ܩܝܡܠܗܿ ܡܕܒܪܢܘܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܓܘ ܕܗܘܟ ܢܩܝܦܬܐ ܠܡܕܒܪܢܘܬܐܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ، ܝܘܡ ܬܪܝܢܒܫܒܐ 9 ܚܙܝܪܢ 2025، ܒܥܕܥܐܕܐ ܠܫܒܼܪ̈ܐ ܕܡܠܦܢܘܬܐ ܡܫܝܚܝܬܐ ܘܫܒܼܪ̈ܐ ܕܦܢܝܬܐ ܕܐܠܩܘܫ ܒܦܘܪܣܐ ܕܝܘܡܐ ܕܫܒܼܪܐ ܬܒܝܠܝܐ، ܒܥܘܕܪܢ ܥܡ ܥܕܬܐ ܕܐܠܩܘܫ ܟܠܕܝܬܐ ܘܪܫܢܘܬܐ ܕܕܝܪܐ ܕܡܪܬܐ ܒܬܘܠܬܐ ܢܛܪܬܐ ܕܙܪ̈ܥܐ، ܗܝ ܕܩܒܠܗܿ ܒܐܪܚܘܬܐ ܠܙܘܝܚܐ ܒܕܪܬܗܿ ܓܘܝܬܐ ܒܩܢܛܪܘܢ ܕܦܢܝܬܐ ܕܐܠܩܘܫ ܒܕܫܬܐ ܕܢܝܢܘܐ.
ܘܫܘܪܐܠܗܘܢ ܥܒܘܕܘ̈ܬܐ ܕܥܕܥܐܕܐ ܒܡܡܠܐ ܕܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܗܘ ܕܫܘܪܪܠܗ ܓܘܗ ܥܠ (ܐܢܢܩܝܘܬܐ ܕܝܨܝܦܘܬܐ ܒܗܢ ܣܗܡܐ ܗܘ ܕܝܨܦܐ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܓܘܗ، ܘܘܠܐ ܕܝܨܦܝ ܓܘܗ ܦܝܫܢ̈ܐ ܕܫܘܬܐܣ̈ܐ ܪ̈ܘܫܡܝܐ ܘܟܢܘܫܝܝ̈ܐ)، ܘܪܡܙܠܗ (ܥܕܥܐܕܝ̈ܢ ܘܟܫܝܪ̈ܘܬܝܢ ܐܝܬ ܓܘܝܗܝ ܚܕ ܣܗܡܐ ܛܒܐ ܘܦܪܝܫܐ ܠܫܒܼܪ̈ܐ ܠܛܘܪܢܬܐ ܕܡܘܗܒܝ̈ܬܝܗܝ ܘܡܨܝܬܝ̈ܗܝ ܪ̈ܢܝܝܐ).
ܘܒܬܪ ܗܕܟ ܡܘܩܪܒܠܗ ܟܘܪ ܐܦܣܩܘܦܐ ܕܥܕܬܐ ܕܐܠܩܘܫ ܐܒܐ (ܪܘܕܝ ܐܠܨܦܐܪ)، ܡܡܠܐ ܫܘܪܪܠܗ ܓܘܗ ܥܠ ܐܢܢܩܝܘܬܐ ܕܝܨܝܦܘܬܐ ܒܫܒܼܪ̈ܐ ܒܥܠܬܐ ܝܠܝܗܝ ܝܘܒܠܐ ܡܫܪܝܢܐ ܗܘ ܕܦܝܫ ܣܢܝܕܐ ܥܠܗ ܒܕܥܬܝܕ، ܘܪܡܙܠܗ ܥܠ ܐܢܢܩܝܘܬܐ ܕܛܘܪܢܬܐ ܕܡܗܝܪ̈ܘܬܝܗܝ ܪ̈ܢܝܝܐ ܘܓܘܫܡܝ̈ܐ ܒܟܫܝܪ̈ܘܬܐ ܘܥܒܘܕܘ̈ܬܐ ܟܢܘܫܝܝ̈ܐ ܡܫܘܬܦ̈ܐ.
ܘܚܒܫܠܗ ܥܕܥܐܕܐ ܓܠܚ̈ܐ ܘܢܘܩܙ̈ܐ ܡܫܚܠܦ̈ܐ ܡܢ ܛܐܠܝ̈ܬܐ ܘܡܘܪ̈ܝܐ، ܐܢܝ ܕܫܘܬܦܠܗܘܢ ܓܘܝܗܝ ܫܒܪ̈ܐ ܒܠܗܝܩܘܬܐ ܘܡܗܝܪܘܬܐ، ܥܡ ܚܙܘܐ ܡܡܬܠܢܐ ܒܫܡܐ ܕ(ܐܡܝܢܘܬܐ ܟܢܘܫܝܝܬܐ)، ܗܘ ܕܝܨܦܠܗ ܥܠ ܒܠܝܓܘܬܐ ܕܒܪܢܫܐ ܒܥܕܢܐ ܩܐܡܝܐ ܒܫܒܝܠ̈ܐ ܕܐܡܝܢܘܬܐ ܟܢܘܫܝܝܬܐ، ܘܚܙܘܐ ܡܡܬܠܢܐ ܐ̄ܚܪܢܐ ܓܘܫܡܢܗ ܬܕܡܘܪܬܐ ܩܕܡܝܬܐ ܕܡܪܢ ܝܫܘܥ ܡܫܝܚܐ ܓܘ ܚܠܘܠܐ ܕܩܐܢܐ ܕܓܠܝܠܐ.
ܘܦܝܫܠܗܘܢ ܡܛܝܒ̈ܐ ܠܙܘܝܚܐ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܘܪܫ ܕܝܪܐ ܕܡܪܬܐ ܒܬܘܠܬܐ ܢܛܪܬܐ ܕܙܪ̈ܥܐ ܐܒܐ ( ܓ̰ܘܢ ܢܝܩܘܠܐ ܕܝܪܝܐ)، ܘܐܒܐ (ܣܠܝܡܐܢ ܚܢܐ) ܡܢ ܡܪܥܝܬܐ ܕܐܠܩܘܫ ܟܠܕܝܬܐ، ܥܡ ܡܢܝܢܐ ܡܢ ܫܕܬܢ̈ܐ ܕܡܕܒܪܢܘܬܐܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܢ ܐܪܒܝܠ ܘܕܗܘܟ ܘܟܢܫܐ ܕܐ̄ܢܫ̈ܐ ܘܫܒܪ̈ܐ.
