ܡܩܪܒܐ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ، ܒܘܝܐܐ ܠܡܘܣܝܩܘܪܐ ܣܘܪܝܝܐ ܣܘܪܝܼܝܐ ܬܒܠܝܐ ( ܢܘܪܝ ܐܣܟܢܕܪ)، ܗܘ ܕܫܘܢܐܠܗ ܠܓܢܘܢܐ ܫܡܝܢܝܐ، ܒܝܘܡ ܬܪܝܢܒܫܒܐ 25 ܟܢܘܢ ܩܕܡܝܐ 2023، ܒܥܘܡܪܐ ܕ(85) ܫܢ̈ܐ.
ܟܡܩܪܒܐ ܡܕܒܪܢܘܬܐ ܒܦܪܨܘܦܐ ܕܡܕܒܪܢܗܿ ܓܘܢܝܐ ܘܟܕܝܪ̈ܗܿ ܘܫܕܬܢ̈ܗܿ ܠܚܙܡܢ̈ܗ ܘܡܚܒܢ̈ܗ ܣܘܠܝܐ ܘܡܣܝܒܪܢܘܬܐ، ܘܟܛܠܒܚ ܡܢ ܡܪܝܐ ܕܡܫܪܐ ܡܢܚܐ ܒܪܚܡܗ ܪܒܬܐ ܘܝܗ̄ܒܠ ܐ̄ܢܫܘܬܗ ܡܣܝܒܪܢܘܬܐ ܘܣܘܠܝܐ.
ܘ(ܢܘܪܝ ܐܣܟܢܕܪ) ܡܘܣܝܩܘܪܐ ܘܡܩܢܬܢܐ ܣܘܪܝܝܐ ܣܘܪܝܼܝܐ، ܦܝܫܠܗ ܡܫܡܗܐ ܒܦܘܠܚܢ̈ܗ ܒܡܘܣܝܩܐ ܥܕܬܢܝܬܐ ܣܘܪܝܝܬܐ، ܗܘܐܠܗ ܓܘ ܕܝܪܐ ܕܙܘܪ ܫܢ̄ܬܐ ܕ(1938) ܡܢ ܒܝܬܘܬܐ ܐܘܪܗܝܬܐ ܢܚܝܬܬܐ ܡܢ ܡܕܝܢ̄ܬܐ ܕܐܘܪܗܝ ( ܐܘܪܦܿܐ ܗܫܝܬܐ ܓܘ ܬܘܪܟܝܐ) ܒܬܪ ܦܪ̈ܡܐ ܕܣܝܦܘ ܘܫܘܢܐܠܗܘܢ ܒܡܢܝܢܐ ܡܢ ܡܕܝܢ̈ܬܐ ܣܘܪ̈ܝܝܐ ܕܦܝܫܝ ܒܚܪܬܐ ܒܕܝܪܐ ܕܙܘܪ.
ܘܦܠܚܠܗ (ܐܣܟܢܕܪ) ܥܠ ܡܘܣܝܩܐ ܡܕܢܚܝܬܐ ܘܒܨܐܠܗ ܒܬܪ ܥܩܪ̈ܗܿ ܘܟܡ ܟܦܫܠܗܿ ܘܫܢܐܠܗܿ ܡܢ ܝܪܬܘܬܐ ܣܦܘܬܢܝܬܐ ܠܟܬܝܒܝܬܐ، ܘܦܪܝܫܐܝܬ ܒܡܢܕܝ ܕܐܝܬܠܗ ܐܣܘܪܐ ܒܡܘܣܝܩܐ ܣܘܪܝܝܬܐ، ܘܩܝܡܠܗ ܒܡܢܝܢܐ ܡܢ ܕܪ̈ܫܝܬܐ ܘܦܘܠܚܢ̈ܐ ܡܘܣܝܩܝ̈ܐ ܘܒܘܨܝ̈ܐ ܓܘ ܩܝܢ̈ܬܐ ܣܘܪ̈ܝܝܐ ܐܢܝ ܕܟܡ ܣܓܼܠܢܝܗܝ.
ܘܦܝܫ ܕܟܝܪܐ، ܕܡܘܣܝܩܘܪܐ ܡܫܢܝܐ ܣܝܡܠܗ ܒܡܬܚܐ ܕܡܐܙܠܬܗ ܐܡܢܝܬܐ ܡܢܝܢܐ ܡܢ ܦܘܠܚܢ̈ܐ ܐܢܢܩܝ̈ܐ ܘܡܢܝܗܝ ( الثلاثي الوتري، كنشرتو العود وكنشرتو التشيلو)، ܘܟܬܒܠܗ ܡܘܣܝܩܐ ܨܝܪܘܬܢܝܬܐ ܕܫܫܠܬܐ ܐܫܛܪܝܬܐ (أعمدة النور، ܘܦܝܠܡܐ ܕ مار مارون )، ܘܐܦ ܗܕܟ ܣܝܡܠܗ ܡܘܣܝܩܐ ܕܒܐܡܐ ܝܘܢܢܝܐ (باخوسيات ليروبيديس)، ܘܡܘܩܪܒܠܗ ܡܢܝܢܐ ܡܢ ܙܘܝܚ̈ܐ ܡܘܣܝܩܝ̈ܐ ܓܘ ܣܘܝܕ، ܥܡ ܡܫܘܬܦܬܗ ܦܪܝܫܬܐ ܥܡ ܐܡܢܐ ܠܒܢܢܝܐ ܪܒܐ ( ܘܕܝܥ ܐܠܨܐܦܝ) ܫܢ̄ܬܐ ܕ(1974) ܒܙܘܝܚܐ ܕܝܘܢܝܣܟܘ ܗܘ ܦܝܫܠܗ ܥܒܝܕܐ ܓܘ ܒܝܪܘܬ ، ܘܡܘܩܪܒܠܗ ܓܘܗ ܡܢܝܢܐ ܡܢ ܙܡܝܪ̈ܬܐ ܥܡܡܝ̈ܐ ܣܘܪ̈ܝܝܐ.
