ܣܥܪܠܗ ܛܘܒܬܢܘܬܗ ܕܒܒܢ ܦܛܪܝܪܟܐ ܟܪܕܝܢܠܐ ܡܪܝ ” ܠܘܝܣ ܪܘܦܐܝܠ ܣܐܟܘ” ܦܛܪܝܪܟܐ ܕܟܠܕܝ̈ܐ ܓܘ ܥܝܪܩ ܘܬܒܝܠ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܒܨܦܪܐ ܕܚܡܫܒܫܒܐ 14 ܐܝܠܘܠ 2023، ܘܝܗ̄ܘܐ ܒܣܩܒܠܬܗ ܡܕܒܪܢܗܿ ܓܘܢܝܐ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ، ܘܡܝܩܪܐ ” ܒܪܢܐܪܕ ܝܘܣܦ” ܡܕܒܪܢܐ ܕܝܪܬܘܬܐ ܘܒܝܬ ܥܬܝܩ̈ܬܐ ܣܘܪܝܝܐ ، ܘܡܝܩܪܐ “ܦܘܐܕ ܫܡܥܘܢ” ܡܕܒܪܢܐ ܕܡܕܒܪܢܘܬܐ ܓܘ ܡܕܒܪܢܘܬܐ ܓܘܢܝܬܐ ܘܡܕܒܪ̈ܢܐ ܕܡܢܘ̈ܬܐ ܢܩܘܦ̈ܐ ܐܠܗܿ ܘܟܕܝܪ̈ܗܿ ܣܘܥܪܢܝܐ.
ܘܒܡܬܚܐ ܕܣܥܘܪܘܬܐ ܡܘܩܪܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܠܛܘܒܬܢܘܬܗ ܚܕ ܢܘܗܪܐ ܓܡܝܪܐ ܚܕܪ ܡܕܒܪܢܘܬܐ ܓܘܢܝܬܐ ܘܡܟܬܒ̈ܗܿ ܦܪ̈ܥܝܐ ܘܟܫܝܪ̈ܘܬܗܿ ܦܪ̈ܝܫܐ ܘܡܐ ܥܒܕܠܗܿ ܡܢ ܫܘܚܠܦܐ ܐܕܫܢܝܐ ܓܘ ܡܬܚܐ ܟܪܝܐ ܥܒܝܪܐ، ܘܛܟܣܬܗܿ ܠܥܕܥܐܕ̈ܐ ܘܠܘܡܕ̈ܐ ܘܥܒܘܕܘ̈ܬܐ ܡܫܚܠܦ̈ܐ.
ܘܡܘܥܒܪܗ ܛܘܒܬܢܘܬܗ ܥܠ ܦܨܚܘܬܗ ܒܗܕ ܣܥܘܪܘܬܐ ܘܡܘܒܝܢܗ ܐܝܩܪܗ ܘܫܘܒܗܪܗ ܪ̈ܒܐ ܒܟܠ ܡܐ ܕܡܩܪܒܐܠܗ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܢ ܟܫܝܪ̈ܘܬܐ ܘܥܒܘܕܘ̈ܬܐ ܡܪ̈ܕܘܬܢܝܐ ܘܝܪ̈ܬܘܬܢܝܐ ܦܪ̈ܝܫܐ ܘܥܡ ܛܒܝ̈ܥܬܗܿ ܡܫܚܠܦ̈ܐ ܘܦܪܝܫܐܝܬ ܡܓܠܬܗܿ ((ܒܢܐܦܠ)).
ܘܩܘܠܣܠܗ ܛܘܒܬܢܘܬܗ ܒܥܡܠ̈ܐ ܕܦܠܚ̈ܐ ܒܟܠܗܿ ܡܕܒܪܢܘܬܐ، ܘܦܪܝܫܐܝܬ ܡܕܒܪܢܗܿ ܓܘܢܝܐ، ܘܪܡܙܠܗ ܠܒܢܝܢܐ ܕܡܕܒܪܢܘܬܐ ܓܘܢܝܬܐ ܫܒܘܩ ܡܢ ܙܥܘܪܘܬܗ ܘܡܟܝܟܘܬܗ ܐܠܐ ܟܚܒܫ ܟܕܝܪ̈ܐ ܛܒ̈ܐ ܘܥܒܘܕ̈ܐ ܥܒܪܗܘܢ ܒܡܒܥܢܘܬܝܗܝ ܠܙܥܘܪܘܬܐ ܕܕܘܟܐ، ܒܣܒܪܐ ܕܗܘܐܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܚܕ ܒܢܝܢܐ ܕܚܫܚ ܥܡ ܒܥܝ̈ܬܐ ܕܦܘܠܚܢܗܿ ܘܡܫܘܬܦ ܓܘ ܡܛܘܪܢܬܐ ܘܡܪܘܚܬܐ ܕܫܘܝܐ ܕܟܫܝܪ̈ܘܬܗܿ.
