ܩܝܡܠܗܿ ܡܫܕܪܘܬܐ ܡܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ، ܝܘܡ ܚܕܒܫܒܐ 11 ܐܝܪ 2025، ܒܣܥܘܪܘܬܐ ܕܚܘܕܪܐ ܕܟܪܟܝܘܬܐ ܕܥܢܟܒܐ ، ܠܡܩܪܒܬܐ ܕܗܘܢܝ̈ܐ ܘܒܪ̈ܟܝܬܐ ܠܡܕܒܪܢܐ ܚܕܬܐ ܒܦܘܪܣܐ ܕܫܩܠܬܗ ܠܡܫܬܐܠܢܘܬܐ ܘܫܪܝܬܗ ܒܦܘܠܚܢ̈ܗ ܚܕ̈ܬܐ.
ܘܚܒܫܠܗܿ ܡܫܕܪܘܬܐ ܣܥܘܪܬܐ ܡܕܒܪܢܐ ܓܘܢܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܘܡܕܒܪܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܡܝܩܪܐ (ܒܪܢܐܪܕ ܝܘܣܦ) ܘܡܢܝܢܐ ܡܢ ܫܕܬܢ̈ܐ ܕܡܕܒܪܢܘܬܐ، ܟܕ ܡܘܩܪܒܠܗܿ ܡܫܕܪܘܬܐ ܗܘܢܝ̈ܐ ܘܒܪ̈ܟܝܬܐ ܠܡܕܒܪܢܐ ܚܕܬܐ ܡܲܚܵܪܵܐ (ܐܪܝ ܓܪܝܒ ܩܐܩܘܙ) ܒܦܘܪܣܐ ܕܫܩܠܬܗ ܠܡܫܬܐܠܢܘܬܐ، ܘܒܥܐܠܗܘܢ ܠܗ ܢܨܝܚܘܬܐ ܘܡܢܬܝܬܐ ܓܘ ܦܘܠܚܢ̈ܗ ܠܬܫܡܫܬܐ ܕܥܢܟܒܐ ܘܐ̄ܢܫ̈ܗܿ.
ܘܫܘܪܪܠܗܘܢ ܬܪܘܝܗܝ ܓܢ̄ܒܢ̈ܐ ܒܡܬܚܐ ܕܬܦܩܬܐ ܥܠ ܐܢܢܩܝܘܬܐ ܕܥܘܕܪܢܐ ܡܫܘܬܦܐ ܒܝܢ ܬܪܘܝܗܝ ܓܢ̄ܒܢ̈ܐ ܓܘ ܥܒܘܕܘܗܬܐ ܟܢܘܫܝܝ̈ܐ ܡܫܚܠܦ̈ܐ ܐܢܝ ܡܛܟܣܐܠܗܘܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܘܪܡܙܠܗ (ܐܘܓܼܢܐ) ܓܘ ܣܘܘܕܗ ܕܬܪ̈ܥܐ ܕܡܕܒܪܢܘܬܐ ܓܘܢܝܬܐ ܦܬܝܚ̈ܐܠܗܘܢ ܒܐܡܝܢܘܬܐ ܠܥܘܕܪܢܐ ܥܡ ܟܠ ܫܘܬܐܣ̈ܐ ܠܛܘܪܢܬܐ ܕܩܐܡ ܡܪܕܘܬܢܝܐ ܕܥܡܢ.
ܘܦܝܫ ܕܟܝܪܐ، ܕܡܲܚܵܪܵܐ (ܐܪܝ ܓܪܝܒ ܩܐܩܘܙ)݂ ܝܠܗ ܡܢ ܬܘܠܕ̈ܬܐ ܕܥܢܟܒܐ، ܘܐܝܬܠܗ ܣܗܕܘܬܐ ܕܒܟܠܘܪܝܘܣ ܓܘ ܡܚܪܘܬܐ ܕܐܘܪ̈ܚܬܐ ܘܓܫܪ̈ܐ ܡܢ ܒܝܬ ܨܘܒܐ ܕܐܪܒܝܠ ܬܩܢܝܐ.
