ܡܙܘܝܚܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ، ܒܪܡܫܐ ܕܚܡܫܒܫܒܐ 27 ܫܒܛ 2025، ܓܘ ܐܘܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܥܢܟܒܐ، ܒܣܦܪܐ ܘܪܢܘܝܐ ܥܝܪܩܝܐ ܕܟܬܘܪ (ܥܒܕ ܐܠܚܣܝܢ ܫܥܒܐܢ).
ܘܫܘܪܐܠܗܘܢ ܥܒܘܕܘ̈ܬܐ ܕܪܡܫܐ، ܒܓܠܚܬܐ ܕܦܝܠܡܐ (ܙܘܠܐ) ܟܪܝܐ ܒܫܡܐ ܕ(ܓܒܪܐ ܠܐ ܬܠܩܠܗ ܡܨܝܒܢܗ- رجل لم يفقد بوصلته)، ܡܦܩܢܘܬܐ ܕܐܡܢܐ (ܪܫܝܕ ܡܐܪܘܢ)، ܛܘܝܒܐ ܘܣܝܢܪܝܘ ܓܠܝܘܢܝܬܐ (ܟܘܙܝܬ ܟܪܡ ܐܢܕܪܝ)، ܟܕ ܚܒܫܠܗ ܫܪܒܐ ܕܚܝ̈ܐ ܕܣܦܪܐ (ܥܒܕ ܐܠܚܣܝܢ ܫܥܒܐܢ)، ܘܡܐܙܠܬܗ ܒܪܘܝܝܬܐ، ܥܡ ܫܘܡܠܝܗ ܪܢܘܝܐ ܘܡܪܕܘܬܢܝܐ.
ܘܒܬܪ ܦܝܠܡܐ، ܦܝܫܠܗܿ ܥܒܝܕܬܐ ܝܬܒܬܐ ܕܘܪܫܝܬܐ، ܦܝܫܠܗܿ ܡܬܘܓܒܪܬܐ ܒܝܕ ܣܦܪܐ ܘܟܬܘܒܐ (ܦܛܪܘܣ ܗܘܪܡܙ ܢܒܬܝ)، ܗܘ ܬܢܐܠܗ ܓܘܗܿ ܣܦܪܐ ܕܟܬܘܪ (ܥܒܕ ܐܠܚܣܝܢ ܫܥܒܐܢ) ܥܠ ܐܕܫܢܝܘܬܐ ܘܣܓܝܐܘܬܐ ܘܚܝܬܐ ܡܫܘܬܦܬܐ، ܘܪ̈ܫܘܬܐ ܕܒܪ ܐܬܪܢܝܘܬܐ ܦܚܡܘܬܢܝܬܐ، ܥܡ ܩܪܝܬܗ ܠܐܝܩܪܐ ܕܗܝܝ̈ܘܬܐ ܦܪ̈ܥܝܐ ܘܕܝܠܝ̈ܘܬܐ ܡܪ̈ܕܘܬܢܝܐ ܬܘܕܝܬܢܝ̈ܐ ܘܐܘܡܬܢܝ̈ܐ.
ܘܬܢܐܠܗ ܕܟܬܘܪ (ܫܥܒܐܢ) ܒܣܘܘܕܗ ܥܠ ܩܛܪ̈ܐ ܕܡܫܝܚܝ̈ܐ ܘܡܐ ܚܙܐܠܗܘܢ ܡܢ ܥܒܕ̈ܐ ܘܡܥܝܩܢܘ̈ܬܐ ܦܪܝܫܐܝܬ ܒܡܬܚܐ ܕܪܘܒܥܐ ܕܕܪܐ ܥܒܝܪܐ ܒܥܠܬܐ ܕܩܫܝܘܬܐ ܘܣܘܦܝܘܬܐ ܘܪܗܝܒܘܬܐ.
ܘܒܚܘܬܡܐ ܕܪܡܫܐ ܡܘܩܪܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܕܘܪܥܐ ܕܡܕܒܪܢܘܬܐ ܠܣܦܪܐ ܕܟܬܘܪ (ܥܒܕ ܐܠܚܣܝܢ ܫܥܒܐܢ)، ܘܡܛܘܝܡܢܗ ܓܪܗ ܒܚܡܝܬܐ ܕܪ̈ܕܝܦܐ، ܘܩܪܝܬܐ ܠܫܠܡܐ ܘܕܘܪܫܐ ܘܐܕܫܢܝܘܬܐ ܡܪܕܘܬܢܝܬܐ ܘܐܝܩܪܐ ܕܙܕܩ̈ܐ ܕܒܪܢܫܐ.
ܘܦܝܫ ܕܟܝܪܐ، ܕܕܟܬܘܪ (ܥܒܕ ܐܠܚܣܝܢ ܫܥܒܐܢ)، ܝܠܗ ܪܢܘܝܐ ܥܝܪܩܝܐ ܣܡܠܝܐ، ܗܘܐܠܗ ܫܢ̄ܬܐ ܕ 1945 ܓܘ ܦܢܝܬܐ ܕ(ܥܟܕ ܐܠܣܠܐܡ) ܒܡܕܝܢ̄ܬܐ ܕܢܓ̰ܦܿ ܘܓܪܘܣܠܗ ܓܘܗܿ، ܒܬܪ ܗܕܟ ܢܦܩܠܗ ܡܢ ܟܠܢܝܘܬܐ ܕܐܝܩܘܢܘܡܝܐ ܘܝܘܠܦܢ̈ܐ ܣܝܣܝ̈ܐ ܡܢ ܒܝܬ ܨܘܒܐ ܕܒܓܕܕ، ܐܝܬܠܗ ܣܗܕܘܬܐ ܕܕܟܬܘܪܐ ܒܝܘܠܦܢ̈ܐ ܩܢܘܢܝ̈ܐ، ܝܠܗ ܒܚܝܪܐ ܒܓܝܓܼܠܐ ܕܙܕܩ̈ܐ ܕܒܪܢܫܐ ܘܩܢܘܢܐ ܬܒܝܠܝܐ ܘܟܬܝܒܬܐ ܕܦܪ̈ܫܓܼܢܐ ( ܩܢܘܢ̈ܐ)، ܘܐܝܬܠܗ ܙܘܕܐ ܡܢ (60) ܟܬܒ̈ܐ ܘܡܐܡܪ̈ܐ ܘܒܘܨܝ̈ܐ، ܘܝܠܗ ܡܠܦܢܐ ܓܘ ܬܪܝܢ ܒܬܝ̈ ܨܘܒ̈ܐ ܕܒܓܕܕ ܘܨܠܚ ܐܠܕܝܢ.
