ܩܝܡܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܚܘܝܕܐ ܕܣܦܪ̈ܐ ܘܣܝܘܡ̈ܐ ܣܘܪ̈ܝܝܐ، ܝܘܡ ܚܡܫܒܫܒܐ 31 ܬܫܪܝܢ ܩܕܡܝܐ 2024، ܒܚܕ ܙܘܝܚܐ ܒܦܘܪܣܐ ܕܕܟܪܐ ܕ 175 ܠܡܘܠܕܐ ܕܓܠܝܘܢܐ ܣܘܪܝܝܐ ܩܕܡܝܐ، ܓܘ ܐܘܢܐ ܕܒܝܬ ܣܡܟܐ ܟܠܕܝܐ ܒܝܬܝܐ ܒܪܘܣܬܩܐ ܕܥܢܟܒܐ ܒܐܪܒܝܠ.
ܘܫܘܪܐܠܗ ܙܘܝܚܐ ܢܘܩܙ̈ܗ، ܗܘ ܕܦܝܫܠܗ ܥܒܝܕܐ ܒܪܥܝܘܬ ܘܙܝܪܘܬܐ ܕܡܪܕܘܬܐ ܘܥܠܝܡ̈ܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ، ܒܚܕ ܡܡܠܐ ܕܚܘܝܕܐ ܕܣܦܪ̈ܐ ܘܣܝܘܡ̈ܐ ܣܘܪ̈ܝܝܐ ܦܝܫܠܗ ܡܘܩܪܒܐ ܒܝܕ ܪܫ ܚܘܝܕܐ (ܪܘܢܕ ܦܘܠܘܣ)، ܬܢܐܠܗ ܓܘܗ ܐܝܟܢ̈ܘܬܐ ܕܫܬܐܣܬܐ ܕܓܠܝܘܢܘܬܐ ܣܘܪܝܝܬܐ ܘܡܫܪ̈ܝܐ ܒܫ ܓܠܝ̈ܐ ܓܘ ܡܐܙܠܬܗܿ، ܘܒܬܪ ܗܕܟ ܡܡܠܐ ܕܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܦܝܫܠܗ ܡܘܩܪܒܐ ܒܝܕ ܘܙܝܪܐ ܕܡܘܒܠܢܘܬܐ ܘܛܘܦܝ̈ܐ (ܐܢܘ ܓ̰ܘܗܪ ܥܒܕܘܟܐ)، ܗܘ ܕܚܘܬܬܠܗ ܓܘܗ ܥܠ ܓܪܐ ܕܫܘܠܛܢܘܬܐ ܕܩܠܝܡܐ ܒܣܢܕܬܐ ܕܠܫܢ̈ܐ ܐܘܡܬܢܝ̈ܐ ܘܡܪܕܘܬܐ ܕܡܟܝܢ̈ܬܐ ܚܝܢ̈ܐ ܒܩܠܝܡܐ.
ܒܬܪ ܗܕܟ ܡܘܩܪܒܠܗ ( ܐܙܐܕ ܚܡܕ ܐܡܝܢ) ܕܘܩܐ ܕܓܠܝܘܢܝ̈ܐ ܕܟܘܪܕܣܬܢ ܡܡܠܗ، ܒܬܪ ܗܕܟ ܚܠܩܬܐ ܕܘܪܫܝܬܐ، ܦܝܫܠܗ ܡܬܘܓܒܪܬܐ ܒܝܕ ܡܚܘܪܐ (ܡܩܕܐܕ ܟ̰ܘܠܐ)، ܘܝܗ̄ܘܐ ܚܕ ܡܢ ܣܪ̈ܢܗܿ ܕܝܘܕܥܝܐ (ܪܘܕܝ ܫܝܪ)، ܗܘ ܕܬܢܐܠܗ ܥܠ ( ܡܥܒܕܢܘܬܐ ܕܓܠܝܘܢܘܬܢ ܪܩܡܝܬܐ ܒܢܛܪܬܐ ܕܗܝܝܘܬܐ ܡܪܕܘܬܢܝܬܐ ܘܬܘܕܝܬܢܝܬܐ ܒܡܕܢܚܐ ܡܨܥܝܐ)، ܘܬܢܐܠܗ (ܚܢܐܢ ܐܘܫܝܐ) ܥܠ (ܩܐܡ ܕܦܘܠܚܢܐ ܓܠܝܘܢܝܐ ܢܫܝܐ ܓܘ ܢܘܣܝܝ ܦܪܨܘܦܝܐ)، ܒܬܪ ܗܕܟ ܬܢܐܠܗ ܝܘܕܥܝܐ (ܒܐܣܡ ܦܪܢܣܝܣ) ܥܠ ( ܚܝܪܬܐ ܥܠ ܩܐܡ ܘܣܩܘܒܠܝ̈ܘܬܐ ܕܟܠܝ ܕܪܩܘܒܠ ܓܠܝܘܢܘܬܐ ܣܘܪܝܝܬܐ ܒܥܝܪܩ).
