ܫܘܬܦܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܝܘܡ ܚܡܫܒܫܒܐ 24 ܬܡܘܙ 2025، ܓܘ ܙܘܝܚܐ ܦܘܬܚܝܐ ܕܥܕܥܐܕܐ ܚܘܕܪܢܝܐ ܬܪܝܢܐ، ܗܘ ܕܡܓܪܫ ܬܠܬܐ ܝܘܡ̈ܐ ܓܘ ܦܢܝܬܐ ܕܒܪܘܐܪܝ ܒܐܠܐ ܒܗܘܦܪܟܝܐ ܕܕܗܘܟ.
ܘܚܒܫܠܗ ܙܘܝܚܐ ܕܦܘܬܚܐ ܡܩܪܒܬܐ ܕܡܡܠ̈ܐ ܕܩܒܠܬܐ ܒܫܝܢܐ ܒܬܪܝܢ ܠܫܢ̈ܐ ܣܘܪܝܝܐ ܘܩܘܪܕܝܐ ܘܡܡܠܐ ܕܩܘܒܠܛܝܒܘܬܐ ܠܪ̈ܥܘܬܐ ܘܣܢܕܢ̈ܐ ܕܥܕܥܐܕܐ، ܥܡ ܡܡܠܐ ܕܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܗܘ ܕܩܒܠܗ ܓܘܗ ܒܫܝܢܐ ܒܩܝܡܢ̈ܐ ܥܠ ܥܕܥܐܕܐ، ܘܟܠ ܡܢ ܫܘܬܦܠܗ ܒܢܨܝܚܘܬܗ، ܡܢ ܒܢܝ̈ ܓܘܝ̈ܐ ܕܐܬܪܐ ܘܓܠܘܬܐ، ܘܫܘܪܪܠܗ ((ܐ̄ܣܪܬܘܟܢ ܒܝܪܬܘܬܘܟܢ، ܒܠܫܢܘܟܢ، ܒܡܪܕܘܬܘܟܢ، ܝܠܗ ܥܒܕܐ ܕܠܩܘܒܠܝܐ ܥܠܝܐ، ܘܩܠܐ ܕܟܐܡܪ ܠܥܠܡܐ ܐܚܢܝ ܦܝܫ̈ܐܗ̄ܘܚ، ܘܐܚܢܝ ܡܚܒܘܚ ܚܝܘܬܐ)).
ܘܪܡܙܠܗ (ܐܘܓܼܢܐ) : (ܕܢܛܪܬܐ ܕܩܘܪ̈ܝܢ ܘܦܢܝܬܝ̈ܢ ܝܠܗܿ ܡܫܬܐܠܢܘܬܢ ܟܠܢ)، ܘܫܘܪܪܠܗ ܒܝܬ ܥܕܢܐ ܕ(ܕܩܘܪ̈ܝܐ ܠܐܝܠܗܘܢ ܫܘܦ̈ܐ ܒܠܚܘܕ، ܐܠܐ ܪ̈ܘܚܬܐ ܒܚܝܐ ܓܘܢ).
ܘܚܒܫܠܗ ܙܘܝܚܐ ܐܦ ܗܕܟ، ܡܡܠܐ ܕܐܦܣܩܘܦܐ ܕܕܗܘܟ ܘܢܝܢܘܐ ܕܥܕܬܐ ܕܡܕܢܚܐ ܐܬܘܪܝܬܐ ܡܪܝ (ܐܒܪܣ ܝܘܚܢܢ)، ܘܡܡܠܐ ܕܗܕܡܐ ܕܦܪܠܡܢ ܕܩܠܝܡܐ ܕܟܘܪܕܣܬܢ ܕܟܬܘܪ (ܓ̰ܝܡܣ ܗܣܕܘ ܗܝܕܘ)، ܥܡ ܡܡܠܐ ܕܕܘܟܬܢܝܘܬܐ ܕܓܒܐ ܕܝܡܘܩܪܛܝܐ ܟܘܪܕܣܬܢܝܐ ܓܘ ܟܐܢܝ ܡܐܣܝ.
ܘܦܝܫܠܗܘܢ ܡܛܝܒ̈ܐ ܠܙܘܝܚܐ ܕܦܘܬܚܐ ܕܥܕܥܐܕܐ، ܡܫܕܪ̈ܘܬܐ ܪ̈ܘܫܡܝܐ ܘܓܒܝ̈ܐ ܘܬܘܕܝܬܢܝ̈ܐ ܘܟܢܫܝ̈ܐ ܡܢ ܦܢܝ̈ܬܐ ܡܫܚܠܦ̈ܐ ܕܐܝܬܘܬܐ ܕܥܡܢ ܒܐܬܪܐ ܘܓܠܘܬܐ.
ܘܦܝܫ ܕܟܝܪܐ، ܕܥܕܥܐܕܐ ܚܘܕܪܢܝܐ ܬܪܝܢܐ ܚܒܫ ܒܝܘܡ̈ܬܗ ܬܠܬܐ، ܥܒܘܕܘ̈ܬܐ ܡܪ̈ܕܘܬܢܝܐ ، ܐܘܡܢܝ̈ܐ، ܝܪ̈ܬܘܬܢܝܐ ܘܐܬܠܝܛܝ̈ܐ، ܥܡ ܢܘܩܙ̈ܐ ܙܡܝܪ̈ܝܐ ܕܟܡ ܡܩܪܒܝܠܗܘܢ ܡܢܝܢܐ ܡܢ ܐܡܢ̈ܐ ܕܥܡܢ ܡܢ ܓܘܝ̈ܐ ܕܐܬܪܐ ܘܐܬܝܢ̈ܐ ܡܢ ܐܬܪ̈ܘܬܐ ܕܓܠܘܬܐ.
