ܡܦܠܓ̄ܝܠܗ ܡܟܬܒܐ (ܚܘܕܪܢܝܬܐ) ܕܫܒܪܐ ܢܩܘܦܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ، ܒܝܘܡ ܥܪܘܒܬܐ 16 ܚܙܝܪܢ 2023، ܕܫܢ̈ܐ ܠܫܒܼܪ̈ܐ ܘܬܠܡܝܕ̈ܐ ܕܡܠܦܢܘܬܐ ܡܫܝܚܝܬܐ ܓܘ ܪܘܣܬܩܐ ܕܫܩܠܒܐ ܒܗܘܦܪܟܝܐ ܕܐܪܒܝܠ.
ܘܦܝܫܠܗܘܢ ܡܛܝܒ̈ܐ ܠܚܘܪ̈ܩܢܐ ܕܦܠܓ̄ܝܬܐ ܪܥܝܐ ܕܟܘܪ ܐܦܣܩܘܦܘܬܐ ܕܫܩܠܒܐ ܐܒܐ “ܐܢܝܣ ܝܥܩܘܒ ܣܘܠܐ”، ܘܥܡ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ “ܟܠܕܘ ܪܡܙܝ ܐܘܓܼܢܐ”، ܘܡܕܒܪܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܡܝܩܪܐ ” ܒܪܢܐܪܕ ܝܘܣܦ” ܘܡܢܝܢܐ ܡܢ ܫܕܬܢ̈ܐ ܕܡܕܒܪܢܘܬܐ.
ܘܩܝܡܠܗܿ ܐܝܙܓܕܘܬܐ ܒܣܥܘܪܘܬܐ ܠܡܕܝܢ̄ܬܐ ܕܫܩܠܒܐ ܠܒܝܬ ܐܪ̈ܟܐ ܘܒܝܬ ܥܬܝܩ̈ܬܐ ܕܡܫܡܫܢܐ ” ܡܝܟܐܝܠ ܡܢܨܘܪ” ܘܚܙܐܠܗܿ ܩܢܝܢ̈ܗ، ܟܕ ܡܘܥܒܪܗܿ ܐܝܙܓܕܘܬܐ ܣܥܘܪܬܐ ܠܛܘܝܒܐ ܕܡܕܒܪܢܘܬܐ ܠܥܘܕܪܢܐ ܒܢܝܫܐ ܕܢܛܪܬܐ ܕܚܒܝܫ̈ܬܗ.