ܘܚܒܫܠܗ ܙܘܝܚܐ ܢܘܩܙܐ ܙܡܝܪܝܐ ܝܪܬܘܬܢܝܐ ܥܡ ܢܩܫܬܐ ܥܠ ܥܘܕܐ ܘܓܝܬܪ ܒܝܕ ܐܡܢܐ (ܕܠܐܘܪ ܡܪܩܘܣ)، ܒܬܪ ܗܕܟ ܡܡܠܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܦܝܫܠܗ ܡܘܩܪܒܐ ܒܝܕ ܡܝܩܪܐ ( ܟܠܕܘ ܪܡܙܝ ܐܘܓܼܢܐ)، ܗܘ ܕܚܘܬܬܠܗ ܓܘܗ ( ܡܕܒܪܢܘܬܐ ܓܘܢܝܬܐ ܒܥܐܠܗܿ ܗܕ ܫܢ̄ܬܐ ܕܡܫܪܝܐ ܒܛܘܟܣܐ ܕܚܕ ܚܘܪܙܐ ܫܢ̄ܬܢܝܐ ܒܦܘܪܣܐ ܕܥܐܕܐ ܕܓܠܝܘܢܘܬܐ ܣܘܪܝܝܬܐ، ܚܒܫ ܡܝܩܪܢܘܬܐ ܕܡܓܘܒܝ̈ܐ ܡܢ ܓܠܝܘܢܝ̈ܐ ܕܥܡܢ ܛܝܡܢܬܐ ܠܥܡܠܝ̈ܗܝ ܘܦܘܠܚܢܝ̈ܗܝ ܓܠܝܘܢܝ̈ܐ ܒܓܝܓܼܠܐ ܓܠܝܘܢܝܐ ܘܝܘܕܥܝܐ)، ܘܪܡܙܠܗ ( ܡܝܩܪܢܘܬܐ ܚܒܫܐ ܟܠܝܗܝ ܓܠܝܘܢܝ̈ܐ ܕܥܡܢ ܘܡܢ ܟܠ ܦܢܝ̈ܬܐ ܡܫܚܠܦ̈ܐ ܕܐܝܬܘܬܗ)، ܘܫܘܪܐܠܢ ܗܕ ܫܢ̄ܬܐ ܒܡܝܩܪܢܘܬܐ ܕܥܣܪܐ ܡܢ ܓܠܝܘܢܝܗܐ ܕܥܡܢ، ܘܒܕ ܩܝܡܚ ܒܫܢ̈ܐ ܐܬܝܢ̈ܐ ܒܡܝܩܪܢܘܬܐ ܕܡܢܝܢܐ ܐ̄ܚܪܢܐ ܡܢ ܝܘܕܥܝ̈ܐ ܕܥܡܢ).
ܘܡܘܒܝܢܗ (ܐܘܓܼܢܐ)، ( ܘܠܝܬܢ ܐܕܝܘܡ ܝܠܗܿ ܕܕܟܪܚ ܠܒܢ̄ܬܐ ܩܕܡܝܬܐ ܓܘ ܓܠܝܘܢܘܬܐ ܣܘܪܝܝܬܐ ܗܝ ܕܟܡ ܡܬܒܝܠܗܿ ܓܠܝܘܢܝ̈ܐ ܩܕܡܝ̈ܐ، ܐܢܝ ܕܚܙܐܠܗܘܢ ܥܣܩܘ̈ܬܐ ܘܕܒܚܠܗܘܢ ܡܛܠ ܡܠܬܐ ܚܐܪܬܐ ܒܗܘ ܙܒܢܐ) ܘܪܡܙܠܗ ( ܕܐܚܢܝ ܘܠܐ ܕܕܟܪܚ ܐܕܝܘܡ، ܣܗܕ̈ܐ ܕܡܠܬܐ ܚܐܪܬܐ، ܐܢܝ ܕܕܒܚܠܗܘܢ ܒܕܡܝ̈ܗܝ ܚܠܦܗܿ، ܘܓܠܝܘܢܘܬܐ ܕܥܡܢ ܟܬܝܒܬܐܝܠܗܿ ܒܕܡܐ، ܘܘܠܐ ܕܫܩܠܚ ܫܘܒܗܪܐ ܓܘܗܿ ܘܪܚܫܚ ܓܘܗܿ ܠܩܕ̄ܡܐ ܠܛܘܪܢܬܗܿ).
