ܫܘܬܦܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܒܪܡܫܐ ܕܝܘܡ ܚܕܒܫܒܐ 14 ܐܝܠܘܠ 2025، ܒܙܘܝܚܐ ܚܘܬܡܝܐ ܕܥܒܘܕܘ̈ܬܐ ܕܥܕܥܐܕܐ ܕܥܐܕܐ ܕܨܠܝܒܐ ܗܘ ܕܟܡ ܛܟܣܐܠܗ ܡܛܟܣܬܐ ܕܫܩܠܒܐܕ ܕܡܪܒܝܬܐ ܕܥܠܝܡ̈ܐ ܘܒܒܘܪܟܬܐ ܕܡܪܥܝܬܐ ܕܣܗܕ̈ܐ ܕܥܕܬܐ ܟܠܕܝܬܐ ܒܫܩܠܒܐ.
ܘܫܘܪܐܠܗܘܢ ܥܒܘܕܘ̈ܬܐ ܕܙܘܝܚܐ، ܒܡܡܠܐ ܕܪܫ ܡܛܟܣܬܐ ܕܫܩܠܒܐܕ ܠܡܪܒܝܬܐ ܕܥܠܝܡ̈ܐ (ܣܒܝ ܡܬܝ ܚܘܪܐܢܝ)، ܗܘ ܕܡܘܩܪܒܠܗ ܒܡܡܠܗ ܩܘܒܠܛܝܒܘܬܗ ܠܟܠ ܡܢ ܣܢܕܠܗ ܘܫܘܬܦܠܗ ܒܢܨܝܚܘܬܐ ܕܥܕܥܐܕܐ ܒܝܘܪܟܐ ܕ(14) ܝܘܡ̈ܐ.
ܒܬܪ ܗܕܟ ܐ̄ܬܝܠܗ ܡܡܠܐ ܕܪܥܝܐ ܕܥܕܬܐ ܕܣܗܕ̈ܐ ܒܫܩܠܒܐ ܐܒܐ (ܐܢܝܣ ܝܥܩܘܒ)، ܗܘ ܬܢܐܠܗ ܓܘܗ ܠܣܘܟܠ̈ܐ ܕܨܠܝܒܐ ܘܐܢܢܩܝܘܬܐ ܕܥܐܕܐ ܕܨܠܝܒܐ ܒܚܝܘܬܐ ܕܡܗܝܡܢ̈ܐ، ܒܬܪ ܗܕܟ ܡܘܩܪܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܡܡܠܗ ܗܘ ܕܫܘܪܪܠܗ ܓܘܗ : (ܘܠܝܬܐܝܠܗܿ ܥܠܢ ܣܢܕܬܐ ܕܥܠܝܡ̈ܐ ܘܟܫܝܪܘܬܐ ܡܪܕܘܬܢܝܬܐ ܒܟܠ ܦܢܝ̈ܬܐ ܕܥܡܢ، ܘܠܒܝܒܘܬܐ ܕܫܪ̈ܝܬܐ ܐܢܝ ܕܝܗ̄ܒܝ ܚܝܠܐ ܠܗܝܝܘܬܢ ܘܝܪܬܘܬܢ)، ܘܫܘܪܪܠܗ :(ܟܦܫܬܐ ܕܐ̄ܢܫ̈ܐ ܒܚܘܒܐ ܒܥܐ ܥܡܠܐ ܘܦܘܠܚܢܐ ܫܪܝܪܐ، ܐܠܐ ܦܠܝܓܼܘܬܐ ܠܐ ܒܥܝܐ ܐܠܐ ܚܕܟܡܐ ܪ̈ܦܦܐ ܠܦܪܣܬܐ ܕܣܢܝܘܬܐ ܘܦܠܝܓܼܘܬܐ).
