ܫܪܐܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ، ܝܘܡ ܐܪܒܥܒܫܒܐ 15 ܬܫܪܝܢ ܩܕܡܝܐ 2025، ܐܘܦܪܝܬ ܕܝܠܢܝܐ ܒܫܒܼܪ̈ܐ ܒܫܡܐ ܕ(ܘܪܕܐ ܕܕܥܬܝܕ) ܗܘ ܝܠܗ ܡܢ ܬܦܪܝܬܐ ܕܡܕܒܪܢܘܬܐ ܒܥܘܕܪܢܐ ܘܣܕܝܪܘܬܐ ܥܡ ܫܘܬܐܣܐ ܕ(ܒܝܬ ܟܐܢܘ) ܕܠܫܢܐ ܣܘܪܝܝܐ ܘܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܢܩܝܦܐ ܠܡܕܒܪܢܘܬܐ.
ܘܚܒܫ ܐܘܦܪܝܬ ܥܣܪܐ ܙܡܝܪ̈ܬܐ ܒܣܘܠܓܣܐ ܟܪܬܘܢܝܐ (ܐܢܝܡܝܫܢ)، ܦܝܫܠܗܘܢ ܡܘܩܪܒܐ ܒܝܕ ܐܡܢܐ (ܛܠܐܠ ܓܪܝܫ) ܒܫܘܬܦܬܐ ܕܡܢܝܢܐ ܡܢ ܬܠܡܝܕ̈ܐ ܙܥܘܪ̈ܐ ܡܢ ܡܕܝܢ̄ܬܐ ܕܩܡܫܠܝ ܣܘܪܝܼܝܬܐ، ܘܫܘܬܦܠܗ ܒܟܬܝܒܬܐ ܘܩܝܢ̈ܬܐ ܕܙܡܝܪ̈ܬܐ ܕܐܘܦܪܝܬ، ܡܢܝܢܐ ܡܢ ܡܒܥܢ̈ܐ ܘܝܠܝܗܝ (ܢܒܝܠ ܝܘܣܦ) ܡܢ ܣܘܝܕ، (ܓ̰ܘܙܝܦ ܓܒܪܐܝܠ) ܡܢ ܗܘܠܢܕܐ، ܘ(ܢܒܝܠ ܓܪܝܫ) ܡܢ ܐܡܪܝܟܐ).
ܘܫܘܪܪܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ): (ܦܘܠܚܢܐ ܢܝܫܗ ܝܠܗ ܡܩܪܒܬܐ ܕܝܪܬܘܬܢ ܫܪܫܝܬܐ ܠܫܒܪ̈ܐ ܒܚܕ ܣܘܠܓܣܐ ܚܕܬܐ ܘܓܪܫܢܐ، ܘܒܬܪܝܢ ܠܥܙ̈ܐ ܡܕܢܚܝܐ ܘܡܥܪܒܝܐ)، ܘܪܡܙܠܗ : (ܗܕ ܬܪܡܝܬܐ ܐܘܡܢܝܬܐ ܛܝܡܢܬܐ، ܦܝܫܐ ܚܘܫܒܢܬܐ ܚܕܐ ܝܬܝܪܘܬܐ ܐܕܫܢܝܬܐ ܕܡܐܙܠܬܐ ܕܡܕܒܪܢܘܬܐ ܒܢܛܪܬܐ ܕܝܪܬܘܬܐ ܘܚܝܠܢܬܐ ܕܡܪܕܘܬܢ ܒܝܢ ܝܘܒܠ̈ܐ).
ܘܡܘܒܝܢܗ (ܐܘܓܼܢܐ) ܒܚܘܬܡܐ ܕܣܘܘܕܗ، : (ܗܢ ܦܘܠܚܢܐ ܐܘܡܢܝܐ ܬܪܒܝܬܢܝܐ ܒܟܪܐ، ܢܝܫܗ ܝܠܗ ܙܪܥܬܐ ܕܚܘܒܐ ܕܠܫܢܐ ܘܝܪܬܘܬܐ ܒܠܒܘ̈ܬܐ ܕܫܒܪ̈ܝܢ، ܘܫܘܬܦܬܐ ܒܚܝܠܢܬܐ ܕܗܝܝܘܬܐ ܡܪܕܘܬܢܝܬܐ ܒܚܕ ܣܘܠܓܣܐ ܕܪܝܐ ܟܦܫ ܒܝܢ ܫܪܫܝܘܬܐ ܘܚܘܕܬܐ).
ܘܦܝܫ ܕܟܝܪܐ، ܕܐܘܦܪܝܬ (ܘܪܕܐ ܕܕܥܬܝܕ) ܐ̄ܬܐܠܗ ܦܠܛܐ ܕܥܘܕܪܢܐ ܘܣܕܝܪܘܬܐ ܒܝܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܫܘܬܐܣܐ ܕ(ܒܝܬ ܟܐܢܘ) ܕܠܫܢܐ ܣܘܪܝܝܐ ܗܘ ܡܕܒܪܢܗ ܝܠܗ ܡܒܥܢܐ (ܐܟܕ ܒܫܝܪ ܐܠܣܥܕܝ).