ܒܠܒܘ̈ܬܐ ܡܠܝ̈ܐ ܡܢ ܚܫܐ ، ܫܒܩܚ ܒܫܝܢܐ ܐܕܝܘܡ ܩܕܝܫܘܬܗ ܕܦܦܐ (ܦܪܢܣܝܣ)، ܪܡܙܐ ܬܒܝܠܝܐ ܕܚܘܒܐ ܘܡܟܝܟܘܬܐ ܘܫܠܡܐ، ܒܫܘܢܝܗ ܚܣܝܪܐ ܒܪܢܫܘܬܐ ܚܕ ܩܠܐ ܨܦܝܐ ܡܥܕܪܢܐ ܕܡܣܟܝܢ̈ܐ، ܘܡܣܬܪܢܐ ܕܟܐܢܘܢܐ، ܘܩܪܐܠܗ ܠܕܘܪܫܐ ܘܪ̈ܚܡܐ ܒܝܢ ܬܘܕܝ̈ܬܐ ܘܥܡܡ̈ܐ، ܗܘ ܕܫܘܢܐܠܗ ܠܓܢܘܢܐ ܫܡܝܢܐ، ܒܨܦܪܐ ܕܝܘܡ ܬܪܝܢܒܫܒܐ 21 ܢܝܣܢ 2025، ܒܥܘܡܪܐ ܕ(88) ܫܢ̈ܐ.
ܘܒܥܕܢܐ ܕܫܒܩܚ ܒܫܝܢܐ ܓܘܗ ܚܕ ܪܡܙܐ ܪܘܚܢܝܐ ܪܒܐ، ܡܩܪܒܚ ܒܘܝ̈ܐܐ ܠܥܕܬܐ ܩܬܘܠܝܩܝܬܐ ܒܬܒܝܠ، ܘܠܥܕܬܢ ܩܬܘܠܝܩܝܬܐ ܒܐܬܪܐ، ܘܠܡܫܝܚܝ̈ܐ ܕܡܕܢܚܐ ܒܐܣܟܝܡܐ ܓܘܢܝܐ، ܘܠܟܠܝܗܝ ܡܗܝܡܢ̈ܐ ܐܢܝ ܕܫܩܠܗܘܢ ܡܢ ܚܟܡܬܗ ܘܡܟܝܟܘܬܗ، ܘܟܛܠܒܘܚ ܡܢ ܡܪܝܐ ܐܠܗܐ ܕܡܫܪܐܠܗ ܒܪ̈ܚܢܡܗ ܪܒܬܐ، ܘܕܝܗ̄ܒܠ ܠܥܕܬܐ ܚܝܠܐ ܒܗܢ ܓܕܫܐ ܡܡܪܥܢܐ.
ܘܠܦܘܬ ܡܘܕܥܢܘܬܐ ܪܘܫܡܝܬܐ ܡܢ ܦܬܝܟܢ، ܩܕܝܫܘܬܗ ܕܦܦܐ ܐܝܬܗ̄ܘܐܠܗ ܩܛܪ̈ܐ ܚܘܠܡܢܝ̈ܐ ܥܣܩ̈ܐ ܒܫܢ̈ܐ ܐ̄ܚܪ̈ܝܐ، ܡܢܝܗܝ ܪܐܬܢܝܘܬܐ ܚܪܝܦܐ ܒܥܠܬܐ ܕܗܢ ܟܘܪܗܢܐ ܦܝܫܠܗ ܓܘ ܒܝܬ ܟܪ̈ܝܗܐ ܒܝܪܚܐ ܐ̄ܚܪܝܐ.
ܘܦܝܫ ܕܟܝܪܐ، ܕܩܕܝܫܘܬܗ ܕܦܦܐ (ܦܪܢܣܝܣ) ܗܘܐܠܗ ܒܫܡܐ ܕ(ܚܘܪܚܝ ܡܐܪܝܘ ܒܝܪܓ̰ܘܠܝܘ) ܓܘ ܟܢܘܢ ܩܕܡܝܐ / ܫܢ̄ܬܐ ܕ 1936، ܘܝܠܗ ܦܦܐ ܕܥܕܬܐ ܩܬܘܠܝܩܝܬܐ ܒܣܕܝܪܘܬܐ ܕܬܪܬܝܢ ܡܐܐ ܘܫܬܝܢ ܘܫܬܐ (266) ܡܢ 13 ܐܕܪ 2013 ܗܠ ܫܘܢܝܗ ܒܣܝܩܘܡ 21 ܢܝܣܢ 2025 .