ܡܘܚܝܐܠܗܿ ܡܛܟܣܬܐ ܕ( ܐܘܬܘ) ܕܙܕܩ̈ܐ ܕܒܪܢܫܐ، ܝܘܡ ܬܪܝܢܒܫܒܐ 5 ܐܒ 2024، ܘܒܪܥܝܘܬ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ، ܕܟܪܐ ܥܣܝܪܝܐ ܕܓܠܘܬܐ ܕܡܫܝܚܝ̈ܐ ܕܕܫܬܐ ܕܢܝܢܘܐ، ܓܘ ܐܘܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܓܘ ܥܢܟܒܐ.
ܘܡܘܩܪܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ”ܟܠܕܘ ܪܡܙܝ ܐܘܓܼܢܐ”، ܡܡܠܗ ܫܘܪܪܠܗ ܓܘܗ ( ܐܚܢܝ ܕܟܪܚ ܒܡܪܝܪܘܬܐ ܝܘܡ̈ܬܐ ܡܡܪܥܢܐ ܘܟܘܡ̈ܐ ܐܢܝ ܕܚܙܐܠܗ ܥܡܢ ܒܡܬܚܐ ܕܓܠܘܬܗ ܐܠܨܝܬܐ ܡܢ ܦܢܝܬܝ̈ܢ ܬܫܥܝܬܢܝ̈ܐ ܓܘ ܕܫܬܐ ܕܢܝܢܘܐ)، ܘܪܡܙܠܗ ܟܕ (ܟܡܙܕܝܠܢ ܚܝܠܐ ܘܨܒܝܢܐ ܒܥܪܝܬܐ ܘܦܝܫܬܐ ܓܘ ܐܪ̈ܥܬܐ ܕܐܒܗ̈ܬܐ).
ܘܡܘܒܝܢܗ “ܐܘܓܼܢܐ”، (ܐܠܦܝ̈ܐ ܡܢ ܒܢܝ̈ ܥܡܢ ܓܠܐܠܗܘܢ ܠܦܢܝ̈ܬܐ ܕܬܒܝܠ ܒܬܪ ܗܢ ܓܘܢܚܐ ܗܘ ܕܓܕܫܠܗ ܓܘܝܗܝ ܘܒܦܢܝ̈ܬܝܗܝ)، ܘܓܠܐܠܗ ( ܒܥܠܬܐ ܕܗܝܡܢܘܬܐ ܕܗܢ ܥܡܐ ܘܐ̄ܣܪܬܗ ܒܐܪܥܗ ܘܫܪܫܝܘܬܗ ܕܥܪܗ ܣܗܡܐ ܦܝܫܢܐ ܠܦܢܝ̈ܬܗ ܓܘ ܕܫܬܐ ܕܢܝܢܘܐ ܒܬܪ ܚܘܪܪܗܿ ܡܢ ܫܠܛܢܬܐ ܕܛܘܟܣܐ ܕܕܥܫ ܪܗܝܒܝܐ).
ܒܬܪ ܗܕܟ ܡܘܩܪܒܠܗ ܡܡܬܠܢܐ ܕܡܛܟܣܬܐ ܕ(ܐܘܬܘ) ܡܡܠܗ، ܒܬܪ ܡܢܗ ܓܠܚܬܐ ܕܚܕ ܠܘܚܐ ܡܢ ܪܘܫܡܐ ܥܠ ܪ̈ܡܠܐ ܚܕܪ ܓܕܫ̈ܐ ܕܕܥܫ ܦܝܫܠܗ ܡܘܩܪܒܐ ܒܝܕ ܐܡܢܐ (ܐܡܓ̰ܕ ܫܐܟܪ)، ܒܬܪ ܗܕܟ ܝܬܒܬܐ ܕܘܪܫܝܬܐ ܒܫܡܐ (ܒܬܪ ܥܣܪ ܫܢ̈ܐ ܡܢ ܐܒܝܕܘܬܐ ܟܢܝܫܝܬܐ، ܡܐ ܝܠܗ ܚܘܠܩܐ ܘܕܥܬܝܕ ܕܡܫܝܚܝ̈ܐ ܓܘ ܥܝܪܩ ؟)، ܦܝܫܠܗ ܡܬܘܓܒܪܬܐ ܝܬܒܬܐ ܒܝܕ ܚܦܝܛܬܐ ܓܘ ܓܝܓܠܐ ܕܙܕܩ̈ܐ ܕܒܪܢܫܐ “ܪܢܝܢ ܛܐܗܪ”، ܘܕܪܫܠܗܿ ܓܘ ܝܬܒܬܐ ܡܫܬܐܠܢܐ ܕܐܣܘܪ̈ܐ ܓܘ ܡܛܟܣܬܐ ܕܚܡܘܪܒܝ “ܘܠܝܡ ܘܪܕܐ”، ܘܦܝܫܠܗܘܢ ܡܘܩܪܒܐ ܫܘܐܠ̈ܐ ܘܕܘܪ̈ܫܐ ܡܢ ܓܢ̄ܒ ܡܛܝܒ̈ܐ.
ܘܦܝܫܠܗܘܢ ܚܬܝܡ̈ܐ ܥܒܘܕܘ̈ܬܐ ܕܚܘܪܙܐ ܒܦܘܬܚܐ ܕܒܝܬ ܓܠܚܐ ܕܨܘܪ̈ܬܐ ܦܘܬܘܓܼܪ̈ܦܝܐ، ܘܓܠܚܬܐ ܕܙܘܠܐ (ܦܝܠܡܐ) ܐܫܛܪܝܐ ܒܫܡܐ ( ܦܝܫ̈ܐ ܘܟܠܝ̈ܐ) ܠܡܦܩܢܐ ܡܢܚܐ “ܛܐܗܪ ܣܥܝܕ ܡܬܝ”.
ܘܦܝܫ ܕܟܝܪܐ ، ܕܦܢܝܬܐ ܕܕܫܬܐ ܕܢܝܢܘܐ ܢܦܠ ܗ̄ܘܐܠܗܿ ܒܐܝܕܐ ܕܛܘܟܣܐ ܕ(ܕܥܫ) ܪܗܝܒܝܐ ܒܣܝܩܘܡ 7 ܐܒ ܫܢ̄ܬܐ ܕ 2014 .
