ܣܘܩܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ”ܟܠܕܘ ܪܡܙܝ ܐܘܓܼܢܐ”، ܝܘܡܐ ܕܐܪܒܥܒܫܒܐ 18 ܐܝܠܘܠ 2024، ܒܒܢܝܢܐ ܕܡܕܒܪܢܘܬܐ ܒܪܘܣܬܩܐ ܕܥܢܟܒܐ، ܡܫܕܪܘܬܐ ܕܣܝܥܬܐ ܕܣܕܝܪܘܬܐ ܘܣܘܘܕܐ ܕܓܒ̈ܐ ܐܘܡܬܢܝ̈ܐ ܕܥܡܢ ܒܣܘܪܝܼܐ.
ܘܕܪܫܠܗܘܢ ܬܪܘܝܗܝ ܓܢ̄ܒܢ̈ܐ ܒܣܘܘܕܝܗܝ ܟܫܝܪ̈ܘܬܐ ܘܥܒܼܘܿܕܘ̈ܬܐ ܐܢܝ ܡܛܟܣܐܠܗܘܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ، ܘܩܘܠܣܠܗܿ ܡܫܕܪܘܬܐ ܣܥܘܪܬܐ ܒܓܪܐ ܕܡܕܒܪܢܘܬܐ ܒܩܝܡܬܐ ܒܩܐܡ ܡܪܕܘܬܢܝܐ ܣܘܪܝܝܐ، ܘܦܪܝܫܐܝܬ ܒܬܪ ܢܨܝܚܘܬܐ ܕܣܝܡܦܘܙܝܘܡ ܣܘܪܝܝܐ ܩܕܡܝܐ ܒܐܬܪܐ، ܗܘ ܟܡ ܛܟܣܐܠܗ ܡܕܒܪܢܘܬܐ ܘܩܢܛܪܘܢ ܕܝܘܢܢ ܗܘܙܝܐ ܕܒܘܨܝ̈ܐ ܘܕܪ̈ܫܝܬܐ ܕܥܬܝܕܝ̈ܐ، ܠܡܬܚܐ ܡܢ 5 – 8 ܐܝܠܘܠ، ܒܐܪܒܝܠ ܐܪܫܟܝܬܐ ܕܩܠܝܡܐ ܕܟܘܪܕܣܬܢ.
ܘܡܘܩܪܒܠܗ (ܐܘܓܼܢܐ) ܓܘ ܬܦܩܬܐ ܦܘܫܩܐ ܟܪܝܐ ܥܠ ܟܫܝܪ̈ܘܬܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܘܫܘܬܦܬܝܗܝ ܒܛܘܘܪܐ ܕܩܐܡ ܡܪܕܘܬܢܝܐ ܣܘܪܝܝܐ ܒܥܝܪܩ ܘܩܠܝܡܐ ܕܟܘܪܕܣܬܢ ܘܦܢܝܬܐ، ܘܪܡܙܠܗ ܓܘ ܣܘܘܕܗ ܕܬܪ̈ܥܐ ܕܡܕܒܪܢܘܬܐ ܦܬܝܚ̈ܐܝܠܗܘܢ ܠܥܘܕܪܢܐ ܥܡ ܟܠ ܦܪ̈ܨܘܦܐ ܘܫܘܬܐܣ̈ܐ ܕܝܠܢܝ̈ܐ ܒܒܢܝ̈ ܥܡܢ ܒܥܝܪܩ ܘܦܢܝܬܐ.
ܘܡܛܘܝܡܢܐ ܡܫܕܪܘܬܐ ܒܚܘܬܡܐ ܕܣܘܘܕܗܿ، ܓܪܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܛܘܘܪܐ ܕܩܐܡ ܡܪܕܘܬܢܝܐ ܣܘܪܝܝܐ ܓܘ ܦܢܝܬܐ، ܘܫܘܪܪܠܗܿ ܥܠ ܐܢܢܩܝܘܬܐ ܕܥܘܕܪܢܐ ܒܝܢ ܫܘܬܐܣ̈ܐ ܕܥܡܢ ܠܛܘܘܪܐ ܕܦܘܠܚܢܐ ܡܪܕܘܬܢܝܐ ܘܐܡܝܢܝܘܬܗ.
ܘܚܒܫܠܗܿ ܡܫܕܪܘܬܐ ܣܥܘܪܬܐ، ܡܫܬܐܠܢܐ ܕܡܛܟܣܬܐ ܐܬܘܪܝܬܐ ܕܝܡܘܩܪܛܝܬܐ (ܓܒܪܐܝܠ ܡܘܫܐ)، ܪܫܐ ܡܫܘܬܦܐ ܕܓܒܐ ܕܚܘܝܕܐ ܣܘܪܝܝܐ (ܣܢܚܪܝܒ ܒܪܨܘܡ) ܘܡܫܬܐܠܢܐ ܕܡܟܬܒܐ ܣܘܥܪܢܝܐ ܕܓܒܐ ܐܬܘܪܝܐ ܕܝܡܘܩܪܛܝܐ (ܢܝܢܘܣ ܐܝܫܘ).
