ܡܛܘܟܣܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܥܘܕܪܢ ܥܡ ܡܕܒܪܢܘܬܐ ܓܘܢܝܬܐ ܕܡܠܦܢܘܬܐ ܣܘܪܝܝܬܐ ܘܡܕܒܪܢܘܬܐ ܕܬܪܒܝܬܐ ܕܚܕܪ̈ܘܢܐ ܕܐܪܒܝܠ، ܒܝܘܡ ܐܪܒܥܒܫܒܐ 21 ܫܒܛ 2024، ܥܒܘܕܘ̈ܬܐ ܕܝܘܡܐ ܕܝܠܢܝܐ ܕܙܘܝܚܐ ܒܝܘܡܐ ܬܒܠܝܐ ܕܠܫܢܐ ܝܡܝܐ، ܓܘ ܐܘܢܐ ܕܒܝܬ ܥܬܩ̈ܐ ܣܘܪܝܝܐ ܓܘ ܪܘܣܬܩܐ ܕܥܢܟܒܐ ܒܗܘܦܪܟܝܐ ܕܐܪܒܝܠ.
ܦܘܪܣܐ ܗܘ ܕܦܝܫܠܗ ܥܒܝܕܐ ܕܙܘܝܚܐ ܒܠܫܢܢ ܣܘܪܝܝܐ ܡܫܘܬܦܠܗܘܢ ܓܘܗ ܡܕܪ̈ܫܝܬܐ ܣܘܪ̈ܝܝܐ ܓܘ ܪܘܣܬܩܐ ܕܥܢܟܒܐ، ܫܘܪܐܠܗ ܒܡܡܠܐ ܕܩܒܠܬܐ ܒܫܝܢܐ ܒܝܕ ܡܕܒܪܢܐ ܕܒܝܬ ܥܬܩ̈ܐ ܕܝܪܬܘܬܐ ܣܘܪܝܝܬܐ ܡܝܩܪܐ “ܒܪܢܐܪܕ ܝܘܣܦ” ܪܡܙܠܗ ܓܘܗ ܠܓܪܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܡܚܝܝܬܐ ܕܗܢ ܦܘܪܣܐ ܫܢ̄ܬܢܝܐ ܒܥܠܬܐ ܕܫܘܦܐ ܬܫܥܝܬܢܝܐ ܛܝܡܢܐ ܕܠܫܢܐ ܣܘܪܝܝܐ، ܘܥܡ ܩܕܝܫܘܬܗ ܘܒܥܠܬܐ ܕܝܠܗ ܢܒܓܐ ܕܠܫܢܐ ܗܘ ܡܘܚܟܐܠܗ ܓܘܗ ܡܪܢ ܝܫܘܥ ܡܫܝܚܐ ܩܕܡ ܬܪܝ ܐܠܦ̈ܐ ܫܢ̈ܐ .
ܒܬܪ ܗܕܟ ܡܘܩܪܒܠܗ ܘܙܝܪܐ ܕܡܘܒܠܢܘܬܐ ܘܛܘܦܝ̈ܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܡܝܩܪܐ ” ܐܢܘ ܓ̰ܘܗܪ ܥܒܕܘܟܐ”، ܚܕ ܡܡܠܐ ܪܡܙܠܗ ܓܘܗ ܠܡܡܠܐ ܕܡܪܢ ܝܫܘܥ ܡܫܝܚܐ( ܐܢܐܝܗ̄ܘܢ ܐܠܦ ܘܬܘ)، ܘܡܘܒܝܢܗ ܕܟܒܝܢܐ ܫܘܠܛܢܝܐ ܕܬܫܥܐ ܝܗ̄ܒܐ ܝܨܝܦܘܬܐ ܠܢܛܪܬܐ ܕܠܫܢ̈ܐ ܫܪ̈ܫܝܐ ܕܐܝܬ، ܟܕ ܫܘܪܪܠܗ ܕܐܝܬ ܙܘܕܐ ܡܢ (50) ܡܕܪ̈ܫܝܬܐ ܩܝܡܝ ܒܡܕܪܫܢܘܬܐ ܕܡܠܘ̈ܐܝܗܝ ܒܠܫܢ̈ܐ ܣܘܪܝܝܐ ܘܬܘܪܟܡܢܝܐ ܓܘ ܟܠܗ ܩܠܝܡܐ.
ܒܬܪ ܗܕܟ ܡܘܩܪܒܠܗ ܘܟܝܠ ܘܙܝܪܘܬܐ ܕܡܪܕܘܬܐ ܘܥܠܝܡ̈ܐ ܓܘ ܫܘܠܛܢܘܬܐ ܕܩܠܝܡܐ “ܐܪܝܐܢ ܨܠܐܚ” ܚܕ ܡܡܠܐ ܡܘܥܒܪܗ ܓܘܗ ܥܠ ܫܘܒܗܪܗ ܠܐܕܫܢܘܬܐ ܠܫܢܝܬܐ ܕܐܝܬ ܒܩܠܝܡܐ، ܘܐܦ ܪܡܙܠܗ ܠܓܪܐ ܕܘܙܝܪܘܬܐ ܕܡܪܕܘܬܐ ܘܣܢܕܬܗܿ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܦܘܠܚܢܐ ܠܢܛܪܬܐ ܕܗܢ ܠܫܢܐ.
ܘܡܘܩܪܒܠܗܿ ܡܕܪܫܬܐ ܕܐܪܒܥ̄ܐܝܠܘܿ ܣܘܪܝܝܬܐ ܚܕܐ ܙܡܪܬܐ ܒܫܡܐ ܕ(ܠܫܢܝ)، ܒܬܪ ܗܕܟ ܡܘܩܪܒܠܗ ܡܕܒܪܢܐ ܓܘܢܝܐ ܕܡܠܦܢܘܬܐ ܣܘܪܝܝܬܐ ܓܘ ܘܙܝܪܘܬ ܬܪܒܝܬܐ ܕܩܠܝܡܐ “ܢܙܐܪ ܚܢܐ” ܡܡܠܗ، ܗܘ ܕܡܘܒܝܢܗ ܓܘܗ ܠܫܪܫܝܘܬܐ ܘܕܥܡܢ ܒܐܪܥܐ ܕܐܒܗ̈ܬܐ ܘܓܪܐ ܕܬܪܒܝܬܐ ܣܘܪܝܝܬܐ ܒܐܡܝܢܝܘܬܐ ܕܡܠܦܢܘܬܐ ܒܠܫܢܐ ܝܡܝܐ.
ܘܡܘܩܪܒܠܗܘܢ ܝܠܘܦ̈ܐ ܕܡܕܪܫܬܐ ܕܚܡܘܪܒܝ ܙܡܪܬܐ ܒܫܡܐ ܕ( ܫܡܫܐ ܕܚܐܪܘܬܐ)، ܒܬܪ ܗܕܟ ܚܕܐ ܡܫܘܚܬܐ ܒܫܡܐ ܕ( ܠܫܢܐ ܕܝܡܐ) ܒܝܕ ܡܚܘܪܐ ܣܘܪܝܝܐ ܡܝܩܪܐ “ܓܝܘܪܓܝܣ ܢܒܬܝ” ، ܗܝ ܕܬܢܝܬܗܿ ܡܥܒܕܢ̈ܐ ܗ̄ܘܘ ܡܢ ܓܢ̄ܒ ܣܘܟܠ̈ܐ ܚܝܠܢ̈ܐ، ܘܢܝܫܐ ܪܫܝܐ ܡܢ ܡܫܘܚܬܐ ܝܗ̄ܘܐ ܥܪܝܬܐ ܒܠܫܢܐ ܝܡܝܐ ܘܠܐ ܪܚܫܬܐ ܒܬܪ ܠܫܢ̈ܐ ܢܘܟܪ̈ܝܐ.
