ܫܘܬܦܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ، ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܘܒܛܘܝܒܐ ܕܪܫ ܒܝܬ ܣܡܟܐ ܕܐܟܐܕ ܥܢܟܒܐ ܐܬܠܝܛܝܐ (ܫܘܩܝ ܝܘܣܦ) ܘܟܢܫܐ ܡܢ ܒܢܝ̈ ܥܡܢ، ܒܪܡܫܐ ܕܝܘܡ ܬܪܝܢܒܫܒܐ 1 ܐܝܠܘܠ 2025، ܒܚܕ ܙܘܝܚܐ ܕܣܩܒܠܬܐ ܘܡܝܩܪܢܘܬܐ ܕܕܩܘܪܐ ܬܘܬܒܐ (ܓ̰ܘܢܐܬܢ ܡܢܨܘܪ)، ܐܬܝܢܐ ܡܢ ܐܘܚܕܢ̈ܐ ܡܚܝܕ̈ܐ ܐܡܪ̈ܝܟܝܐ ܒܕܘܪܥܐ ܕܗܒܢܝܐ ܕܦܘܪܫܐ، ܐܢܝ ܕܦܝܫܠܗܘܢ ܥܒܝܕܐ ܚܘܪ̈ܩܢܗܿ ܒܐܘܢܐ ܕ ܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܥܢܟܒܐ.
ܘܫܘܪܪܠܗ (ܐܘܓܼܢܐ) ܒܡܡܠܗ ܗܘ ܕܟܡ ܡܩܪܒܠܗ ܒܦܘܪܣܐ ، : (ܗܕ ܡܝܩܪܢܘܬܐ ܠܐܝܠܗܿ ܙܘܝܚܐ ܕܦܘܠܚܢܐ ܠܚܘܕܝܐ ܒܐܬܠܝܛܘܬܐ ܕܕܩܘܪܘܬܐ ܒܠܚܘܕ، ܐܠܐ ܛܝܡܢܬܐ ܪܒܬܐ ܕܨܒܝܢܐ ܘܕܥܪܬܐ ܫܪܝܪܬܐ ܠܬܫܡܫܬܐ ܕܐܬܪܐ)، ܘܪܡܙܠܗ (ܫܘܬܦܬܐ ܕܓ̰ܘܢܐܬܢ ܣܒܝܪܬܐ ܓܘ ܡܛܐܠ̈ܝܬܐ ܕܠܘܣ ܐܢܓ̰ܠܘܣ 2028 ܡܡܬܠܐ ܚܕ ܢܝܫܐ ܪܒܐ ܕܚܕ ܥܠܝܡܐ ܕܐܝܬܠܗ ܗܝܡܢܘܬܐ ܒܡܨܝܢ̈ܘܬܗ ܘܒܨܒܝܢܗ ܒܥܐܠܗ ܕܗܘܐ ܡܛܝܒܐ ܒܝܢ ܡܓܘܒܝ̈ܐ ܕܟܙܝܪ̈ܐ).
ܘܐ̄ܡܪܗ (ܐܘܓܼܢܐ) :(ܣܝܥܬܐ ܕܡܛܐܠ̈ܝܬܐ ܐܬܪ̈ܢܝܐ ܥܝܪ̈ܩܝܐ، ܒܥܕܢ ܕܦܬܚܠܗܿ ܬܪ̈ܥܗܿ ܒܪܩܘܒܠ ܡܨܝܢ̈ܘܬܐ ܬܘܬܒ̈ܐ، ܡܘܩܪܒܠܗܿ ܐܓܪܬܐ ܐܢܢܩܝܬܐ ܚܒܫܠܗܿ (ܬܘܬܒܘܬܐ ܠܐ ܩܛܥܐ ܘܪ̈ܝܕܐ ܕܒܝܬܝܘܬܐ)، ܐܠܐ ܦܬܚܐ ܐܘܦܩ̈ܐ ܚܕܬ̈ܐ ܕܡܒܥܢܘܬܐ ܘܦܘܪܫܐ، ܘܫܘܪܪܠܗ ܕܐܬܠܝܛܘܬܐ ܒܕ ܦܝܫܐ ܚܕ ܓܫܪܐ ܕܒܝܬܝܘܬܐ ܘܫܩܠܬܐ ܕܫܘܒܗܪܐ ܒܗܝܝܘܬܐ.
ܘܒܡܡܠܗ، ܡܛܘܝܡܢܗ ܪܫܐ ܕܒܝܬ ܣܡܟܐ ܕܐܟܐܕ ܥܢܟܒܐ ܐܬܠܝܛܝܐ (ܫܘܩܝ ܝܘܣܦ)، ܓܪܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܣܢܕܬܐ ܕܡܨܝܢ̈ܘܬܐ ܥܠܝܡܘܬܢܝ̈ܐ ܒܓܝܓܼܠ̈ܐ ܡܫܚܠܦ̈ܐ ܡܪ̈ܕܘܬܢܝܐ ܘܐܬܠܝܛܝ̈ܐ ܐܢܝ ܕܓܠܐ ܥܡܢ ܡܒܥܢܘܬܗ ܓܘܝܗܝ، ܘܒܥܐܠܗ ܒܚܘܬܡܐ ܕܡܡܠܗ ܢܨܝܚܘܬܐ ܘܦܘܪܫܐ ܠܕܩܘܪܐ (ܓ̰ܘܢܐܬܢ ܡܢܨܘܪ) ܒܡܐܙܠܬܗ ܐܬܠܝܛܝܬܐ ܓܘ ܡܛܐܠ̈ܝܬܐ ܕܠܘܣ ܐܢܓ̰ܠܘܣ ܐܬܝܢ̈ܐ، ܘܩܢܝܬܐ ܕܝܘܩܢܐ ܦܝܫ ܡܣܘܓܼܠܐ ܒܫܡܐ ܕܐܬܪܗ ܝܡܐ ܥܝܪܩ.
ܘܒܚܘܬܡܐ ܕܙܘܝܚܐ ܦܝܫܠܗܿ ܥܒܝܕܬܐ ܡܝܩܪܢܘܬܐ ܕܕܩܘܪܐ (ܓ̰ܘܢܐܬܢ ܡܢܨܘܪ) ܒܕܘܪܥܐ ܕܗܒܢܝܐ ܕܦܘܪܫܐ، ܗܘ ܕܦܝܫ ܡܚܘܫܒܢܐ ܕܘܪܥܐ ܒܫ ܥܠܝܐ ܝܗܒܐܠܗ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܠܦܪ̈ܝܫܐ ܡܢ ܥܠܝܡ̈ܐ ܒܓܝܓܼܠ̈ܐ ܡܫܚܠܦ̈ܐ.
ܘܦܝܫ ܕܟܝܪܐ، ܕܕܩܘܪܐ ܬܘܬܒܐ (ܓ̰ܘܢܐܬܢ ܡܢܨܘܪ) ܦܝܫܠܗ ܡܓܘܒܝܐ ܪܘܫܡܐܝܬ ܒܝܕ ܣܝܥܬܐ ܡܛܐܠܢܝܬܐ ܐܬܪܢܝܬܐ ܥܝܪܩܝܬܐ ܕܡܡܬܠ ܥܝܪܩ ܓܘ ܡܘܪ̈ܝܐ ܕܡܛܐܠ̈ܝܬܐ ܕܠܘܣ ܐܢܓ̰ܠܘܣ 2028 .
