ܩܝܡܠܗܿ ܡܫܕܪܘܬܐ ܡܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܝܘܡ ܬܪܝܢܒܫܒܐ 14 ܢܝܣܢ 2025، ܒܣܥܘܪܘܬܐ ܕܩܢܨܠܐ ܕܩܘܛܢܝܘܬܐ ܕܐܪܡܝܢܝܐ ܓܘ ܐܪܒܝܠ (ܪܐܦܐܝܠ ܡܘܦܣܝܣܝܐܢ)، ܠܡܩܪܒܬܐ ܕܩܘܒܠܛܝܒܘܬܐ ܠܡܝܩܪܘܬܗ، ܠܛܘܝܒܗ ܠܥܒܘܕܘ̈ܬܐ ܕܥܕܥܐܕܐ ܕܝܪܬܘܬܐ ܣܘܪܝܝܬܐ ܒܕܘܪܬܗ ܚܡܝܫܝܬܐ، ܘܩܪܝܬܗ ܠܝܗܠ̈ܐ ܦܠܟܠܘܪ̈ܝܐ ܠܫܘܬܦܬܐ ܓܘ ܥܕܥܐܕܐ، ܥܠ ܦܬܘܪܐ ܕܐ̄ܟܠܪܡܫܐ ܠܚܝܠܢܬܐ ܕܐܣܘܪ̈ܐ ܡܪ̈ܕܘܬܢܝܐ ܘܟܢܘܫܝܝ̈ܐ ܒܝܢ ܒܢܝ̈ ܥܡܢ ܒܐܬܪܐ ܘܐܬܪ̈ܘܬܐ ܕܓܠܘܬܐ.
ܘܚܒܫܠܗܿ ܡܫܕܪܘܬܐ، ܡܕܒܪܢܐ ܓܘܢܝܐ ܡܝܩܪܐ ( ܟܠܕܘ ܪܡܙܝ ܐܘܓܼܢܐ)، ܘܡܕܒܪܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܡܝܩܪܐ ( ܒܪܢܐܪܕ ܝܘܣܦ)، ܘܡܢܝܢܐ ܡܢ ܫܕܬܢ̈ܐ ܕܡܕܒܪܢܘܬܐ، ܘܡܘܩܪܒܠܗܿ ܡܫܕܪܘܬܐ ܒܡܬܚܐ ܕܣܥܘܪܘܬܐ ܩܘܒܠܛܝܒܘܬܐ ܘܐܝܩܪܐ ܠܡܝܩܪܘܬܐ ܕܩܢܨܠܐ ܓܘܢܝܐ ܕܩܘܛܢܝܘܬܐ ܕܐܪܡܝܢܝܐ ܓܘ ܐܪܒܝܠ (ܪܐܦܐܝܠ ܡܘܦܣܝܣܝܐܢ)، ܠܛܘܝܒܗ ܠܥܒܘܕܘ̈ܬܐ ܕܥܕܥܐܕܐ ܕܝܪܬܘܬܐ ܣܘܪܝܝܬܐ ܒܕܘܪܬܗ ܚܡܝܫܝܬܐ، ܗܘ ܕܦܝܫܠܗ ܚܬܝܡܐ ܒܡܬܚܐ ܐ̄ܚܪܝܐ ܓܘ ܥܢܟܒܐ، ܘܩܘܠܣܠܗܿ ܡܫܕܪܘܬܐ ܥܠ ܩܪܝܬܐ ܕܩܢܨܠܐ ܠܝܗܠ̈ܐ ܦܠܟܠܘܪ̈ܝܐ ܠܫܘܬܦܬܐ ܓܘ ܥܕܥܐܕܐ، ܥܠ ܦܬܘܪܐ ܕܐ̄ܟܠܪܡܫܐ ܒܬܪ ܚܘܬܡܐ ܕܥܒܘܕܘ̈ܬܐ ܕܥܕܥܐܕܐ.
ܘܫܘܪܪܠܗܘܢ ܒܡܬܚܐ ܕܬܦܩܬܐ ܥܠ ܐܢܢܩܝܘܬܐ ܕܥܘܕܪܢܐ ܒܝܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܫܘܬܐܣ̈ܐ ܕܥܡܢ ܓܘ ܩܘܛܢܝܘܬܐ ܕܐܪܡܝܢܝܐ، ܘܫܘܪܪܠܗ (ܐܘܓܼܢܐ) ܕܬܪ̈ܥܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܦܬܝܚ̈ܐܝܠܗܘܢ ܠܥܘܕܪܢܐ ܥܡ ܟܠ ܦܪ̈ܨܘܦܐ ܘܫܘܬܐܣ̈ܐ، ܠܛܘܪܢܬܐ ܕܩܐܡ ܡܪܕܘܬܢܝܐ ܕܥܡܢ.