ܒܬܪ ܗܕܟ ܡܘܩܪܒܠܗܘܢ ܝܠܘܦ̈ܐ ܕܡܕܪܫܬܐ ܕܐܪܒܥ̄ܐܝܠܘܿ ܙܡܪܬܐ ܐ̄ܚܪܝܬܐ ܒܫܡܐ ܕ(ܡܬܐ) ، ܒܬܪ ܗܕܟ ܦܝܫ ܚܬܝܡܐ ܙܘܝܚܐ ܕܥܒܘܕ̈ܘܬܐ ܒܚܕ ܠܘܚܐ ܦܠܟܠܘܪܝܐ ܕܠܒܘܫ̈ܐ ܝܪ̈ܬܘܬܢܝܐ ܕܥܡܢ ܒܝܕ ܝܠܘܦ̈ܐ ܕܬܪܝܢܝܬܐ ܕܐܘܪ ܣܘܪܝܝܬܐ.
ܘܡܫܘܬܦܠܗܘܢ ܒܙܘܝܚܐ ܡܝܩܪܐ ” ܪܐܡܝ ܢܘܪܝ ” ܩܝܡܩܡܐ ܕܪܘܣܬܩܐ ܕܥܢܟܒܐ، ܘܡܝܩܪܬܐ ܕ.” ܡܘܢܐ ܝܥܩܘܒ” ܪܫܐ ܕܓܘܫܡܐ ܩܝܡܐ ܒܝܬܗ ܕܙܕܩ̈ܐ ܕܒܪܢܫܐ، ܘܡܝܩܪܬܐ “ܦܠܘܪܝܢ ܓܝܘܪܓܝܣ” ܪܫܐ ܕܡܟܬܒܐ ܕܨܒܘ̈ܬܐ ܕܡܟܝܢ̈ܬܐ ܐܘܡܬܢܝ̈ܐ ܘܬܘܕܝܬܢܝ̈ܐ ܒܪܫܢܘܬܐ ܕܩܠܝܡܐ ܕܟܘܪܕܣܬܢ، ܥܡ ܡܢܝܢܐ ܪܒܐ ܡܢ ܡܕܒܪ̈ܢܐ ܕܚܘܕܪ̈ܐ ܕܪܘܣܬܩܐ ܕܥܢܟܒܐ ܘܓܘܫܡ̈ܐ ܡܠܦܢܘܬܢܝ̈ܐ ܘܡܕܪ̈ܫܢܘܬܢܝܐ ܘܝܠܘܦܝ̈ܗܝ ܘܡܢܢܝܐ ܡܢ ܡܘܪ̈ܕܢܐ ܘܝܨܘܦ̈ܐ ܒܡܪܕܘܬܐ ܣܘܪܝܝܬܐ ܘܠܫܢܗܿ ܫܪܫܝܐ.
ܘܦܝܫ ܕܟܝܪܐ، ܕܝܘܡܐ ܬܒܠܝܐ ܕܠܫܢܐ ܝܡܝܐ (International Mother Language Day) ܝܠܗ ܙܘܝܚܐ ܫܢ̄ܬܢܝܐ ܓܘ ܟܠܝܗܝ ܦܢܝ̈ܬܐ ܕܥܠܡܐ ܠܚܝܠܢܬܐ ܕܥܝܪܘܬܐ ܒܐܕܫܢܘܬܐ ܠܫܢܝܬܐ ܘܡܪܕܘܬܢܝܬܐ ܘܣܓܝܐܘܬ ܠܫܢ̈ܐ، ܘܦܝܫܠܗ ܡܚܘܫܒܢܐ ܝܘܡܐ ܕ 21 ܫܒܛ ܝܘܡܐ ܬܒܠܝܐ ܕܠܫܢܐ ܝܡܝܐ، ܘܦܝܫܠܗ ܦܣܝܩܐ ܪܘܫܡܐܝܬ ܒܝܕ ܟܢܘܫܬܐ ܓܘܢܝܬܐ ܕܐܡܘ̈ܬܐ ܡܚܝܕ̈ܐ.