ܘܐܦ ܗܕܟ ܣܥܪܠܗ ܛܘܒܬܢܘܬܗ ܡܕܒܪܢܘܬܐ ܕܝܪܬܘܬܐ ܘܒܝܬ ܥܬܝܩ̈ܬܐ ܣܘܪܝܝܐ ܘܬܦܩܠܗ ܒܚܕܐ ܝܬܒܬܐ ܕܘܪܫܝܬܐ ܥܡ ܡܢܝܢܐ ܡܢ ܣܦܪ̈ܐ ܘܡܘܪ̈ܕܢܐ ܕܥܡܢ ܘܟܕܝܪ̈ܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܡܕܒܪܢܘܬܐ ܕܝܪܬܘܬܐ ܘܒܝܬ ܥܬܝܩ̈ܬܐ ܣܘܪܝܝܐ ܘܒܝܬ ܐܪ̈ܟܐ ܕܡܪܕܘܬܐ ܣܘܪܝܝܬܐ ܘܗܕܡ̈ܐ ܕܝܗܠܐ ܣܘܪܝܝܐ ܕܐܡܢ̈ܐ، ܡܘܩܪܒܠܗܘܢ ܒܬܦܩܬܐ ܡܢܝܢܐ ܡܢ ܡܘܪ̈ܕܢܐ ܕܥܡܢ ܪ̈ܥܝܢܐ ܐܢܝ ܕܡܫܪܪܝ ܥܠ ܣܢܕܬܐ ܕܥܕܬܐ ܟܠܕܝܬܐ ܕܪܩܘܒܠ ܨܦܚܬܐ ܕܒܚܙܝܐܠܗܿ ܘܠܐ ܩܒܠܬܝܗܝ ܒܒܝܫܘܬܐ ܠܥܕܬܐ ܘܠܦܪܨܘܦܐ ܕܦܛܪܝܪܟܐ.
ܘܬܢܐܠܗ ܛܘܒܬܢܘܬܐ ܥܠ ܐܢܢܩܝܘܬܐ ܕܡܪܕܘܬܐ ܒܚܝܘܬܐ ܕܥܡܡ̈ܐ ܘܠܐܢܢܩܝܘܬܐ ܕܚܕܬܬܐ ܘܠܘܝܘܬܐ ܕܒܥܝ̈ܬܐ ܘܛܘܘܪ̈ܐ ܕܕܪܐ ܩܠܘܠ̈ܐ، ܪܚܩܐ ܡܢ ܛܘܗܡܝܘܬܐ.
ܘܡܘܩܪܒܠܗ ܡܕܒܪܢܐ ܕܝܪܬܘܬܐ ܘܒܝܬ ܥܬܝܩ̈ܬܐ ܣܘܪܝܝܐ ܚܕ ܢܘܗܪܐ ܓܡܝܪܐ ܚܕܪ ܡܕܒܪܢܘܬܗ ܘܬܫܥܝܬܐ ܕܒܪܝܬܗܿ ܘܟܫܝܪ̈ܘܬܗܿ ܘܥܡ ܬܪ̈ܡܝܬܐ ܕܡܛܘܪܢܘܬܐ ܐܢܝ ܕܒܩܝܡܐܝܠܗܿ ܓܘܝܗܝ.
ܘܝܗ̄ܘܐ ܥܡ ܛܘܒܬܢܘܬܗ ܓܘ ܣܥܘܪܘܬܐ ܐܒܐ ” ܐܦܪܝܡ ܓܠܝܢܐ” ܡܕܒܪܢܐ ܕܒܝܬ ܕܪܫܐ ܟܗܢܘܬܝܐ ܦܛܪܝܪܟܝܐ.
