ܡܫܘܬܦܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ܓܘ ܚܘܪ̈ܩܢܐ ܕܩܒܪܬܐ ܕܟܬܘܒܐ ܘܡܠܦܢܐ ܡܝܬܪܐ (ܢܘܪܝ ܦܛܪܘܣ ܥܛܘ) ، ܒܨܦܪܐ ܕܐܪܒܥܒܫܒܐ 30 ܐܒ 2023 ، ܒܥܕܬܐ ܕܝܡܐ ܕܥܘܕܪܢܐ ܐܡܝܢܝܐ ܓܘ ܪܘܣܬܩܐ ܕܥܢܟܒܐ ܒܐܪܒܝܠ.
ܘܦܝܫܠܗ ܡܛܝܒܐ ܠܚܘܪ̈ܩܢܐ ܕܩܒܪܬܐ ܘܙܝܪܐ ܕܡܘܒܠܢܘܬܐ ܘܛܘܦܝ̈ܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܡܝܩܪܐ ( ܐܢܘ ܓ̰ܘܗܪ ܥܒܕܘܟܐ) ، ܘܩܝܡܩܡܐ ܕܪܘܣܬܩܐ ܕܥܢܟܒܐ ܡܝܩܪܐ (ܪܐܡܝ ܢܘܪܝ ܣܝܐܘܫ) ܘܟܢܫܐ ܡܢ ܡܚܒܢ̈ܐ ܘܚܒܪ̈ܐ ܕܚܣܝܐ.
ܘܦܝܫ ܕܟܝܪܐ، ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܥܒܕܠܗܿ ܒܘܝܐܐ ܠܟܬܘܒܐ ܘܡܠܦܢܐ ܡܝܬܪܐ ܘܦܪܠܡܢܝܐ ܩܕܝܡܐ (ܢܘܪܝ ܦܛܪܘܣ ܥܛܘ)، ܗܘ ܕܫܘܢܐܠܗ ܠܓܢܘܢܐ ܫܡܝܢܐ ܒܪܡܫܐ ܕܬܠܬܒܫܒܐ 29 ܐܒ 2023 ܓܘ ܡܕܝܢ̄ܬܗ ܥܢܟܒܐ.
