ܫܘܕܪܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܐܘܪܚܐ ܕܘܙܝܪܘܬ ܡܪܕܘܬܐ ܘܥܠܝܡ̈ܐ ܒܩܠܝܡܐ ܕܟܘܪܕܣܬܢ، ܝܘܡ ܚܕܒܫܒܐ 9 ܫܒܛ 2025، ܠܪܫܢܘܬܐ ܕܡܒܓܢܢܐ ܓܘܢܝܐ ܓܘ ܗܘܦܪܟܝܐ ܕܕܗܘܟ، ܒܢܝܫܐ ܕܫܪܝܬܐ ܒܡܠܘܐܐ ܕܥܒܪܬܐ ܕܫܘܬܦܘܬܐ ܕ(ܠܟܙܣ LEXUS) ܕܪ̈ܕܝܬܐ ܥܠ ܫܘܦܐ ܥܬܩܝܐ ܓܘ ܗܘܦܪܟܝܐ.
ܘܐ̄ܬܝܠܗܿ ܓ̰ܘܓ̰ܬܐ ܕܡܕܒܪܢܘܬܐ ܥܠ ܡܒܓܢܢܐ ܓܘܢܝܐ ، ܒܬܪ ܓܠܚܬܐ ܕܫܘܬܦܘܬܐ ܕ(ܠܟܙܣ LEXUS) ܕܪ̈ܕܝܬܐ ܚܕ ܡܠܘܐܐ ܡܘܕܥܢܘܬܢܝܐ ܨܝܪܐ ܓܘܗ ܟܠܝܬܐ ܕܚܕܐ ܡܢ ܪ̈ܕܝܬܗܿ ܪܫ ܥܬܩ̈ܐ ܕܩܢܝܬܐ ܕܓ̰ܪܘܢܐ ܐܬܘܪܝܬܐ، ܗܝ ܕܢܦܠܐ ܦܘܪܢܣܐܝܬ ܓܘ ܬܚܘܡ̈ܐ ܕܪܘܣܬܩܐ ܕܫܝܚܐܢ، ܘܒܥܠܬܐ ܕܝܠܗܿ ܡܢܛܪܬܐ ܥܬܩܝܬܐ ܢܩܝܦܬܐ ܠܘܙܝܪܘܬ ܟܪ̈ܟܝܘܬܐ ܘܕܝܪܘܬܐ ܓܘ ܩܠܝܡܐ.
ܘܫܘܪܪܠܗ ܡܕܒܪܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܓܘ ܡܕܒܪܢܘܬܐ ܡܝܩܪܐ (ܒܪܢܐܪܕ ܝܘܣܦ) ܕ(ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܓ̰ܘܓ̰ܠܗܿ ܨܘܒ ܡܫܬܐܠܢ̈ܐ ܒܗܢ ܡܠܘܐܐ، ܘܩܝܡܠܗܿ ܝܡܢܝܢܐ ܡܢ ܛܘܦܝ̈ܐ ܥܡ ܡܕܒܪܢܘܬܐ ܓܘܢܝܬܐ ܕܥܬܩ̈ܐ ܓܘ ܩܠܝܡܐ ܘܡܕܒܪܢܘܬܐ ܕܥܬܩ̈ܐ ܕܕܗܘܟ، ܘܒܝܬ ܕܪܫܐ ܕܚܘܕܬܐ (ܡܚܡܝܬܐ) ܕܝܪܬܘܬܐ ܘܥܬܩ̈ܐ ܥܝܪ̈ܩܝܐ ܗܘ ܝܠܗ ܒܐܪܒܝܠ ܘܡܢܝܢܐ ܡܢ ܡܫܬܐܠܢ̈ܐ ܫܘܠܛܢܝ̈ܐ ܘܦܪ̈ܠܡܢܝܐ).
ܘܐ̄ܡܪܠܗ (ܝܘܣܦ) (ܒܕܘܣܘܬܐ ܓ̰ܘܓ̰ܠܗܿ ܡܕܒܪܢܘܬܐ ܕܥܬܩ̈ܐ ܕܕܗܘܟ ܥܡ ܩܘܒܠܛܝܒܘܬܐ ܒܥܒܕܬܐ ܕܘܠܝܬܗܿ ܩܢܘܢܝܬܐ ܕܐܝܬ ܥܠܗܿ، ܓܘ ܡܩܪܒܬܐ ܕܩܒܠܬܐ (ܫܟܝܐ) ܩܢܘܢܝܬܐ ܓܢ̄ܒ ܡܒܓܼܢܢܐ ܓܘܢܝܐ ܘܐܦ ܓܘ ܒܝܬ ܕܝܢܐ ܕܫܝܚܐܢ، ܘܪܡܙܠܗ (ܗܝܡܢܘܬܢ ܒܦܘܠܚܢܐ ܒܚܕܕܐ ܓܘ ܚܡܝܬܐ ܕܝܪܬܘܬܐ ܘܬܫܥܝܬܐ ܕܐܒܗܬܝ̈ܢ ܐܢܝ ܕܦܝܫܝ ܡܚܘܫܒܢܐ ܝܘܪܬܢܐ ܡܪܕܘܬܢܝܐ ܘܐ̄ܢܫܝܐ ܘܐܬܪܢܝܐ ܘܒܐܘܪܚܐ ܕ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܦܝܫܠܗܧ ܥܒܕܬܐ ܒܨܝܬܐ ܓܘ ܓܢ̄ܒܢ̈ܐ ܩܢܘܢܝ̈ܐ ܠܡܩܪܒܬܐ ܕܩܒܠܬܐ ܪܘܫܡܝܬܐ ܠܡܒܓܼܢܢܐ ܓܘܢܝܐ).
