ܫܘܬܦܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܝܘܡ ܥܪܘܒܬܐ 15 ܐܒ 2025، ܒܙܘܝܚܐ ܚܘܬܡܝܐ ܕܟܙܝܪܘܬܐ ܕܣܗܕܐ (ܙܝܥ̄ܐ) ܬܡܢܥܣܝܪܝܬܐ، ܗܝ ܕܟܦܫܠܗ ܡܘܪܝܗܿ ܚܘܬܡܝܐ ܬܪܝܢ ܝܗܠ̈ܐ ( ܢܐܠܐ × ܠܐܡܣܘ)، ܗܝ ܕܦܝܫܠܗܿ ܥܒܝܕܬܐ ܒܦܢܝܬܐ ܕܢܗܠܐ ܒܗܘܦܪܟܝܐ ܕܕܗܘܟ.
ܘܚܘܬܬܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܡܡܠܗ، ܒܙܘܝܚܐ ܚܘܬܡܝܐ ܕܟܙܝܪܘܬܐ، ܕܢܗܠܐ ܦܝܫܐ ܡܚܘܫܒܢܬܐ ܚܕ ܪܕܫܐ ܪܒܐ ܒܥܘܡܩܐ ܕܘܪ̈ܝܕܐ ܘܢܛܪܬܐ ܕܗܝܝܘܬܐ ܘܝܪܬܘܬܐ، ܘܚܘܬܬܠܗ ܥܠ ܓܪܐ ܕܡܕܒܪܢܘܬܐ ܕܗܘܝܐ ܩܪܝܒܬܐ ܡܢ ܩܘܪ̈ܝܐ ܘܦܢܝ̈ܬܐ ܠܣܢܕܬܐ ܕܟܫܝܪ̈ܘܬܐ ܡܪ̈ܕܘܬܢܝܐ ܘܐܬܠܝܛܝ̈ܐ.
ܘܡܘܒܝܢܗ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܕܥܠܝܡܘܬܐ ܝܠܗܿ ܐܣܐ ܠܦܝܫܬܐ ܕܐܝܡܐ ܥܡܐ ܘܐܡܝܢܝܘܬܗ، ܗܘ ܡܢܕܝ ܕܫܒܩ ܟܠܝܗܝ ܕܛܥܢܝ ܡܫܬܐܠܢܘܬܐ ܕܣܢܕܬܗܿ ܘܥܒܕܬܗܿ ܡܨܝܢܬܐ، ܘܒܚܘܬܡܐ ܕܡܡܠܗ ܛܘܝܡܢܗ ܠܟܠ ܥܡܠ̈ܐ ܕܡܘܩܪܒܠܗ ܚܘܝܕܐ ܕܝܠܘܦ̈ܐ ܘܥܠܝܡܘܬܐ ܟܠܕܘ ܐܬܘܪܝܐ ܘܒܝܬ ܣܡܟܐ ܕܢܗܠܐ ܐܬܠܝܛܝܐ ܒܛܘܟܣܐ ܕܟܙܝܪܘܬܐ ܘܢܨܝܚܘܬܗܿ.
ܘܒܚܘܬܡܐ ܕܟܙܝܪܘܬܐ، ܦܝܫܠܗܘܢ ܡܦܘܠܓ̄ܝܐ ܕܫܢ̈ܐ ܘܟܣ̈ܐ ܥܠ ܝܗܠ̈ܐ ܢܨܝܚ̈ܐ ܒܟܙܝܪܘܬܐ، ܗܝ ܕܦܝܫܠܗܘܢ ܡܛܝܒ̈ܐ ܥܠܗܿ ܡܫܕܪ̈ܘܬܐ ܬܘܕܝܬܢܝ̈ܐ ܘܓܒܝ̈ܐ ܘܟܢܫܝ̈ܐ ܡܢ ܦܢܝ̈ܬܐ ܡܫܚܠܦ̈ܐ ܕܥܡܢ ܒܕܗܘܟ.
