ܡܫܘܬܦܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܝܘܡ ܬܠܬܒܫܒܐ 5 ܐܒ 2025، ܓܘ ܚܘܪ̈ܩܢܐ ܕܩܒܪܬܐ ܘܥܢܝܕ̈ܐ ܕܡܛܐܠܢܐ ܬܒܝܠܝܐ ܩܕܝܡܐ ܘܡܢܗܪܢܐ ܐܬܠܝܛܝܐ ܡܫܡܗܐ (ܫܕܪܐܟ ܝܘܣܦ)، ܚܘܪ̈ܩܢܐ ܕܦܝܫܠܗܘܢ ܥܒܝܕܐ ܓܘ ܥܕܬܐ ܕܡܪܝ ܝܘܚܢܢ ܡܥܡܕܢܐ ܕܥܕܬܐ ܕܡܕܢܚܐ ܐܬܘܪܝܬܐ ܒܪܘܣܬܩܐ ܕܥܢܟܒܐ ܒܗܘܦܪܟܝܐ ܕܐܪܒܝܠ.
ܘܒܬܪ ܚܘܪ̈ܩܢܐ ܥܕܬܢܝ̈ܐ ܘܬܘܕܝܬܢܝ̈ܐ، ܦܝܫܠܗ ܩܒܝܪܐ ܡܢܚܐ ܒܒܝܬ ܩܒܘܪܐ ܕܣܒܼܪܐ ܓܘ ܥܢܟܒܼܐ، ܒܛܘܝܒܐ ܕܟܢܫܐ ܪܒܐ ܡܢ ܡܚܒܢ̈ܐ ܘܚܒܪ̈ܐ ܕܡܢܚܐ.
ܘܫܘܪܪܠܗ (ܐܘܓܼܢܐ) ܒܚܕܐ ܬܦܩܬܐ ܒܫܒܝܠ̈ܐ ܕܝܘܕܥܐ، (ܚܘܣܪܢܐ ܕ(ܫܕܪܐܟ) ܝܠܗ ܚܘܣܪܢܐ ܪܒܐ ܒܡܫܛܚܐ ܐܬܠܝܛܝܐ، ܘܠܒܢܝ̈ ܥܡܢ ܐܢܝ ܕܚܙܐܠܗܘܢ ܓܘܗ ܚܕ ܛܘܦܣܐ ܕܐ̄ܢܫܐ ܡܘܪܕܢܐ ܐܠܝܨܐ، ܘܦܪܨܘܦܝܘܬܐ ܚܒܝܒܬܐ ܗܘ ܕܠܐ ܫܒܩܠܗ ܚܕ ܝܘܡܐ ܬܪ̈ܥܝܬܗ)، ܘܐ̄ܡܪܗ : (ܐܕܝܘܡ، ܟܫܒܩܠܢ ܦܓܼܪܐ، ܐܠܐ ܩܠܗ ܘܨܘܪܬܗ ܘܡܥܒܕܢܘܬܗ ܒܕ ܦܝܫܝ ܡܬܘܡܝܐ ܒܥܘܗܕܢܐ، ܠܓܢ̄ܒ ܪ̈ܒܐ ܐܢܝ ܕܨܢܥܠܗܘܢ ܬܫܥܝܬܐ ܕܐܬܠܝܛܘܬܐ ܘܝܘܕܥܐ ܓܘ ܥܝܪܩ، ܐܝܟ (ܥܡܘ ܒܒܐ ) ܘܚܒܪ̈ܗ).
ܘܡܩܪܒܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܘܝܐܐ، ܠܡܛܐܠܢܐ ܬܒܝܠܝܐ ܩܕܝܡܐ ܘܡܢܗܪܢܐ ܐܬܠܝܛܝܐ ܡܫܡܗܐ ܘܚܕ ܡܢ ܡܫܡܗ̈ܐ ܕܐܬܠܝܛܘܬܐ ܥܝܪܩܝܬܐ، (ܫܕܪܐܟ ܝܘܣܦ)، ܗܘ ܕܫܘܢܐܠܗ، ܒܨܦܪܐ ܕܝܘܡ ܬܠܬܒܫܒܐ 5 ܐܒ 2025، ܒܥܠܬܐ ܕܟܘܪܗܢܐ ܥܣܩܐ.
ܘܦܝܫ ܕܟܝܪܐ، ܕܡܢܚܐ (ܫܕܪܐܟ ܝܘܣܦ)، ܗܘܐܠܗ ܒܣܝܩܘܡ 1 ܬܡܘܙ 1942 ܓܘ ܚܒܢܝܼܐ ܒܗܘܦܪܟܝܐ ܕܐܢܒܐܪ، ܡܛܐܠܢܐ ܥܝܪܩܝܐ ܩܕܝܡܐ ܓܘ ܩܢܛܪܘܢ ܕܣܪܛܐ ܕܡܨܥܐ، ܛܘܘܠܠܗ ܓܘ ܡܓܘܒܝܐ ܕܥܝܪܩ ܕܓܘܕܬܐ ܕܐܩܠܐ ܓܘ ܐ̄ܚܪ̈ܝܬܐ ܕܟܣܐ ܕܐܣܝܐ ܫܢ̄ܬܐ ܕ(1972)، ܘܛܘܘܠܠܗ ܠܡܓܘܒܝܐ ܐܬܪܢܝܐ ܒܝܢ ܬܪܬܝܢ ܫܢ̈ܐ (1965) ܘ(1973)، ܘܩܪܡܠܗ ܒܟܣܐ ܕܥܪ̈ܒܝܐ ܒܝܢ ܬܪܬܝܢ ܫܢ̈ܐ (1964) ܘ(1966)، ܒܬܪ ܗܕܟ ܦܣܩܠܗ ܫܠܝܘܬܐ (ܫܒܩܬܐ) ܒܬܪ ܡܨܦܝܢܘ̈ܬܐ ܕܟܣܐ ܕܬܒܝܠ (1974).