ܘܡܘܒܝܢܗ ܡܕܒܪܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ( ܕܒܬܪ ܫܩܠܬܐ ܕܒܘܩܪ̈ܐ ܩܢܘܢܝ̈ܐ ܡܢ ܓܢ̄ܒ ܡܢܬܐ ܩܢܘܢܝܬܐ ܓܘ ܕܝܘܢ ܕܘܙܝܪܘܬ ܡܪܕܘܬܐ ܓܘ ܫܘܠܛܢܘܬܐ ܕܩܠܝܡܐ ܕܟܘܪܕܣܬܢ، ܦܝܫܠܗ ܡܘܩܪܒܐ ܡܡܠܐ ܪܘܫܝܡܐ ܚܒܫ ܩܒܠܬܐ ܩܢܘܢܝܬܐ ܕܪܩܘܒܠ ܥܒܪ̈ܢܐ ܥܠ ܥܬܩ̈ܐ ܕܩܪܝܬܐ ܕܓ̰ܪܡܢܐ ܐܝܟ ܩܢܘܢ̈ܐ ܕܚܡܝܬܐ ܕܥܬܩ̈ܐ ܕܝܠܢܝ̈ܐ ܒܗܢ ܨܒܘܬܐ).
ܘܚܬܡܠܗ (ܝܘܣܦ) ܣܘܘܕܗ ، ( ܩܒܠܬܢ ܓܢ̄ܒ ܡܒܓܼܢܢܐ ܓܘܢܝܐ ܓܘ ܕܗܘܟ، ܐܬܝܠܗܿ ܒܥܠܬܐ ܕܥܒܪܬܐ ܥܠ ܝܘܪܬܢܐ ܕܥܡܐ ܫܪܫܝܐ ܓܘ ܩܠܝܡܐ ܕܟܘܪܕܣܬܢ ܘܥܝܪܩ ܘܒܥܠܬܐ ܕܝ̈ܘܚ ܚܕ ܓܢ̄ܒܐ ܕܝܠܢܝܐ ܒܚܡܝܬܐ ܕܝܪܬܘܬܐ ܕܥܡܢ، ܘܐܦ ܗܕܟ ܩܝܡܠܗܿ ܡܕܒܪܢܘܬܐ ܓܘܢܝܬܐ ܕܥܬܩ̈ܐ ܓܘ ܩܠܝܡܐ ܘܒܐܘܪܚܐ ܕܡܕܒܪܢܘܬܐ ܕܥܬܩ̈ܐ ܕܕܗܘܟ ܩܝܡܠܗܿ ܒܡܩܪܒܬܐ ܕܩܒܠܬܐ ܩܢܘܢܝܬܐ ܐ̄ܚܪܝܬܐ ܒܥܠܬܐ ܕܥܒܪܬܐ ܕܫܘܬܦܘܬܐ ܥܠ ܫܘܦܐ ܥܬܩܝܐ ܘܨܝܪܘܬܗ، ܗܘ ܡܢܕܝ ܕܦܝܫ ܡܚܘܫܒܢܐ ܥܒܪܬܐ ܠܩܢܘܢ̈ܐ ܕܐܝܬ).
ܘܦܝܫ ܕܟܝܪܐ، ܕܣܟܪܐ ܕܓ̰ܪܘܢܐ ܥܬܩܝܐ ܕܥܪܐ ܬܫܥܝܬܐ ܕܒܪܝܬܗ ܠܫܢ̄ܬܐ ܕ 690 ܩܕܡ ܡܘܠܕܐ ܒܙܒܢܐ ܕܝܘܒܠܐ ܕܡܠܟܐ ܐܬܘܪܝܐ ܣܢܚܪܝܒ، ܘܢܦܠ ܓܘ ܪܘܣܬܩܐ ܕܫܝܚܐܢ ܒܗܘܦܪܟܝܐ ܕܕܗܘܟ.