ܦܝܫܠܗܿ ܚܬܝܡܬܐ، ܒܪܡܫܐ ܕܝܘܡ ܫܒܬܐ 30 ܐܒ 2025، ܓܘ ܐܘܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ، ܢܩܝܦܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ، ܝܬܒܬܐ ܬܠܝܬܝܬܐ ܡܢ ܒܝܬ ܦܘܠܚܢܐ ܕ(ܚܝܠܐ ܕܬܘܢܝܬܐ) ܠܕܪܫܘܬܐ ܥܠ ܟܬܝܒܬܐ ܡܒܥܢܝܬܐ، ܗܝ ܕܟܡ ܡܩܪܒܠܗܿ ܡܬܢܝܢܐ ܥܝܪܩܝܐ ܡܫܡܗܐ (ܐܚܡܕ ܣܥܕܐܘܝ).
ܚܒܫܠܗ ܒܝܬ ܦܘܠܚܢܐ، ܗܘ ܕܫܘܬܦܠܗ ܓܘܗ ܡܢܝܢܐ ܡܢ ܥܠܝܡ̈ܐ ܡܪܐ ܕܣܘܟܝ̈ܐ، ܠܐܣ̈ܐ ܕܟܬܝܒܬܐ ܕܬܘܢܝܬܐ، ܦܪܝܫܐܝܬ ܒܬܪܝܢ ܓܝܓܼܠ̈ܐ ܬܘܢܝܐ ܘܫܘܥܝܬܐ ܟܪܝܬܐ، ܥܡ ܓܠܚܬܐ ܕܛܘܦܣ̈ܐ ܘܢܘܣܝ̈ܐ ܣܦܪ̈ܝܐ ܥܪ̈ܒܝܐ ܘܬܒܝܠܝ̈ܐ، ܦܝܫܠܗܘܢ ܕܪܝܫܐ ܒܢܘܣܝܐ ܘܫܪܝܬܐ.
ܘܡܘܩܪܒܠܗܘܢ ܡܫܘܬܦܢ̈ܐ ܛܘܦܣ̈ܐ ܡܢ ܦܘܠܚܢܝ̈ܗܝ ܘܬܪ̈ܡܝܬܝܗܝ، ܘܦܪܫܠܗ ܣܗܡܐ ܬܪܝܢܐ ܡܢ ܝܬܒܝ̈ܬܐ ܕܒܝܬ ܦܘܠܚܢܐ ܠܫܪܝܬܝܗܝ ܘܕܪܫܬܝܗܝ ܘܦܝܫܠܗ ܦܬܝܚܐ ܬܪܥܐ ܕܕܘܪܫܐ ܚܕܪ ܐܣܛܘܟܼܣܝܗܝ ܐܡܢܝ̈ܐ ܘܪ̈ܢܝܝܐ، ܘܦܝܫܠܗ ܚܬܝܡܐ ܒܝܬ ܦܘܠܚܢܐ ܦܘܠܚܢ̈ܗ ܒܡܝܩܪܢܘܬܐ ܕܡܫܘܬܦܢ̈ܐ ܓܘ ܝܬܒ̈ܝܬܗ ܕܪ̈ܫܘܬܢܝܐ.
ܘܒܚܘܬܡܐ ܕܒܝܬ ܦܘܠܚܢܐ ܡܘܩܪܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܡܡܠܗ ܗܘ ܕܫܘܪܪܠܗ ܓܘܗ ܕ( ܛܘܝܒܐ ܕܚܕܐ ܩܘܡܬܐ ܣܦܪܝܬܐ ܡܫܡܗܬܐ ܐܝܟ (ܐܚܡܕ ܣܥܕܐܘܝ) ܝܠܗܿ ܚܕܐ ܡܙܝܕܬܐ ܐܕܫܢܝܬܐ، ܘܐܚܢܝ ܓܕܢ̈ܐ ܗ̄ܘܚ ܒܐܝܬܘܬܐ ܐܕܝܘܡ ܒܝܢܬܢ، ܝܠܗ ܗܘ ܟܬܘܒܐ ܕܠܐ ܟܠܗ ܡܢ ܡܘܗܒܬܗ ܘܣܢܕܬܗ ܠܥܠܝܡ̈ܐ)، ܘܐܦ ܗܕܟ ܒܥܐܠܗ (ܐܘܓܼܢܐ) ܠܡܫܘܬܦܢ̈ܐ، ܢܨܝܚܘܬܐ ܘܡܢܬܝܬܐ ܒܬܪ̈ܡܝܬܝܗܝ ܡܪ̈ܕܘܬܢܝܐ ܐܬܝܢ̈ܐ، ܘܪܡܙܠܗ ܕܬܪ̈ܥܐ ܕܡܕܒܪܢܘܬܐ ܓܘܢܝܬܐ ܒܕ ܦܝܫܝ ܦܬܝܚ̈ܐ ܩܕ̄ܡ ܥܠܝܡ̈ܐ، ܗܝܡܢܘܬܐ ܒܓܪܝܗܝ ܒܬܘܪܨܐ ܕܕܥܬܝܕ ܕܡܪܕܘܬܐ ܘܛܘܪܢܬܐ ܕܚܙܘܐ ܣܦܪܝܐ ܘܪܢܝܝܐ.
ܘܦܝܫ ܕܟܝܪܐ، ܕ(ܐܚܡܕ ܣܥܕܐܘܝ) ܝܠܗ ܡܬܢܝܢܐ ܘܡܚܘܪܐ ܘܟܬܘܒܐ ܕܣܝܢܪܝܘ ܥܝܪܩܝܐ، ܗܘܐܠܗ ܒܒܓܕܕ ܫܢ̄ܬܐ ܕ1973، ܦܠܚܠܗ ܒܡܢܝܢܐ ܡܢ ܓܠܝܘܢ̈ܐ ܘܡܓܼܠ̈ܐ ܘܫܘܬܐܣ̈ܐ ܓܠܝܘܢܝ̈ܐ، ܒܥܕܢܐ ܩܐܡܝܐ ܦܠܚ ܒܡܦܪܝܢܘܬܐ ܘܟܬܝܒܬܐ ܕܙܘܠ̈ܐ (ܦܝܠܡ̈ܐ) ܐܫܛܪ̈ܝܐ ܘܛܘܝܒܐ ܕܚܘܪ̈ܙܐ ܬܠܦܙܝܘܢܝ̈ܐ ܘܟܬܝܒܬܐ ܕܣܝܢܪܝܘ، ܘܩܢܐܠܗ ܕܫܢܐ ܩܕܡܝܐ ܓܘ ܥܕܥܐܕܐ ܕܓܠܝܘܢܘܬܐ ܥܝܪܩܝܬܐ ܦܪܥܐ ܕܪܝܦܘܪܬܓ̰ ܫܢ̄ܬܐ ܕ 2004، ܘܡܢ ܦܘܠܚܢ̈ܐ ܬܘܢܝܬܢܝ̈ܐ ܬܘܢܝܐ ܕ(ܦܪܐܢܟܫܬܝܢ ܓܘ ܒܓܕܕ) ܗܘ ܢܦܩܠܗ ܫܢ̄ܬܐ ܕ 2013، ܘܦܝܫܠܗ ܡܬܘܪܓܡܐ ܠ(32) ܠܫܢ̈ܐ، ܡܢܝܗܝ ܐܢܓܠܝܙܝܐ، ܨܝܢܝܐ، ܦܪܢܣܝܐ، ܘܟܘܪܝܝܐ.
