ̈ܕܘܬܢܝܐ ܡܫܘܬܦ̈ܐ .
ܘܦܝܫ ܕܟܝܪܐ، ܕܒܢܝܢܐ ܕܒܝܬ ܥܬܝܩ̈ܬܐ ܡܢ ܣܘܟܡܐ ܕܓܠܘܦܐ ܥܝܪܩܝܐ “ܨܝܐܐ ܐܠܥܙܐܘܝ”، ܘܐܡܢܐ ܥܝܪܩܝܐ ܟܢܕܝܐ “ܡܚܡܘܕ ܐܠܥܒܝܕܝ” ، ܘܦܝܫܠܗ ܡܓܘܒܝܐ ܫܡܐ ܕ(ܢܐܒܘ) ܒܝܬܝܘܬܐ ܠܐܠܗܬܐ ܕܚܟܡܬܐ ܓܢ̄ܒ ܥܝܪ̈ܩܝܐ ܥܬܝܩ̈ܐ ܘܗܘ ܕܐܝܬܗ̄ܘܐ ܐܦ ܗܕܟ ܓܢ̄ܒ ܥܡܡ̈ܐ ܥܬܝܩ̈ܐ ܓܘ ܠܒܢܢ ܘܦܪܝܫܐܝܬ ܦܘܢܝܩܝ̈ܐ.