ܘܦܝܫܠܗܘܢ ܚܬܝܡ̈ܐ ܢܘܩܙ̈ܐ ܕܙܘܝܚܐ، ܒܡܝܩܪܢܘܬܐ ܕܡܓܘܒܝ̈ܐ ܡܢ ܓܠܝܘܢܝ̈ܐ ܦܠܚ̈ܐ ܒܓܠܝܘܢܘܬܐ ܣܘܪܝܝܬܐ ܘܡܢ ܫܒܝܠ̈ܐ ܡܫܚܠܦ̈ܐ ܕܝܘܕܥܐ ܛܝܡܢܬܐ ܠܦܘܠܚܢܝ̈ܗܝ ܝܘܕܥܝ̈ܐ، ܘܫܘܬܦܠܗܘܢ ܓܘ ܦܠܓ̄ܝܬܐܕܝܘܩܢܐ ܕܗܒܢܝܐ ܕܓܠܝܘܢܘܬܐ، ܟܠ ܡܢ (ܐܢܘ ܓ̰ܘܗܪ ܥܒܕܘܟܐ) ܘܙܝܪ ܕܡܘܒܠܢܘܬܐ ܘܛܘܦܝ̈ܐ، ܘܟܝܠܐ ܕܘܙܝܪܐ ܕܡܪܕܘܬܐ ܘܥܠܝܡ̈ܐ (ܐܪܝܐܢ ܨܠܐܚ ܐܠܕܝܢ، (ܚܠܝܠ ܥܒܕܠܠܗ) ܡܕܒܪܢܐ ܓܘܢܝܐ ܕܕܝܘܢ ܕܘܙܝܪܘܬܐ ܕܡܪܕܘܬܐ ܘܥܠܝܡ̈ܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ، (ܟܠܕܘ ܪܡܙܝ ܐܘܓܼܢܐ) ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، (ܪܘܢܕ ܦܘܠܘܣ) ܪܫ ܚܘܝܕܐ ܕܣܦܪ̈ܐ ܘܣܝܘܡ̈ܐ ܣܘܪ̈ܝܝܐ، ܘܚܒܫܠܗܘܢ ܡܝܩܪ̈ܐ ܟܠ ( ܫܡܥܘܢ ܨܠܝܒܐ ܡܬܝ-ܐܬܝܪܝܬܐ ܕܙܓܪܘܣ/ܐܪܒܝܠ، ܫܠܝܡܘܢ ܕܘܝܕ ܐܒܪܗܐ-ܐܬܝܪܝܬܐ ܕܥܝܪܩܝܼܐ ܣܘܪܝܝܬܐ/ ܒܓܕܕ، ܓ̰ܢܐܢ ܦܘܠܘܣ- ܣܦܪ ܙܒܢܐ ܕܒܝܬ ܥܢܟܒܐ/ ܥܢܟܒܐ، ܢܡܪܘܕ ܩܫܐ- ܦܪܣܩܠܐ ܕܩܠܐ ܕܫܠܡܐ/ ܒܓܕܝܕܐ، ܒܗܢܡ ܫܒܐ ܕܘܝܕ- ܝܘܕܥܝܐ ܘܚܦܝܛܐ ܡܪܕܘܬܢܝܐ/ ܒܪܛܠܐ، ܕܠܐܪܐܡ ܒܘܝܐ ܝܘܣܦ- Ankawa Today/ ܥܢܟܒܐ، ܦܐܠܢܬܝܢܐ ܝܘܐܪܫ ܗܝܕܘ- ܩܨܪܐ ܕܡܪܕܘܬܐ ܘܐܡܢ̈ܐ/ ܐܪܒܝܠ، ܐܝܦܐ ܚܒܝܒ ܟܪܝܡ- ܐܬܝܪܝܬܐ ܕܥܫܬܪ/ ܐܠܩܘܫ، ܢܣܝܡ ܨܐܕܩ- ܚܦܝܛܐ ܘܓܠܝܘܢܝܐ/ ܕܗܘܟ، ܡܪܝܡ ܫܡܘܐܝܠ -Zabu Media / ܕܗܘܟ).
ܘܦܝܫ ܕܟܝܪܐ، ܕܥܡܢ ܡܙܝܚ ܒܥܐܕܐ ܕܓܠܝܘܢܘܬܐ ܣܘܪܝܝܬܐ، ܐ̄ܣܪܬܐ ܒܣܝܩܘܡ ܢܘܦܩܐ ܕܓܠܝܘܢܐ ܩܕܡܝܐ ܒܠܫܢܐ ܣܘܪܝܝܐ، ܒܫܡܐ ܕ( ܙܗܪܝܪ̈ܐ ܕܒܗܪܐ)، ܗܘ ܕܢܦܩܠܗ ܡܢܝܢܐ ܩܕܡܝܐ ܡܢܗ ܒܣܝܩܘܡ 1/ܬܫܪܝܢ ܬܪܝܢܐ ܫܢ̄ܬܐ ܕ 1849 ܒܡܕܝܢ̄ܬܐ ܕܐܘܪܡܝ ܒܐܝܪܢ.
