ܩܝܡܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܘܒܥܘܕܪܢ ܥܡ ܒܝܬ ܣܡܟܐ ܕܥܠܝܡ̈ܐ ܕܥܢܟܒܐ ܟܢܘܫܝܝܐ، ܒܝܘܡ ܫܒܬܐ 3 ܫܒܛ 2024 ، ܒܚܕ ܙܘܝܚܐ ܒܘܝܐܝܐ ܕܡܛܐܠܢܐ ܕܓܡܝܪܘܬ ܓܘܫܡ̈ܐ ” ܐܝܦܠ ܐܦܪܝܡ ܡܬܝ” ܓܘ ܐܘܢܐ ܕܒܝܬ ܣܡܟܐ ܕܥܠܝܡ̈ܐ ܒܪܘܣܬܩܐ ܕܥܢܟܒܐ ܓܘ ܐܪܒܝܠ.
ܘܚܒܫܠܗ ܙܘܝܚܐ ܒܘܝܐܝܐ ܡܠܗܝܬܐ ܕ(46) ܦܘܢܕ̈ܐ ܒܝܕ ܡܛܝܒ̈ܐ ܐܢܝ ܕܡܛܦܣܝ ܡܢܝܢܐ ܕܫܢ̈ܐ ܕܡܢܚܐ ، ܥܡ ܡܩܪܒܬܐ ܕܡܡܠ̈ܐ ܒܘܝܐܝ̈ܐ ܘܣܗܘܕܘ̈ܬܐ ܚܝ̈ܐ ܒܙܕܩܐ ܕܡܢܚܐ، ܘܚܒܫܠܗ ܙܘܝܚܐ ܡܩܪܒܬܐ ܕܡܢܝܢܐ ܡܢ ܣܘܓܼܝ̈ܬܐ ܬܘܕܝܬܢܝ̈ܐ ܘܡܩܛܥ̈ܐ ܡܘܣܝܩܝ̈ܐ ܚܫܢ̈ܐ.
ܘܦܝܫܠܗ ܓܠܝܚܐ ܓܘ ܙܘܝܚܐ ܙܘܠܐ (ܦܝܠܡܐ) ܐܫܛܪܝܐ ܟܪܝܐ ܚܕܪ ܡܐܙܠܬܐ ܕܡܢܚܐ ܘܫܘܡܠܝ̈ܐ ܐܢܝ ܕܟܡ ܫܪܪܠܗܘܢ ܡܢ ܡܬܚܐ ܕܕܪܫܬܐ ܫܪܘܝܬܐ ܓܘ ܥܢܟܒܐ ܗܠ ܡܘܬܗ ܓܘ ܐܘܚܕܢܐ ܕܦܠܘܪܝܕܐ ܐܡܪܝܟܝܐ ܒܚܘܬܡܐ ܕܫܢ̄ܬܐ ܥܒܝܪܬܐ.
ܘܡܢ ܓܢ̄ܒܗܿ ܡܘܩܪܒܐܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܘܝܐܐ ܠܡܛܐܠܢܐ ܕܓܡܝܪܘܬ ܓܘܫܡ̈ܐ “ܐܝܦܠ ܐܦܪܝܡ ܡܬܝ” ، ܗܘ ܕܡܝܬܠܗ ܒܝܘܡ ܫܒܬܐ 23 ܟܢܘܢ ܩܕܡܝܐ 2023، ܒܓܕܫܐ ܕܚܘܢܩܐ ܓܘ ܐܘܚܕܢܐ ܕܦܠܘܪܝܕܐ ܐܡܪܝܟܝܐ.
ܘܦܝܫ ܗ̄ܘܐܠܗ ܬܠܝܩܐ “ܡܬܝ” ܒܝܘܡ ܫܒܬܐ 23 ܟܢܘܢ ܩܕܡܝܐ، ܒܬܪ ܕܦܝܫܠܗ ܛܡܝܪܐ ܒܡܝ̈ܐ ܒܥܕܢ ܡܛܐܠܬܗ ܠܨܒܝܢܘܬܐ ܕܪܟܡܓ̰ܐ ܓܘ ܐܘܚܕܢܐ ܕܦܠܘܪܝܕܐ ܐܡܪܝܟܝܐ، ܘܦܝܫܠܗ ܚܙܝܐ ܫܠܕܗ، ܒܝܘܡ ܬܠܬܒܫܒܐ 26 ܟܢܘܢ ܩܕܡܝܐ ܒܩܘܪܝܐ ܡܢ ܡܪܙܐ ܕܐܘܚܕܢܐ.
ܘܦܝܫ ܕܟܝܪܐ ، ܕ”ܐܝܦܠ ܐܦܪܝܡ ܡܬܝ” ܦܝܫ ܡܚܘܫܒܢܐ ܡܢ ܟܙܝܪ̈ܐ (ܓܢ̄ܒܪ̈ܐ) ܕܝܐܝܘܬܐ ܓܘܫܡܢܝܬܐ ܘܒܢܝܢܐ ܕܓܘܫܡ̈ܐ، ܘܝܠܗ ܡܢ ܬܘܠܕ̈ܬܐ ܕܥܢܟܒܐ ܘܪܫܐ ܕܓܘܫܡܐ ܡܕܒܪܢܝܐ ܩܕܡܝܐ ܓܘ ܒܝܬ ܣܡܟܐ ܕܥܠܝܡ̈ܐ ܕܥܢܟܒܐ ܟܢܘܫܝܝܐ، ܘܫܘܪܪܠܗ ܒܡܬܚܐ ܕܡܐܙܠܬܗ ܐܬܠܝܛܝܬܐ ܡܢܝܢܐ ܡܢ ܕܫܢ̈ܐ ܬܒܠܝ̈ܐ ܓܘ ܐܬܠܝܛܘܬܐ ܕܒܢܝܢܐ ܕܓܘܫܡ̈ܐ، ܟܕ ܫܩܠܗ ܝܘܩܢܐ ܒܪܘܢܙܝܐ ܒܟܙܝܪܘܬܐ ܕܬܝܡܢܐ ܕܐܘܚܕܢ̈ܐ ܡܚܝܕ̈ܐ ܐܡܪ̈ܝܟܝܐ ܫܢ̄ܬܐ ܕ 2011، ܥܡ ܫܩܠܬܗ ܕܪܓܐ ܪܒܝܥܝܐ ܓܘ ܟܙܝܪܘܬܐ ܕܐܘܪܘܦܐ ܬܒܠܝܬܐ ܕܡܫܪ̈ܝܢܐ ܘܐܘܡܢܝ̈ܐ ܓܘ ܡܕܝܢ̄ܬܐ ܕܐܘܪܠܢܕܘ ܐܡܪܝܟܝܬܐ.
