ܫܘܬܦܠܗܿ ܡܫܕܪܘܬܐ ܡܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܝܘܡ ܥܪܘܒܬܐ 29 ܐܒ 2025، ܒܙܘܝܚܐ ܚܘܬܡܝܐ ܕܥܒܘܕܘ̈ܬܐ ܕܥܕܥܐܕܐ ܕܡܪܝ ܓܝܘܪܓܝܣ ܡܪܕܘܬܢܝܐ ܘܐܬܠܝܛܝܐ ܬܫܝܥܝܐ ܕܫܢ̄ܬܐ ܕ 2025، ܐܢܝ ܕܟܦܫܠܗܘܢ ܡܘܪܝܗ ܚܘܬܡܝܐ ܬܪܝܢ ܝܗܠ̈ܐ ( ܕܝܢܐ ܘܢܗܠܐ)، ܗܘ ܕܦܝܫܠܗ ܥܒܝܕܐ ܒܦܢܝܬܐ ܕܕܝܢܐ ܒܪܘܣܬܩܐ ܕܣܘܪܐܢ ܒܗܘܦܪܟܝܐ ܕܐܪܒܝܠ.
ܘܚܒܫܠܗܿ ܡܫܕܪܘܬܐ ܕܡܕܒܪܢܘܬܐ، ܡܕܒܪܢܐ ܓܘܝܢܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܘܡܕܒܪܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܡܝܩܪܐ (ܒܪܢܐܪܕ ܝܘܣܦ)، ܘܛܘܝܡܢܗ (ܐܘܓܼܢܐ) ܓܘ ܒܘܝܢܗ ܠܫܘܦܢ ܠܓܪܐ ܕܩܝܡܢ̈ܐ ܥܠ ܥܕܥܐܕܐ، ܘܦܪܝܫܐܝܬ ܓܪܐ ܕܚܝܘܪܐ ܓܘܢܝܐ ܥܠ ܥܕܥܐܕܐ ܘܪܥܝܐ ܕܥܕܬܐ ܕܡܪܝ ܓܝܘܪܓܝܣ ܓܘ ܕܝܢܐ ܐܒܐ (ܝܬܪܘܢ ܝܘܢܢ)، ܘܩܘܠܣܠܗ ܒܝܬ ܥܕܢܐ ܒܓܪܐ ܕܐ̄ܢܫ̈ܐ ܕܕܝܢܐ ܒܩܒܠܬܝܗܝ ܒܐܪܚܘܬܐ ܠܡܫܘܬܦܢ̈ܐ ܓܘ ܥܕܥܐܕܐ ܒܝܘܪܟܐ ܕܝܘܡ̈ܐ ܕܥܒܘܕܘ̈ܬܗ.
ܘܒܚܘܬܡܐ ܕܥܕܥܐܕܐ، ܦܝܫܠܗܘܢ ܡܦܘܠܓ̄ܝ̈ܐ ܕܫܢ̈ܐ ܘܟܣ̈ܐ ܥܠ ܝܗܠ̈ܐ ܩܪ̈ܝܡܐ ܓܘ ܥܒܘܕܘ̈ܬܗ ܐܬܠܝܛܝ̈ܐ، ܘܦܝܫܠܗ ܚܙܝܐ ܥܕܥܐܕܐ ܛܘܝܒܐ ܟܢܫܝܐ ܡܢ ܦܢܝ̈ܬܐ ܡܫܚܠܦ̈ܐ ܕܥܡܢ ܘܫܘܬܦܬܐ ܕܡܢܝܢܐ ܡܢ ܡܫܬܐܠܢ̈ܐ ܕܘܟܬܢܝ̈ܐ.
ܘܫܘܬܦ ܗ̄ܘܐܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܝܘܡ ܬܠܬܒܫܒܐ 26 ܐܒ 2025، ܒܥܒܘܕܘ̈ܬܐ ܕܝܘܡܐ ܫܒܝܥܝܐ ܡܢ ܥܕܥܐܕܐ ܕܡܪܝ ܓܝܘܪܓܝܣ ܡܪܕܘܬܢܝܐ ܐܬܠܝܛܝܐ ܬܫܝܥܝܐ ، ܒܫܘܬܦܬܐ ܦܪܝܫܬܐ ܡܢ ܡܕܒܪܢܘܬܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܘܒܝܬ ܐܪ̈ܟܐ ܣܘܪܝܝܐ، ܓܘ ܒܝܬ ܓܠܚܐ ܕܠܒܘܫ̈ܐ ܥܡܡܝ̈ܐ ܘܡܐܢ̈ܐ ܝܪ̈ܬܘܬܢܝܐ ܘܛܒܝ̈ܥܬܐ ܣܘܪ̈ܝܝܐ، ܗܘ ܕܢܝܫܗ ܗ̄ܘܐܗ̄ܘܐ ܓܠܚܬܐ ܕܝܪܬܘܬܢ ܠܝܘܒܠ̈ܐ ܥܠܝܡܝ̈ܐ ܘܝܨܘܦ̈ܐ ܓܘܗܿ، ܥܡ ܫܘܬܦܬܐ ܕܝܗܠܐ ܣܘܪܝܝܐ ܕܐܡܢ̈ܐ ܢܩܝܦܐ ܠܡܕܒܪܢܘܬܐ ܒܙܘܝܚܐ ܕܦܘܬܚܐ ܕܥܕܥܐܕܐ ܒܣܝܩܘܡ 20 ܐܒ ܩܐܡܝܐ.
ܘܦܝܫ ܕܟܝܪܐ، ܕܥܕܥܐܕܐ ܕܡܪܝ ܓܝܘܪܓܝܣ ܡܪܕܘܬܢܝܐ ܘܐܬܠܝܛܝܐ ܒܢܘܣܟܗ ܬܫܝܥܝܐ، ܫܘܪܐܗ̄ܘܐܠܗ ܒܣܝܩܘܡ 20 ܐܒ ܩܐܡܝܐ، ܗܘ ܚܒܫܠܗ ܟܫܝܪ̈ܘܬܐ ܐܬܠܝܛܝ̈ܐ ܘܡܪ̈ܕܘܬܢܝܐ ܘܐܡܢܝ̈ܐ ܡܫܚܠܦ̈ܐ، ܒܫܘܬܦܬܐ ܕܥܠܝܡܘܬܐ ܕܥܡܢ ܡܢ ܬܪܘܝܗܝ ܓܢܣ̈ܐ ܘܡܢ ܦܢܝ̈ܬܐ ܡܫܚܠܦ̈ܐ ܕܐܝܬܘܬܢ ܘܠܡܬܚܐ ܕܥܣܪܐ ܝܘܡ̈ܐ.