ܘܩܘܠܣܠܗ (ܐܘܓܼܢܐ) ܒܚܘܬܡܐ ܕܣܘܘܕܗ ܥܠ ܓܪܐ ܕܩܝܡܢ̈ܐ ܒܛܘܟܣܐ ܕܥܕܥܐܕܐ ܒܗܕ ܡܕܝܢ̄ܬܐ ܬܫܥܝܬܢܝܬܐ، ܘܒܝܢ ܛܘܪ̈ܗܿ ܣܗܕ̈ܐ ܥܠ ܟܠܝܬܐ ܕܗܢ ܥܡܐ، ܘܫܘܪܪܠܗ : (ܥܕܥܐܕܐ ܟܦܫܠܗ ܒܝܢ ܪܚܩܘܬܐ ܪܘܚܢܝܬܐ ܐܝܟ ܪܡܙܐ ܕܙܟܘܬܐ ܥܠ ܡܘܬܐ ܘܚܛܝܬܐ، ܕܗܘܝܐ ܙܟܘܬܐ ܥܠ ܐܢܝܘܬܢ).
ܘܒܬܪ ܡܡܠܐ، ܦܝܫܠܗܿ ܡܘܩܪܒܬܐ ܓܠܚܬܐ ܡܡܬܠܢܝܬܐ ܫܬܩܬܐ (ܦܢܬܘܡܐܝܡ) ܒܝܕ ܥܠܝܡ̈ܐ ܘܥܠܝܡ̈ܬܐ ܕܫܩܠܒܐ ܘܡܦܩܢܘܬܐ ܕ(ܕܝܠܐܢ ܚܠܝܠ ܚܘܪܐܢܝ)، ܒܬܪ ܗܕܟ ܦܝܫܠܗܘܢ ܡܘܩܪܒܐ ܪ̈ܩܕܐ ܝܪ̈ܬܘܬܢܝܐ ܡܫܚܠܦ̈ܐ ܒܝܕ ܝܗܠܐ ܣܘܪܝܝܐ ܕܐܡܢ̈ܐ ܢܩܝܦܐ ܠܡܕܒܪܢܘܬܐܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܐܢܝ ܕܡܘܙܝܕܠܗܘܢ ܐܐܪ̈ܐ ܐܘܡܢܝ̈ܐ ܘܝܪ̈ܬܘܬܢܝܐ ܦܪ̈ܝܫܐ ܒܙܘܝܚܐ.
ܘܒܚܘܬܡܐ ܕܥܕܥܐܕܐ، ܦܝܫܠܗܘܢ ܡܦܘܠܓ̄ܝ̈ܐ ܕܫܢ̈ܐ ܕܡܝܩܪܢܘܬܐ ܥܠ ܫܘܬܦ̈ܐ ܘܝܗܠ̈ܐ ܩܪ̈ܝܡܐ ܒܥܒܘܕܘ̈ܬܗ ܐܬܠܝܛܝ̈ܐ ܘܐܘܡܢܝ̈ܐ ܘܝܪ̈ܬܘܬܢܝܐ، ܒܛܘܝܒܐ ܪܘܫܡܝܐ ܘܟܢܫܝܐ ܪܒܐ ܒܫܘܬܦܬܐ ܕܡܢܝܢܐ ܡܢ ܡܫܬܐܠܢ̈ܐ ܕܘܟܬܢܝ̈ܐ.
ܘܦܝܫ ܕܟܝܪܐ، ܕܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܕܫܘܬܦ ܗ̄ܘܐܠܗ ܝܘܡ ܥܪܘܒܬܐ 12 ܐܝܠܘܠ 2025، ܒܦܘܬܚܐ ܕܒܝܬ ܓܠܚܐ ܕܡܐܟܘܠܝ̈ܬܐ ܥܡܡܝ̈ܐ ܘܦܘܠܚܢ̈ܐ ܕܐܝܕܐ، ܗܘ ܕܟܡ ܛܟܣܐܠܗ ܡܛܟܣܬܐ ܕܫܩܠܒܐܕ ܕܡܪܒܝܬܐ ܕܥܠܝܡ̈ܐ ܒܥܘܕܪܢ ܥܡ ܒܝܬ ܣܡܟܐ ܕܠܝܐܠܝ ܣܦ̮ܿܝܢ ܒܝܬܝܐ ܒܪܘܣܬܩܐ ܕܫܩܠܒܐ، ܡܢ ܥܒܘܕܘ̈ܬܐ ܕܥܕܥܐܕܐ ܕܥܐܕܐ ܕܨܠܝܒܐ، ܗܘ ܕܩܝܡܐ ܓܘܗ ܥܕܬܐ ܟܠܕܝܬܐ ܕܫܩܠܒܐ.
