ܡܛܘܟܣܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ، ܝܘܡ ܚܡܫܒܫܒܐ 7 ܬܫܪܝܢ ܬܪܝܢܐ 2024، ܓܘ ܐܘܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܪܘܣܬܩܐ ܕܥܢܟܒܐ، ܚܕܐ ܐܡܘܪܘܬܐ ܥܠ ܕܝܪܘܬܐ ܕܠܘܡܕ̈ܐ، ܒܥܘܕܪܢ ܥܡ ܚܘܕܪܐ ܕܩܨܪܐ ܕܠܘܡܕ̈ܐ ܒܘܙܝܪܘܬ ܡܪܕܘܬܐ ܘܕܝܪܘܬܐ ܘܥܬܩ̈ܐ ܥܝܪܩܝܬܐ.
ܘܐܡܘܪܐ ܝܗ̄ܘܐ، ܡܕܒܪܢܐ ܓܘܢܝܐ ܕܚܘܕܪܐ ܕܩܨܪܐ ܕܠܘܡܕ̈ܐ ܒܘܙܝܪܘܬ ܡܪܕܘܬܐ ܘܕܝܪܘܬܐ ܘܥܬܩ̈ܐ ܥܝܪܩܝܬܐ ܕܟܬܘܪ (ܡܘܢܬܨܪ ܨܒܐܚ ܐܠܚܣܢܐܘܝ)، ܘܚܒܫܠܗܿ ܐܡܘܪܘܬܐ ܡܠܘܐܐ ܕܠܘܡܕ̈ܐ ܘܕܐܟܝܘܬܐ ܕܥܒܕܬܝܗܝ ܦܥܘܐ ܡܢ ܦܥܘ̈ܐ ܕܕܝܪܘܬܐ ܒܥܝܪܩ ܘܩܠܝܡܐ ܕܟܘܪܕܣܬܢ، ܓܘ ܦܪ̈ܨܘܦܐ ܐܢܝ ܡܫܘܬܦܝ ܓܘܝܗܝ ܡܢ ܐܬܪ̈ܘܬܐ ܫܒܒ̈ܐ ܘܦܢܝܬܐ.
ܘܦܝܫܠܗܘܢ ܡܛܝܒ̈ܐ ܒܐܡܘܪܘܬܐ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܘܡܢܝܢܐ ܡܢ ܫܕܬܢ̈ܐ ܕܡܕܒܪܢܘܬܐ، ܥܡ ܡܢܝܢܐ ܡܢ ܝܨܘܦ̈ܐ ܒܨܒܼܘܬܐ ܡܪܕܘܬܢܝܬܐ ܘܕܝܪܘܬܢܝܬܐ.
ܘܕܟܬܘܪ(ܡܘܢܬܨܪ ܨܒܐܚ ܐܠܚܣܢܐܘܝ)، ܐܝܬܠܗ ܣܗܕܘܬܐ ܕܡܓ̰ܣܬܝܪ ܘܕܟܬܘܪܐ ܓܘ ܓܐܘܓܪܦܝܐ ܡܢ ܟܠܢܝܘܬ ܣܦܪܘܬܐ ܒܝܬ ܨܘܒܐ ܕܟܘܦܐ، ܦܠܚܠܗ ܒܓܝܠܓܼܠܐ ܐܟܕܝܡܝܐ ܠܡܬܚܐ ܕ(16 ܫܢ̈) ، ܩܕ̄ܡ ܕܫܢܐ ܠܦܘܠܚܢܐ ܦܘܪܢܣܝܐ ܐܝܟ ܡܕܒܪܢܐ ܕܡܟܬܒܐ ܕܘܙܝܪܐ ܕܡܪܕܘܬܐ ܘܕܝܪܘܬܐ ܘܥܬܩ̈ܐ ܫܢ̄ܬܐ ܕ(2020)، ܘܒܥܕܢܐ ܩܐܡܝܐ ܝܠܗ ܡܕܒܪܢܐ ܓܘܢܝܐ ܕܚܘܕܪܐ ܕܩܨܪܐ ܕܠܘܡܕ̈ܐ ܒܘܙܝܪܘܬܐ.
ܕܟܬܘܪ (ܚܣܢܐܘܝ) ܐܝܬܠܗ ܥܣܪ̈ܬܐ ܕܒܘܨܝ̈ܐ ܝܘܠܦܢܝ̈ܐ ܘܚܡܫܐ ܣܝܡ̈ܐ ܛܒܝܥ̈ܐ، ܡܫܚܠܦ̈ܐ ܒܓܝܓܼܠܐ ܕܕܝܠܝܘܬܗ ܘܝܨܝܦܘܬܗ ܒܓܝܓܼܠܐ ܡܚܕܘܪܝܐ ܘܥܬܩܝܐ، ܘܐܝܬܠܗ ܝܨܝܦܘܬܐ ܓܘ ܡܕܒܪܢܘܬܐ ܘܛܘܟܣܐ ܕܠܘܡܕ̈ܐ، ܟܕ ܫܩܠ ܗ̄ܘܐ ܠܗ ܪܫܢܘܬܐ ܕܥܣܪ̈ܬܐ ܕܠܘܡܕ̈ܐ ܬܒܝܠܝ̈ܐ ܘܕܘܟܬܢܝ̈ܐ ܥܠ ܫܘܝܐ ܪܘܫܡܝܐ ܘܟܢܘܫܝܐ ܡܕܝܢܝܐ.
ܘܦܝܫ ܕܟܝܪܐ، ܕܕܝܪܘܬܐ ܕܠܘܡܕ̈ܐ ܦܝܫܐ ܡܚܘܫܒܢܬܐ ܡܢ ܐܕܫ̈ܐ ܕܕܝܪܘܬܐ ܡܪܕܘܬܢܝܬܐ ܗܝ ܕܦܪܝܫܬܐܝܠܗܿ ܒܚܕܘܬܐ، ܒܥܠܬܐ ܕܓܠܝܬܗܿ ܒܐ̄ܚܪ̈ܝܬܐ ܕܕܪܐ ܕܥܣܪܝܢ، ܓܘ ܛܘܟܣܐ ܘܛܘܝܒܐ ܕܠܘܡܕ̈ܐ ܥܠ ܫܘܝܐ ܬܒܝܠܝܐ، ܘܢܝܫܗܿ ܝܠܗ ܒܥܝܘܬܐ ܒܝܕܥܬܐ ܘܪܘܝܚܘܬܐ ܕܚܘܕܪܐ ܕܡܘܕܥܢ̈ܘܬܐ ܡܪ̈ܕܘܬܢܝܐ ܘܡܕܝܢܝ̈ܐ.
