ܩܝܡܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ، ܒܥܘܕܪܢ ܥܡ ܟܢܘܫܬܐ ܕܡܪܕܘܬܐ ܟܠܕܝܬܐ، ܒܚܕ ܙܘܝܚܐ ܒܘܝܐܝܐ ܠܟܬܘܒܐ ܡܫܢܝܐ (ܢܘܪܝ ܦܛܪܘܣ ܥܬܘ) ܓܘ ܐܘܢܐ ܕܟܢܘܫܬܐ ܕܡܪܕܘܬܐ ܟܠܕܝܬܐ ܒܪܘܣܬܩܐ ܕܥܢܟܒܐ ܒܪܡܫܐ ܕܬܪܝܢܒܫܒܐ 9 ܬܫܪܝܢ ܩܕܡܝܐ 2023. ܒܛܘܝܒܐ ܕܡܢܝܢܐ ܡܢ ܦܪ̈ܠܡܢܝܐ ܘܡܫܬܐܠܢ̈ܐ ܡܕܒܪ̈ܢܝܐ ܘܫܘܠܛܢܝ̈ܐ ܘܒܝܬܘܬܐ ܕܡܫܢܝܐ ܘܟܢܫܐ ܡܢ ܚܒܪ̈ܗ ܘܡܚܒܢ̈ܗ.
ܫܘܪܐܠܗ ܙܘܝܚܐ ܒܟܠܝܬܐ ܕܚܕ ܕܩܝܩܐ ܕܫܬܩܐ ܒܘܝܐܐ ܥܠ ܪܘܚܐ ܕܡܫܢܝܐ ܘܪ̈ܘܚܐ ܕܣܗܕ̈ܐ ܕܓܘܢܚܐ ܕܚܠܘܠܐ ܕܒܓܼܕܝܕܐ. ܘܒܚܕ ܡܡܠܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܐ̄ܡܪܗ ܡܕܒܪܢܗܿ ܓܘܢܝܐ ܡܝܩܪܐ “ܟܠܕܘ ܪܡܙܝ ܐܘܓܼܢܐ” (ܗܐ ܝܠܗ ܡܪܐ ܕܟܬܒܐ «العنكاويّ الطائر» ܡܛܐ ܠܡܫܪܝܗ ܐ̇ܚܪܝܐ، ܕܕܡܟ ܒܫܠܡܐ ܒܚܦܩܐ ܕܡܕܝܢ̄ܬܗ ܚܒܝܒܬܐ ܥܢܟܒܐ ܘܠܐ ܫܢܐ ܡܢܗܿ ܠܥܠܡ، ܒܬܪ ܕܚܘܦܛܠܗ ܒܡܬܚܐ ܕܡܐܙܠܬܐ ܕܚܝܘܬܗ ܣܦܪܝܬܐ ܕܥܒܕܠܗܿ ܡܬܘܡܝܬܐ ܘܡܣܓܠ ܛܒ̈ܗܿ ܘܬܫܥܝܬܗܿ ܓܘ ܟܬܝܒ̈ܬܗ) . ܘܩܘܠܣܠܗ ܒܢܨܝܚܘ̈ܬܐ ܕܡܫܢܝܐ ܘܓܪܗ ܐܝܟ ܡܠܦܢܐ ܡܝܬܪܐ ܘܒܣܝܡ̈ܗ ܣܦܪ̈ܝܐ ܘܪ̈ܢܝܝܐ ܘܫܘܬܦܘ̈ܬܗ ܐܝܟ ܟܬܘܒܐ ܓܘ ܡܓܠܬܐ ܕ(ܒܢܐܦܠ) ܘܛܘܝܒܗ ܐܡܝܢܝܐ ܓܘ ܚܠܩ̈ܝܬܐ ܕܪ̈ܫܝܐ ܐܢܝ ܡܛܟܣܐܠܗܘܢ ܡܕܒܪܢܘܬܐ ܒܐܡܝܢܘܬܐ، ܘܡܘܙܝܕܠܗ ܒܐܡܪܐ ( ܐܝܬܠܢ ܗܘܡܢܘܬܐ ܕܒܕ ܫܒܩܝ ܕܟܪܗ ܠܝܘܒܠ̈ܐ ܘܝܘܒܠ̈ܐ).
ܘܒܬܪ ܗܕܟ ܦܝܫܠܗ ܡܘܩܪܒܐ ܡܡܠܐ ܕܟܢܘܫܬܐ ܕܡܪܕܘܬܐ ܟܠܕܝܬܐ ܒܝܕ ” ܨܒܚ ܫܐܡܝܐ” ܬܢܐܠܗ ܓܘܗ ܫܪܒܐ ܕܚܝ̈ܐ ܕܡܫܢܝܐ، ܒܬܪ ܗܕܟ ܡܘܩܪܒܠܗ ܡܚܘܪܐ “ܓܝܘܪܓܝܣ ܢܒܐܬܝ” ܚܕܐ ܡܫܘܚܬܐ ܒܘܝܐܝܬܐ ܒܗܢ ܦܘܪܣܐ، ܘܒܬܪ ܗܕܟ ܦܝܫܠܗ ܡܘܩܪܒܐ ܡܡܠܐ ܕܚܘܝܕܐ ܕܣܦܪ̈ܐ ܘܣܝܘܡ̈ܐ ܣܘܪ̈ܝܝܐ ܒܝܕ ” ܐܟܕ ܡܪܐܕ” ܚܠܦ ܪܫܐ ܕܚܘܝܕܐ ܬܢܐܠܗ ܓܘܗ ܠܓܪܐ ܕܡܫܢܝܐ ܓܘ ܚܝܘܬܐ ܡܪܕܘܬܢܝܬܐ ܘܡܫܘܬܦܘ̈ܬܗ ܣܦܪ̈ܝܐ.
ܘܡܘܩܪܒܠܗܘܢ ܣܦܪ̈ܐ ” ܦܛܪܘܣ ܢܒܐܬܝ” ، ܘܕܟܬܘܪ ” ܟܘܬܪ ܢܓ̰ܝܒܿ” ܬܪܬܝ ܣܗܕܘ̈ܬܐ ܕܚܝܘܬܐ ܚܕܪ ܒܚܝܪܘܬܝܗܝ ܚܝܘܬܢܝܬܐ ܥܡ ܡܫܢܝܐ. ܘܒܬܪ ܗܕܟ ܦܝܫܠܗ ܡܘܩܪܒܐ ܡܡܠܐ ܕܒܝܬܘܬܐ ܕܡܫܢܝܐ ܒܝܕ ܢܒܓܗ ܕܟܬܘܪ “ܐܢܡܐܪ ܢܙܐܪ” ، ܡܘܩܪܒܠܗ ܓܘܗ ܩܘܒܠܛܝܒܘܬܐ ܠܩܝܡ̈ܐ ܒܛܟܣܬܐ ܕܗܢ ܙܘܝܚܐ ܒܘܝܐܝܐ ܘܡܘܥܒܪܗ ܥܠ ܐܝܩܪܗ ܠܟܠܝܗܝ ܡܫܘܬܦܢ̈ܐ ܓܘܗ. ܘܚܒܫܠܗ ܙܘܝܚܐ ܢܘܩܙ̈ܐ ܕܡܩܪܒܬܐ ܕܡܩܛܥ̈ܐ ܡܘܣܝܩܝ̈ܐ .
