ܣܥܪܠܗܿ ܡܫܕܪܘܬܐ ܡܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ، ܝܘܡ ܬܪܝܢܒܫܒܐ 6 ܐܝܪ 2024 ، ܩܢܛܪܘܢ ܐܟܕܝܡܝܐ ܟܢܘܫܝܝܐ ܓܘ ܥܢܟܒܐ، ܠܡܩܪܒܬܐ ܕܗܘܢܝ̈ܐ ܒܕܟܪܐ ܕܬܫܥܣܪ ܠܫܬܐܣܬܗ، ܘܝܗ̈ܘܘ ܒܣܩܒܠܬܐ ܕܡܫܕܪܘܬܐ ܪܫ ܓܘܫܡܐ ܡܕܒܪܢܝܐ ܕܩܢܛܪܘܢ ” ܓ̰ܠܐܠ ܚܒܝܒ” ܘܡܢܝܢܐ ܡܢ ܗܕܡ̈ܐ ܕܓܘܫܡܐ ܡܕܒܪܢܝܐ.
ܘܩܘܠܣܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ”ܟܠܕܘ ܪܡܙܝ ܐܘܓܼܢܐ”، ܒܡܬܚܐ ܕܣܥܘܪܘܬܐ ܒܓܪܐ ܕܩܢܛܪܘܢ ܐܟܕܝܡܝܐ ܟܢܘܫܝܝܐ ܓܘ ܥܒܘܕܘ̈ܬܐ ܘܥܕܥܐܕ̈ܐ ܐܢܝ ܡܛܟܣܐܠܗܘܢ ܡܕܒܪܢܘܬܐ ܓܘܢܝܬܐ، ܘܫܘܪܪܠܗ ܥܠ ܐܢܢܩܝܘܬܐ ܕܥܘܕܪܢܐ ܒܝܢ ܫܘܬܐܣ̈ܐ ܕܥܡܢ ܓܘ ܥܒܘܕܘ̈ܬܐ ܐܢܝ ܕܫܒܩܝ ܥܡܢ ܕܕܒܩ ܒܐܪܥܗ، ܘܐܦ ܗܕܟ ܪܡܙܠܗ ܕܬܪ̈ܥܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܦܬܝܚ̈ܐܠܗܘܢ ܒܐܡܝܢܘܬܐ ܠܥܘܕܪܢܐ ܥܡ ܟܠܝܗܝ ܫܘܬܐܣ̈ܐ ܕܥܡܢ.
ܘܚܒܫܠܗܿ ܡܫܕܪܘܬܐ ܣܥܘܪܬܐ ܡܕܒܪܢܐ ܓܘܢܝܐ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ، ܘܡܕܒܪܢܝܬܐ ܕܒܝܬ ܐܪ̈ܟܐ ܣܘܪܝܝܐ “ܦܝܚܐܐ ܫܡܥܘܢ”، ܘܡܕܒܪܢܐ ܕܡܕܒܪܢܘܬܐ “ܦܘܐܐܕ ܫܡܥܘܢ”، ܘܡܢܝܢܐ ܡܢ ܫܕܬܢ̈ܐ ܕܡܕܒܪܢܘܬܐ، ܟܕ ܡܘܩܪܒܠܗܿ ܡܫܕܪܘܬܐ ܒܡܬܚܐ ܕܣܥܘܪܘܬܐ ܗܘܢܝ̈ܐ ܠܓܘܫܡܐ ܡܕܒܪܢܝܐ ܠܩܢܛܪܘܢ، ܘܒܥܐܠܗܿ ܠܗܘܢ ܡܢܬܝܬܐ ܘܢܨܝܚܘܬܐ ܠܬܫܡܫܬܐ ܕܥܡܢ.
