ܫܘܪܐܠܗܘܢ، ܒܪܡܫܐ ܕܐܪܒܥܒܫܒܐ 30 ܬܡܘܙ 2025، ܥܒܘܕܘ̈ܬܐ ܕܥܕܥܐܕܐ ܕܐܡܢܐ ܣܘܟܡܝܐ، ܗܘ ܕܟܡ ܛܟܣܐܠܗ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ، ܒܥܘܕܪܢ ܥܡ ܝܗܠܐ ܕܫܡܫܐ ܠܡܡܬܠܢܘܬܐ ܘܒܝܬ ܣܡܟܐ ܕܥܠܝܡ̈ܐ ܕܥܢܟܒܐ ܟܢܘܫܝܝܐ، ܘܒܫܘܬܦܬܐ ܕܐܟܕܝܡܝܘܬܐ ܕܐܘܪܢܝܢܐ ܡܘܣܝܩܝܬܐ ܐܘܡܢܝܬܐ، ܐܢܝ ܒܕ ܡܓܪܫܝ ܥܒܘܕܘ̈ܬܗ ܡܬܚܐ ܕܬܪܝܢ ܝܘܡ̈ܐ ܥܠ ܓܢܢ̈ܐ ܕܒܝܬ ܣܡܟܐ ܕܥܠܝܡ̈ܐ ܕܥܢܟܒܐ ܟܢܘܫܝܝܐ ܒܥܢܟܒܐ.
ܘܫܘܪܐܠܗܘܢ ܥܒܘܕܘ̈ܬܐ ܕܥܕܥܐܕܐ ܒܡܡܠܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܟܡ ܡܩܪܒܠܗ ܡܕܒܪܢܐ ܓܘܢܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܗܘ ܕܫܘܪܪܠܗ ܓܘܗ ( ܘܠܐ ܥܠܢ ܐܕܝܘܡ، ܕܡܚܡܚ ܦܬܐ ܕܥܢܟܒܐ ܫܪܝܪܬܐ، ܘܗܘܚ ܫܪܝܪ̈ܐ ܥܠ ܬܫܥܝܬܗܿ، ܥܠ ܠܫܢܗ݂ܿ، ܥܠ ܐ̄ܢܫ̈ܗܿ، ܘܥܠ ܥܘܗܕܢܗܿ ܗܘ ܟܕܥܪ ܠܥܘܡܩܐ ܕܬܫܥܝܬܐ)، ܘܪܡܙܠܗ ܕ( ܐܚܢܝ ܐܕܝܘܡ ܟܦܬܚܚ، ܒܟܠ ܫܘܒܗܪܐ، ܒܝܬ ܓܠܚܐ ܣܘܟܡܝܐ ܩܕܡܝܐ ܒܥܢܟܒܐ ܐܝܟ ܨܪܚܬܐ ܕܐܡܢܐ ܘܟܠܝܬܐ، ܘܡܡܠܐ ܕܟܐܡܪ: ܐܚܢܝ ܠܟܼܐܗ̄ܘܚ، ܘܒܕ ܦܝܫܚ).
ܘܚܒܫܠܗ ܥܕܥܐܕܐ ܓܠܚܬܐ ܕܠܘܚ̈ܐ ܣܘܟܡܝ̈ܐ ܐܢܝ ܕܡܘܚܙܐܠܗܘܢ ܫܒܝܠܐ ܐܡܢܝܐ ܕܡܫܘܬܦܢ̈ܐ ܘܡܘܗܒܬܝܗܝ ܒܚܒܟܬܐ ܕܫܘܦܪܐ ܘܡܕܝܢܝܘܬܐ ܘܝܘܪܬܢܐ ܡܪܕܘܬܢܝܐ ܘܟܢܘܫܝܝܐ، ܥܡ ܓܠܚ̈ܐ ܐ̄ܚܪ̈ܢܐ ܕܡܓܫܡ̈ܐ ܓܠܝܦ̈ܐ ܘܡܩܕܬܐ ܥܠ ܩܝܣܐ، ܥܡ ܡܢܝܢܐ ܡܢ ܓܠܚ̈ܐ ܙܡܝܪ̈ܝܐ ܘܐܘܡܢܝ̈ܐ ܐܢܝ ܕܟܡ ܡܩܪܒܝܠܗܘܢ ܗܕܡ̈ܐ ܕܐܟܕܝܡܝܘܬܐ ܕܐܘܪܢܝܢܐ ܡܘܣܝܩܝܬܐ ܐܘܡܢܝܬܐ.
ܘܦܝܫܠܗܘܢ ܡܛܝܒ̈ܐ ܠܙܘܝܚܐ ܦܘܬܚܝܐ ܕܥܕܥܐܕܐ ܥܒܘܕܘ̈ܬܐ ܪ̈ܘܫܡܝܐ ܘܬܘܕܝܬܢܝ̈ܐ ܘܓܒܝ̈ܐ ܘܟܢܫܝ̈ܐ ܪ̈ܘܝܚܐ ܡܢ ܒܢܝ̈ ܥܡܢ ܒܥܢܟܒܐ ܒܗܘܦܪܟܝܐ ܕܐܪܒܝܠ.
