ܒܚܫܐ ܪܒܐ، ܡܩܪܒܐ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܦܪܨܘܦܐ ܕܡܕܒܪܢܗܿ ܓܘܢܝܐ ܘܟܕܝܪ̈ܗܿ ܘܫܕܬܢ̈ܗܿ، ܒܘܝܐܐ ܠܪܥܝܐ ܕܡܪܥܝܬܐ ܕܐܠܩܘܫ ܟܠܕܝܬܐ ܬܠܝܬܝ ܪ̈ܚܡܐ ܡܝܛܪܦܘܠܝܛܐ ܡܪܝ (ܦܘܠܘܣ ܬܐܒܬ ܚܒܝܒ)، ܗܘ ܕܫܘܢܐܠܗ ܠܓܢܘܢܐ ܫܡܝܢܐ، ܝܘܡ ܐܪܒܥܒܫܒܐ 18 ܚܙܝܪܢ 2025، ܒܥܘܡܪܐ ܕ(49) ، ܒܥܠܬܐ ܕܟܘܪܗܢܐ ܥܣܩܐ.
ܡܘܩܪܒܠܗ ܡܢܚܐ ܬܫܡܫܬܐ ܠܥܕܬܐ ܘܥܡܐ ܒܗܝܡܢܬܐ ܘܚܘܒܐ ܘܚܟܡܬܐ ܠܦܝܫܬܐ ܕܥܡܢ ܒܐܪܥܐ ܕܐܒܗ̈ܬܐ، ܓܘ ܡܐܙܠܬܐ ܗܝܡܢܘܬܢܝܬܐ ܡܠܝܬܐ ܒܡܘܗܒܬܐ ܘܕܒܚܬܐ ܕܓܝܢܐ، ܗܘ ܡܢܕܝ ܕܟܡ ܚܙܚܠܗ ܡܢܗ ܒܣܢܕܬܗ ܐܡܝܢܝܬܐ ܠܟܫܝܪ̈ܘܬܐ ܝܪ̈ܬܘܬܢܝܐ ܘܠܫܢܝ̈ܐ ܐܢܝ ܕܐܝܬܗ̄ܘܐܠܗܘܢ ܚܕ ܫܘܦܐ ܪܒܐ ܡܢ ܝܨܝܦ̈ܘܬܗ ܒܡܬܚܐ ܕܬܫܡܫܬܗ ܪܥܘܝܬܐ ܓܘ ܡܕܝܢ̄ܬܗ ܟܪܡܠܝܫ ܒܬܪ ܗܕܟ ܒܬܪ ܣܝܡ ܐܝܕܗ ܐܦܣܩܘܦܐ ܠܡܪܥܝܬܐ ܕܐܠܩܘܫ ܟܠܕܝܬܐ.
ܛܠܒܚ ܡܢ ܡܪܝܐ ܐܠܗܐ ܕܝܗ̄ܒܠ ܡܢܚܐ ܢܝܚܘܬܐ ܥܠܡܝܢܝܬܐ، ܘܡܒܗܪ ܥܠܗ ܢܘܗܪܗ ܐܡܝܢܝܐ، ܘܝܗ̄ܒܠ ܐ̄ܢܫܘ̈ܬܗ ܘܡܚܒܢ̈ܗ ܘܥܕܬܐ ܟܠܕܝܬܐ ܡܣܝܒܪܢܘܬܐ ܘܣܘܠܝܐ.
ܘܦܝܫ ܕܟܝܪܐ، ܡܪܝ (ܦܘܠܘܣ ܬܐܒܬ ܚܒܝܒ) ܗܘܐܠܗ ܝܘܡܐ ܕ 14 ܫܒܛ ܫܢ̄ܬܐ ܕ 1976، ܓܘ ܡܕܝܢ̄ܬܐ ܕܟܪܡܠܝܫ ܒܕܫܬܐ ܕܢܝܢܘܐ، ܐܝܬܠܗ ܣܗܕܘܬܐ ܕܒܟܠܘܪܝܘܣ ܓܘ ܝܘܠܦܢ ܐܪܥܐ ܡܢ ܒܝܬ ܨܘܒܐ ܕܡܘܨܠ، ܘܣܗܕܘܬܐ ܕܒܟܠܘܪܝܘܣ ܡܢ ܒܝܬ ܨܘܒܐ ܐܘܪܒܢܝܐ / ܠܝܣܐܢܣ ܝܘܠܦܢ ܐܒܗ̈ܬܐ-ܒܝܬ ܣܦܪܐ ܐܘܓܼܣܛܝܢܝܐ-ܠܐܬܝܪܢ-ܪܘܡܐ، ܘܝܕܥ ܗ̄ܘܐ ܠܫܢ̈ܐ ܣܘܪܝܝܐ ܘܥܪܒܝܐ ܘܐܝܛܠܝܐ ܘܐܢܓܠܝܙܝܐ، ܘܦܝܫܠܗ ܣܝܡܐ ܟܗܢܐ ܒܣܝܩܘܡ 25 ܬܡܘܙ ܫܢ̄ܬܐ 2008، ܘܩܢܐܠܗ ܕܪܓܼܐ ܕܟܘܪ ܐܦܣܩܘܦܘܬܐ ܫܢ̄ܬܐ 2018 ܓܘ ܡܕܝܢ̄ܬܗ ܟܪܡܠܝܫ، ܘܦܝܫܠܗ ܣܝܡܐ ܡܝܛܪܦܘܠܝܛܐ ܠܡܪܥܝܬܐ ܕܐܠܩܘܫ ܟܠܕܝܬܐ ܒܣܝܩܘܡ 18 ܬܫܪܝܢ ܬܪܝܢܐ ܫܢ̄ܬܐ ܕ 2022 .