ܩܝܡܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ، ܝܘܡ ܫܒܬܐ 10 ܫܒܛ 2024، ܒܝܬܒܬܐ ܕܘܪܫܝܬܐ ܚܒܫܠܗܿ ܕܥܬܝܕ ܕܣܓܝܐܘܬܐ ܓܘ ܥܝܪܩ ܒܬܪ ܥܣܪܝܢ ܫܢܝ̈ܢ ܡܢ ܫܘܚܠܦܐ، ܦܝܫܠܗܿ ܡܘܩܪܒܬܐ ܒܝܕ ܒܨܘܝܐ ܓܘ ܨܒܼܘ̈ܬܐ ܕܐܫܢܝܘܬܐ ܬܘܕܝܬܢܝܬܐ ܕܟܬܘܪ “ܣܥܕ ܣܠܘܡ”، ܓܘ ܐܘܢܐ ܕܓܠܓܡܫ ܓܘ ܩܢܛܪܘܢ ܐܟܕܝܡܝܐ ܟܢܘܫܝܝܐ ܒܥܢܟܒܐ.
ܝܬܒܬܐ ܗܝ ܕܟܡ ܡܩܪܒܠܗܿ ܕܟܬܘܪ “ܣܥܕ ܣܠܘܡ” ܗܘ ܫܩܝܠܐ ܕܫܢܐ ܕ(ܐܒܢ ܐܠܪܐܫܕ)، ܘܥܒܕܠܗ ܕܘܪܫܐ ܥܡܗ ܡܬܢܝܢܐ “ܐܚܡܕ ܣܥܕܐܘܝ” ܗܘ ܫܩܝܠܐ ܕܫܢܐ ܕ(ܒܘܟܪ)، ܒܬܪ ܗܕܟ ܡܘܩܪܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ܚܕ ܡܡܠܐ ܫܘܪܪܠܗ ܓܘܗ ܕ” ܕܝܬܒܬܐ ܗܝ ܕܢܝܫܗܿ ܝܠܗ ܡܪܘܚܬܐ ܘܡܥܡܩܡܐ ܕܕܘܪܫܐ ܠܐ ܠܒܨܘܪ̈ܘܬܐ ܒܠܚܘܕ ܐܠܐ ܠܢܛܪܬܐ ܕܗܕ ܗܝܝܘܬܐ ܦܪܝܫܬܐ ܕܥܝܪܩ ܘܡܕܢܚܐ ܡܨܥܝܐ” ، ܘܪܡܙܠܗ ܠ” ܐܕܫܢܝܘܬܐ ܘܣܓܝܐܘܬܐ ܝܠܝܗܝ ܕܝܠܝ̈ܬܐ ܐܣܝ̈ܐ ܠܗܝܝܘܬܐ ܫܪܝܪܝܬܐ ܕܡܕܢܚܐ ܡܨܥܝܐ ܘܝܘܪܬܢܐ ܡܕܝܢܝܐ ܐܠܗ”.
ܘܡܘܒܝܢܗ “ܐܘܓܼܢܐ”، ܕ” ܗܕܐ ܟܫܝܪܘܬܐ ܝܠܗܿ ܦܘܬܚܐ ܕܫܢ̄ܢܬܐ ܡܠܝܬܐ ܡܢ ܦܘܠܚܢܐ ܘܟܫܝܪ̈ܘܬܐ ܓܘ ܓܝܓܠܐ ܚܘܫܒܝܐ ܘܒܪܘܝܝܐ”، ܘܡܘܒܝܢܗ ܕܫܢ̄ܬܐ “2024 ܒܕ ܗܘܐ ܓܘܗܿ ܡܫܛܚܐ ܪܒܐ ܕܠܦܦܐ ܕܐܫܢܝܘܬܐ ܘܣܓܝܐܘܬܐ ܘܗܘ ܝܠܗ ܡܢ ܬܟܒܪܬܐ ܕܘܙܝܪܘܬ ܡܪܕܘܬܐ ܘܥܠܝܡ̈ܐ ܘܫܒܝܠܐ ܕܫܘܠܛܢܘܬܐ”.
ܘܬܢܐܠܗ ܕܟܬܘܪ “ܣܥܕ ܣܠܘܡ” ܕܘܪܫܐ ܚܕܪ ܕܥܬܝܕ ܕܣܓܝܐܘܬܐ ܓܘ ܥܝܪܩ ܘܦܪܝܫܐܝܬ ܒܬܪ ܓܕܫ̈ܐ ܐܢܝ ܕܡܚܐܠܗܘܢ ܒܒܨܘܪ̈ܘܬܐ ܡܢ ܫܘܚܠܦܐ ܒܫܢ̄ܬܐ ܕ2003 ܘܫܘܪܝܐ ܒܓܕܫ̈ܐ ܕܩܫܝܘܬܐ ܘܐܢܫܬܐ ܛܝܦܝܬܐ، ܘܓܘܠܝܐ (ܡܪܚܩܬܐ) ܕܒܨܘܪ̈ܘܬܐ ܬܘܕܝܬܢܝ̈ܐ ܡܫܚܠܦ̈ܐ ܡܢ ܐܪܫܟܝܬܐ ܒܓܕܕ ܘܩܢܛܪ̈ܘܢܐ ܕܡܕܝܢ̈ܬܐ ܕܐܝܬܠܗܘܢ ܡܪܟܒܘܬܐ ܟܢܘܫܝܝܬܐ ܡܫܚܠܦܬܐ ܘܗܠ ܡܛܝܬܐ ܠܓܕܫ̈ܐ ܕܕܥܫ ܫܢ̄ܬܐ ܕ2014 ܘܥܡܝܗܝ ܡܪܚܩܬܐ ܕܒܨܘܪ̈ܬܐ ܫܪ̈ܫܝܐ ܘܬܘܕܝܬܢܝ̈ܐ ܡܢ ܦܢܝܬܝ̈ܗܝ ܬܫܥܝܬܢܝ̈ܐ ܓܘ ܣܢܓ̰ܪ ܘܡܘܨܠ ܘܕܫܬܐ ܕܢܝܢܘܐ.
ܘܫܘܪܪܠܗ ܕ.”ܣܠܘܡ” ܥܠ ܐܢܢܩܝܘܬܐ ܕܢܛܪܬܐ ܕܐܫܢܝܘܬܐ ܬܘܕܝܬܢܝܬܐ ܘܫܪܫܝܬܐ ܓܘ ܥܝܪܩ، ܘܪܡܙܠܗ ܠܐܕܫܢܝܘܬܐ ܕܝܠܗܿ ܡܒܘܥܐ ܕܥܘܬܪܐ ܕܡܪܕܘܬܐ ܕܐܬܪ̈ܘܬܐ ܕܡܕܢܚܐ ܡܨܥܝܐ.
ܘܒܚܘܬܡܐ ܕܝܬܒܬܐ ܕܘܪܫܝܬܐ ܦܘܢܐܠܗ ܕܟܬܘܪ “ܣܥܕ ܣܠܘܡ” ܥܠ ܫܘܐܠ̈ܐ ܘܡܚܫܚܝ̈ܬܐ ܕܡܛܝܒ̈ܐ ܚܕܪ ܡܠܘܐܐ ܕܝܬܒܬܐ.
