ܣܘܩܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܝܘܡ ܬܠܬܒܫܒܐ 14 ܬܫܪܝܢ ܩܕܡܝܐ 2025، ܒܒܢܝܢܐ ܕܡܕܒܪܢܘܬܐ ܒܪܘܣܬܩܐ ܕܥܢܟܒܐ، ܡܫܬܐܠܢܐ ܕܡܛܟܣܬܐ ܐܬܘܪܝܬܐ ܕܝܡܘܩܪܛܝܬܐ ܐܓܼܘܢܣܛܐ ܣܝܣܝܐ ܣܘܪܝܼܝܐ (ܓܒܼܪܐܝܠ ܡܘܫܐ).
ܘܕܪܫܠܗܘܢ ܬܪܘܝܗܝ ܓܢ̄ܒܢ̈ܐ ܒܣܘܘܕܝܗܝ ܩܐܡ ܕܥܡܢ ܒܥܝܪܩ ܘܣܘܪܝܼܐ، ܘܐܢܢܩܝܘܬܐ ܕܚܝܠܢܬܐ ܕܥܘܕܪܢܐ ܡܪܕܘܬܢܝܐ ܘܝܘܕܥܝܐ ܒܝܢ ܫܘܬܐܣ̈ܐ ܕܥܡܢ، ܘܐܡܝܢܝܘܬܐ ܕܦܘܠܚܢܐ ܡܫܘܬܦܐ ܠܢܛܪܬܐ ܕܗܝܝܘܬܐ ܘܝܪܬܘܬܐ ܘܠܫܢܐ، ܘܫܘܪܪܠܗ (ܐܘܓܼܢܐ) ܒܬܦܩܬܐ، ܕܬܪ̈ܥܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܦܬܝܚ̈ܐܝܠܗܘܢ ܠܥܘܕܪܢܐ ܥܡ ܟܠ ܦܪ̈ܨܘܦܐ ܘܫܘܬܐܣ̈ܐ ܕܝܠܢܝ̈ܐ ܒܥܡܢ، ܠܬܫܡܫܬܐ ܕܝܪܬܘܬܢ ܘܡܪܕܘܬܢ .
ܘܡܢ ܓܢ̄ܒܗ ܡܘܥܒܪܗ (ܡܘܫܐ)، ܗܘ ܐܬܝܢܐ ܡܢ ܣܘܪܝܼܐ ܒܚܕܐ ܣܥܘܪܘܬܐ ܠܐܪܒܝܠ ܚܒܫܐ ܬܦܩܝ̈ܬܐ ܥܡ ܡܢܝܢܐ ܡܢ ܫܘܬܐܣ̈ܐ ܕܥܡܢ، ܡܘܥܒܪܗ ܥܠ ܐܝܩܪܗ ܠܦܘܠܚܢ̈ܐ ܕܡܩܪܒܐܠܗܘܢ ܡܕܒܪܢܘܬܐ ܓܘܢܝܬܐ ܒܓܝܓܠܐ ܡܪܕܘܬܢܝܐ ܘܢܛܪܬܐ ܕܝܪܬܘܬܐ ܕܥܡܢ، ܘܩܘܠܣܠܗ ܒܝܬ ܥܕܢܐ ܥܠ ܟܫܝܪ̈ܘܬܐ ܕܩܝܡܐ ܓܘܝܗܝ ܠܓܠܝܬܐ ܕܗܝܝܘܬܢ ܡܪܕܘܬܢܝܬܐ ܒܦܢܝܬܐ.
