ܩܒܠܗ ܒܐܪܚܘܐ ܒܝܬ ܐܪ̈ܟܐ ܣܘܪܝܝܐ ܢܩܝܦܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ، ܝܘܡ ܚܕܒܫܒܐ 14 ܟܢܘܢ ܬܪܝܢܐ 2024، ܒܨܘܝܐ ܘܩܪܘܝܐ ܥܝܪܩܝܐ “ܚܣܝܢ ܣܥܕܘܢ” ܒܚܕܐ ܝܬܒܬܐ ܣܘܘܕܝܬܐ ܚܕܪ ܩܛܪܐ ܕܩܪܝܢܐ ܒܙܒܢܐ ܕܬܩܢܝܘܬܐ، ܓܘ ܐܘܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܓܘ ܥܢܟܒܐ.
ܘܡܬܘܓܒܪܗ ܝܬܒܬܐ، ܐܡܢܐ “ܥܝܡܐܕ ܨܒܝܚ” ، ܘܬܢܐܠܗ ܓܘܗܿ ܒܨܘܝܐ”ܚܣܝܢ ܣܥܕܘܢ” ܡܢܝܢܐ ܡܢ ܩܛܪ̈ܐ ܘܥܣܩ̈ܘܬܐ ܐܢܝ ܕܟܠܝ ܕܪܩܘܒܠ ܩܪܝܢܐ ܒܙܒܢܢ ܩܐܡܝܐ ܥܡ ܥܒܪܬܐ ܕܫܘܦ̈ܐ ܕܐܡܝܢܘܬܐ ܟܢܘܫܝܝܬܐ ܠܣܗܡܐ ܪܒܐ ܡܢ ܫܘܦ̈ܐ ܕܚܝܘܬܐ ܘܫܚܠܦܬܐ ܕܪܝܓܼܐܝܬ ܨܘܒ ܬܟܢܘܠܘܓ̰ܝܐ ܘܬܩܢܝܘܬܐ، ܘܪܡܙܠܗ ܕܘܠܐ ܥܠ ܣܦܪ̈ܐ ܘܟܬܘܒ̈ܐ ܠܠܘܝܘܬܐ ܕܗܢ ܫܘܚܠܦܐ ܕܠܐ ܚܘܣܪܢܐ ܕܣܝܡܝ̈ܗܝ ܪ̈ܢܝܝܐ ܘܣܦܪ̈ܝܐ ܠܩܪ̈ܘܝܗܝ ܘܢܩܝܦܝ̈ܗܝ.
ܘܫܘܪܪܠܗ “ܣܥܕܘܢ” ܕܫܒܝܠ̈ܐ ܕܐܡܝܢܘܬܐ ܟܢܘܫܝܝܬܐ ܐܝܬܗ̄ܘܐܠܝܗܝ ܡܥܒܕܢܘܬܐ ܪܒܬܐ ܥܠ ܛܒܥܬܐ ܕܦܬܐ ( ܘܪܩܐ) ، ܘܪܡܙܠܗ ܕܩܪܘܝܐ ܒܥܕܢܐ ܩܐܡܝܐ ܠܐ ܒܥܐ ܟܬܒ̈ܐ ܘܬܘܢܝ̈ܬܐ ܐܪ̈ܝܟܐ، ܒܥܠܬܐ ܕܡܘܙܓܼܐ ܕܩܪܘܝܐ ܝܠܦܠܗ ܥܠ ܦܪ̈ܝܣܬܐ ܟܪ̈ܝܐ ܓܘ ܫܒܝܠ̈ܐ ܕܐܡܝܢܘܬܐ ܟܢܘܫܝܝܬܐ ܒܥܠܡܐ ܣܝܡܝܐ ( ܕܘܡܝܢܝܐ).
ܘܒܚܘܬܡܐ ܕܝܬܒܬܐ ܣܘܘܕܝܬܐ ܡܫܘܬܦܠܗܘܢ ܡܛܝܒ̈ܐ ܒܣܘܘܕܐ، ܘܦܘܢܐܠܗ ܐܡܘܪܐ ܥܠ ܫܘܐܠܝ̈ܗܝ ܘܡܚܫܚܝܬܝ̈ܗܝ.
ܘܦܝܫܠܗܘܢ ܡܛܝܒ̈ܐ ܒܝܬܒܬܐ ܘܙܝܪܐ ܕܡܘܒܠܢܘܬܐ ܘܛܘܦܝ̈ܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܡܝܩܪܐ “ܐܢܘ ܓ̰ܘܗܪ ܥܒܕܘܟܐ”، ܘܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ܘܥܡ ܟܢܫܐ ܡܢ ܝܨܘܦ̈ܐ ܒܡܪܕܘܬܐ ܘܣܦܪܘܬܐ.
