| ܐ. ܐܘ ܡܰܘܠܳܕ݂ܰܝܕ݂ܶܗ ܘܐܝ ܢܰܥܡܘܬ݂ܰܝܕ݂ܶܗ ܢܰܥܘܡ ܦܰܝܷܩ ܡܰܘܠܷܕ݂ ܚܰܡܫܳܐ ܒܐܷܫܘܷܛ ܒܝ ܫܰܬܳܐ ܕܰܢ ܐܰܠܦܐ ܘܬܡܳܢܰܝܡܐ ܘܬܡܳܢܶܐ ܘܐܷܫܬܝ (1868) ܒܐܳܡܝܕ݂. ܐܷܫܡܶܗ ܕܘ ܒܰܒܐ ܐܰܠܝܰܣ ܘܕܝ ܐܶܡܐ ܣܰܝܕܶܐ ܘܰܐ. ܟܡܐ ܝܰܘ̈ܡܶܐ ܒܷܬ݂ܷܪ ܡܘ ܡܰܘܠܳܕܰܝܕ݂ܶܗ ܩܰܫܐ ܩܘܪܝܰܩܘܣ ܡܰܥܡܰܕ݂ܠܶܗ ܒܝ ܥܝܬܐ ܕܝ ܝܳܠܕܰܬ݂ ܐܰܠܳܗܐ ܕܐܳܡܝܕ݂. ܥܘܡܪܶܗ ܫܘܰܥ ܐܷܫ̈ܢܶܐ ܡܫܰܪܶܠܶܗ ܒܝ ܡܰܕܪܰܫܬܐ ܫܰܪܘܰܝܬܐ. ܒܷܬ݂ܷܪ ܡܶܐ ܕܦܰܝܷܫ ܫܘܰܥ ܐܷܫ̈ܢܶܐ ܒܝ ܡܰܕܪܰܫܬܐ، ܒܝ ܫܰܬܐ ܕܰܢ ܐܰܠܦܐ ܘܬܡܳܢܰܝܡܐ ܘܚܕ݂ܐ ܘܬܡܳܢܝ (1881) ܡܰܟܬ݂ܰܘܠܶܗ ܪܘܚܶܗ ܒܝ ܠܝܣܰܐ. ܡܷܬ݂ܚܐ ܕܷܬܡܳܢܶܐ ܐܷܫ̈ܢܶܐ ܦܰܝܷܫ ܒܝ ܠܝܣܰܐ ܘܝܰܠܷܦ ܠܝܫܳܢܐ ܣܘܪܝܝܐ، ܥܰܪܰܒܳܝܐ، ܬܘܪܟܳܝܐ، ܦܷܪܣܳܝܐ ܘܐܷܫܡܐ ܣܬܶܐ ܦܪܰܢܫܳܝܐ. ܒܥܰܝܢܝ ܙܰܒܢܳܐ ܡܷܕܠܶܗ ܝܘܠܦܳܢܐ ܕܝ ܡܘܣܝܩܝ، ܕܘ ܟܝܳܢܐ ܘܕܘ ܚܫܳܘܐ. ܢܰܥܘܡ، ܒܥܘܡܪܐ ܢܰܥܝܡܐ، ܗܶܫ ܗܝـܝܶܐ ܒܝ ܡܰܕܪܰܫܬܐ، ܡܣܰܟܰܪܠܶܗ ܒܝ ܩܰܡܰܝܬܐ ܐܘ ܒܰܒܐ ܘܒܷܬ݂ܷܪ ܐܝ ܐܶܡܰܝܕ݂ܶܗ ܒ. ܡܰܠܦܳܢܐ ܒܚܰܫܚܰܫ ܡܝܕ݂ܶܗ ܕܷܡܰܝܷܬ݂ ܐܘ ܒܰܒܐ، ܢܰܥܘܡ ܔܒܝܪ ܗܶܫ ܗܝـܝܶܐ ܢܰܥܝܡܐ ܕܫܳܓ݂ܷܠ. ܒܰܢ ܐܰܠܦܐ ܘܬܡܳܢܰܝܡܐ ܘܬܡܳܢܶܐ ܘܬܡܳܢܝ (1888) ܒܘ ܙܰܒܢܐ ܕܚܰܣܝܐ ܔܷܪܔܝܣ ܥܰܒܕܷܢܢܘܪ، ܡܫܰܪܶܠܶܗ ܒܘ ܕܰܪܓ݂ܐ ܕܝ ܡܰܠܦܳܢܘܬ݂ܐ. ܒܷܬ݂ܷܪ ܒܫܰܬܐ ܐܰܙܙܶܗ ܠܷܩܪܝܬ݂ܐ ܐܷܫܡܰܗ ܚܰܫܚܰܫ ܕܟܷܬܘܰܐ ܡܰܣܷܪܬܐ ܒܝ ܡܕ݂ܝܬܐ ܕܝ ܒܫܶܪܝـܝܶܐ. ܐܰܢ ܢܰܥܝܡܶܐ ܕܝ ܩܪܝܬ݂ܰܬ݂ܶܐ ܣܘܪܝـܝܐ ܠܷܐܕ݂ܥܝܘܰܐ ܘܒܘ ܠܝܫܳܢܐ ܟܘܪܕܳܝܐ ܡܷܔܓ݂ܳܠܝܘܰܐ. ܡܰܘܟ݂ܰܐ ܡܰܠܦܳܢܐ ܢܰܥܘܡ ܦܰܝܷܩ ܓܳܪܰܫܘܰܐ ܥܰܣܩܘܬ݂ܐ ܒܘ ܬܶܘܠܝܦܐ ܕܘ ܠܶܫܳܢܐ ܣܘܪܝـܝܐ. ܒܷܬ݂ܷܪ ܡܶܐ ܕܦܰܝܷܫ ܐܰܪܒܥܐ ܝܰܪܚܶܐ ܒܚܰܫܚܰܫ ܕܰܥܷܪ ܠܐܳܡܝܕ݂. ܦܰܛܷܪܝܰܪܟ݂ܐ ܦܷܛܪܘܣ ܪܒܝܥܳܝܐ، ܒܝ ܫܰܬܐ ܕܰܢ ܐܰܠܦܐ ܘܬܡܳܢܰܝܡܐ ܘܬܫܰܥ ܘܬܡܳܢܝ (1889)، ܐܝܢܰܩܠܰܐ ܕܐܰܙܙܶܗ ܠܐܳܡܝܕ݂، ܐܷܫܬܰܥܣܰܪ ܒܟܳܢܘܢ ܐܘ ܩܰܡܳܝܐ، ܣܷܡܠܶܗ ܡܰܠܦܳܢܐ ܢܰܥܘܡ ܦܰܝܷܩ ܫܰܡܳܫܐ ܐܶܘܰܢܓܶܠܳܝܐ ܓ. ܡܰܠܦܳܢܐ ܒܐܘܪܗܳܝ ܒܚܰܐ ܡܰܝ ܝܰܘ̈ܡܶܐ ܐܰܙܙܶܗ ܠܐܘܪܗܳܝ ܓܰܒ ܐܘ ܐܰܒܪܳܐ ܕܘ ܥܰܡܡܰܝܕ݂ܶܗ. ܒܘ ܙܰܒܢܰܘܐ ܒܐܘܪܗܳܝ ܟܷܬܘܰܐ ܬܰܪܬܶܐ ܡܰܕܪ̈ܰܫܝܳܬ݂ܶܐ ܥܰܬܝ̈ܩܶܐ ܕܰܣ ܣܘܪ̈ܝܳܝܶܐ. ܚܕ݂ܐ ܡܰܢܢܶܗ ܕܝ ܥܝܬܐ ܕܡܳܪܝ̱ ܦܷܛܪܘܣ ܘܦܰܘܠܘܣ ܘܐܝ ܚܪܶܬܐ ܕܝ ܥܝܬܐ ܕܡܳܪܝ̱ ܔܷܪܔܝܣ ܘܰܐ. ܢܰܥܘܡ ܦܰܝܷܩ ܗܰܘܝ ܡܰܠܦܳܢܐ ܒܐܘܪܗܳܝ ܒܝ ܡܰܕܪܰܫܬܐ ܕܝ ܥܝܬܐ ܕܡܳܪܝ̱ ܦܷܛܪܘܣ ܘܦܰܘܠܘܣ. ܒܘ ܙܰܒܢܰܘܐ ܣܳܝܰܡܘܰܐ ܥܘܩܳܒܐ ܘܒܘܨܳܝܐ ܕܰܟ ܟܬ݂ܳܘ̈ܶܐ ܕܘ ܒܶܝܬ݂ܐܰܪ̈ܟܶܐ ܕܝ ܥܝܬܐ. ܕ. ܒܣܰܡܣܰܛ ܒܷܬܷܪ ܒܙܰܒܢܐ ܐܘ ܡܰܠܦܳܢܐ ܐܰܙܙܶܗ ܠܣܰܡܣܰܛ ܕܐܰܕܝـܝܰܡܰܢ. ܟܷܬܘܰܐ ܚܶܕ݂ܷܪ ܚܰܡܫܝ ܐܝܩܰܪ̈ܝܳܬ݂ܶܐ ܣܘܪ̈ܝܳـܝܶܐ ܒܣܰܡܣܰܛ ܘܡܰܠܦܳܢܐ ܢܰܥܘܡ ܦܰܝܷܩ ܡܰܩܪܶܘܰܐ ܠܰܢ ܢܰܥܝ̈ܡܰܬ݂ܬ݂ܶܗ. ܬܰܡܐ ܣܬܶܐ ܚܳـܝܰܪܘܰܐ ܒܰܟ ܟܬ݂ܳܘ̈ܶܐ ܕܟܷܬܘܰܐ ܘܣܳܝܰܡܘܰܐ ܥܘܩܳܒܐ ܐܰܦ݁ܦ݁ܶܗ. ܐܶܠܐ ܒܘ ܙܰܒܢܰܘܐ ܢܰܦܷܠ ܒܘ ܟܶܘܐ ܕܝ ܡܰܠܰܐܪܝܰܐ ܘܔܒܝܪ ܕܕܳܥܷܪ ܠܐܳܡܝܕ݂. ܒܷܬ݂ܷܪ ܡܶܐ ܕܕܰܥܷܪ ܠܐܳܡܝܕ݂ ܒܰܝ ܝܰܘܡܳܬ݂ܶܐ ܕܚܰܣܝܐ ܥܰܒܕܰܠܠܰܗ ܒܝ ܫܰܬܐ ܕܰܢ ܐܰܠܦܐ ܘܬܡܳܢܰܝܡܐ ܘܬܷܫܥܝ (1890) ܕܝܣܰܐ ܗܰܘܝ ܡܰܠܦܳܢܐ ܒܝ ܡܰܕܪܰܫܬܐ ܕܰܣ ܣܘܪ̈ܝܳܝܶܐ ܗ. ܪܕ݂ܘܦܝܐ ܒܐܳܡܝܕ݂ (1895) ܢܰܥܘܡ ܦܰܝܷܩ، ܒܷܬ݂ܷܪ ܡܶܐ ܕܡܰܘܠܰܦܠܶܗ ܐܰܪܒܰܥ ܐܷܫ̈ܢܶܐ ܒܐܳܡܝܕ݂، ܛܪܶܠܶܗ ܡܝ ܡܰܠܦܳܢܘܬ݂ܐ، ܒܢܝܫܐ ܕܐܷܙܙܶܗ ܠܒܰܝܪܘܬ ܘܩܳܪܶܐ ܬܰܡܐ ܒܚܰܐ ܡܰܒ ܒܶܝܬ݂ܨܰܘ̈ܒܶܐ. ܐܶܠܐ ܗܝـܝܶܐ ܒܘ ܙܰܒܢܐ ܕܟܷܬܘܰܝܠܶܗ ܐܘ ܪܷܢܝܰܢܐ ܐܰܘܟܝܬ݂ ܥܷܣܪܝ ܒܟܳܢܘܢ ܐܘ ܩܰܡܳܝܐ ܒܝ ܫܰܬܐ ܕܰܢ ܐܰܠܦܐ ܘܬܡܳܢܰܝܡܐ ܘܚܰܡܡܷܫ ܘܬܷܫܥܝ (1895)، ܗܰܘܝ ܪܕ݂ܘܦܝܐ ܡܩܰܒܷܠ ܕܰܡ ܡܫܝ̈ـܚܳܝܶܐ ܒܝ ܦܢܝܬ݂ܐ ܓܰܘܳܢܳܐܝܬ݂. ܐܰܝ ܝܰܘ̈ܡܳܬ݂ܰܢܷܟ ܓ݂ܱܠܱܒܶܐ ܗܰܘܷܢ ܥܰܣ̈ܩܶܐ ܠܘ ܥܰܡܐ ܣܘܪܝܳܝܐ. ܦܰܛܷܪܝܰܪܟ݂ܐ ܥܰܒܕܐܠܡܱܣܝܚ ܬܪܰܝܳܢܐ، ܡܶܩܷܡ ܕܷܡܫܰܪܶܐ ܐܘ ܪܕ݂ܘܦܝܐ ܒܬܰܪܬܶܐ ܫܳܥܶܐ، ܐܰܙܙܶܗ ܠܐܳܡܝܕ݂. ܐܰܬ݂ܝܘܰܝܠܶܗ ܙܡܝܢܘܬܐ ܡܘ ܗܝܓ݂ܡܘܢܐ ܕܐܳܡܝܕ݂، ܕܟܷܬܘܰܐ ܐܷܫܡܶܗ ܐܱܢܝܣ ܦ݁ܰܫܰܐ. ܒܘ ܡܰܙܠܰܢܐ ܕܘ ܦܰܛܷܪܝܰܪܟ݂ܐ ܠܐܳܡܝܕ݂، ܐܰܣ ܣܘܪ̈ܝܳـܝܶܐ ܕܝ ܡܕ݂ܝܢ̱ܬܐ ܠܐ ܚܙܰܠܠܶܗ ܚܘܣܪܳܢܐ ܓ݂ܱܠܱܒܶܐ ܘܐܝ ܥܺܕܬܐ ܕܝܳܠܕܰܬ݂ ܐܠܳܗܐ ܗܰܘܝܳܘܰܐ ܒܶܝܬ݂ܓܰܘܣܐ ܠܡܷܢܝܳܢܐ ܪܰܒܐ ܕܷܡܫܝ̈ـܚܳܝܶܐ. ܒܷܬ݂ܷܪ ܡܷܐ ܕܟܰܠܝ ܐܘ ܪܕ݂ܘܦܝܰܢܐ، ܐܘ ܥܰܡܳܐ ܕܟܷܬܘܰܐ ܒܝ ܥܺܕܬܐ ܕܝܳܠܕܰܬ ܐܰܠܳܗܐ ܢܰܦܷܩ ܘܰܐܙܙܶܗ ܟܘܠ ܚܰܐ ܡܰܢܢܶܗ ܠܘ ܒܰܝܬܰܝܕ݂ܶܗ. ܢܰܥܘܡ ܦܰܝܷܩ ܣܬܶܐ ܥܰܡ ܐܘ ܥܰܡܐ ܒܝ ܥܺܕܬܐ ܘܰܐ ܘܩܪܶܘܰܝܠܶܗ ܚܰܐ ܡܝܡܪܐ ܕܷܟܬ݂ܘܘܰܝܠܶܗ ܠܰܔܰܢ ܐܘ ܐܝܩܳܪܐ ܦܰܛܷܪܝܰܪܟ݂ܐ ܘ. ܒܚܷܡܷܨ ܢܰܥܘܡ ܦܰܝܷܩ، ܒܷܬ݂ܷܪ ܡܘ ܡܶܕܶܐ ܕܗܰܘܝ ܒܝ ܦܢܝܬ݂ܐ ܥܰܠ ܐܘ ܥܰܡܐ ܡܫܝـܚܳܝܐ، ܒܰܢ ܐܰܠܦܐ ܘܬܡܳܢܰܝܡܐ ܘܫܶܬ݂ ܘܬܷܫܥܝ (1896) ܐܰܙܙܶܗ ܠܝ ܡܕ݂ܝܢـܬܐ ܕܚܷܡܷܨ ܕܣܘܪܝـܝܰܐ ܘܡܫܰܪܶܠܶܗ ܢܰܩܠܰܐ ܚܪܶܬܐ ܒܝ ܡܰܠܦܳܢܘܬ݂ܐ ܒܷܚܕ݂ܐ ܡܰܕܪܰܫܬܐ ܬܰܡܐ. ܕܝܣܰܐ ܣܳܝܰܡܘܰܐ ܥܘ̈ܩܳܒܶܐ ܒܰܟ ܟܬ݂ܳܘ̈ܶܐ ܕܟܷܬܘܰܝܢܶܐ ܬܰܡܐ. ܐܘ ܡܰܠܦܳܢܐ ܦܰܝܷܫ ܐܰܪܒܥܐ ܝܰܪ̈ܚܶܐ ܒܚܷܡܷܨ ܘܡܶܐ ܬܰܡܐ، ܒܘ ܝܰܪܚܐ ܕܐܝܠܘܠ، ܐܰܙܙܶܗ ܠܒܰܝܪܘܬ ܘܢܰܚܷܬ ܒܷܚܕ݂ܐ ܕܰܝܪܐ ܐܷܫܡܰܗ ܫܰܪܦܶܐ. ܒܷܬ݂ܷܪ ܡܶܐ ܕܣܷܡܠܶܗ ܐܰܒ ܒܘ̈ܚܳܢܰܝܕ݂ܶܗ ܥܰܠ ܐܰܟ ܟܬ݂ܰܘ̈ܝܳܬ݂ܶܐ ܕܟܷܬܘܰܝܢܶܐ ܒܘ ܒܶܝܬ݂ܐܰܪ̈ܟܶܐ ܕܝ ܕܰܝܪܰܬ݂ܶܐ، ܐܰܙܙܶܗ ܒܘ ܕܰܪܒܐ ܕܘ ܝܰܡܳܐ ܠܝܰܦܰܐ ܘܡܶܐ ܬܰܡܐ ܣܬܶܐ ܠܐܘܪܷܫܠܶܡ ܙ. ܒܐܘܪܷܫܠܶܡ ܗܝـܝܶܐ ܒܐܘܪܷܫܠܶܡ ܝܳܬܰܘܘܰܐ ܒܝ ܕܰܝܪܐ ܕܡܳܪܝ̱ ܡܰܪܩܘܣ. ܒܘ ܙܰܒܢܰܘܐ ܐܝ ܡܕܰܒܪܳܢܘܬ݂ܐ ܕܝ ܕܰܝܪܐ ܒܐܝܕ݂ܶܗ ܕܚܰܣܝܐ ܔܷܪܔܝܣ ܘܰܐ. ܐܶܠܐ ܡܰܠܦܳܢܐ ܢܰܥܘܡ ܦܰܝܷܩ ܐܝܢܰܩܠܰܐ ܕܡܰܫܷܟܠܶܗ ܕܠܐ ܟܳܐܬ݂ܶܐ ܥܘܕܪܳܢܐ ܘܣܡܳܟ݂ܐ ܡܘ ܚܰܣܝܐ ܠܰܝ ܝܳܠܘ̈ܦܶܐ ܕܟܷܬܘܰܝܢܶܐ ܒܒܰܝܪܘܬ، ܛܪܶܠܶܗ ܡܘ ܚܷܠܡܰܝܕ݂ܶܗ ܕܘ ܩܪܳܝܐ ܒܘ ܒܶܝܬ݂ܨܰܘܒܐ ܘܕܰܥܷܪ ܠܐܳܡܝܕ݂ ܥܰܡ ܚܰܐ ܡܰܚ ܚܰܘܪ̈ܳܢܰܝܕ݂ܶܗ ܕܝ ܢܰܥܡܘܬ݂ܐ ܕܟܷܬܘܰܐ ܐܷܫܡܶܗ ܬܳܡܰܣ ܡܘܡܔܘ ܚ. ܓܘܳܪܐ ܘܢܰܥܝ̈ܡܶܐ ܒܷܬ݂ܷܪ ܡܶܐ ܕܕܰܥܷܪ ܠܐܳܡܝܕ݂ ܓܰܘܷܪ ܥܰܡ ܥܠܰܝܡܬ݂ܐ ܐܷܫܡܰܗ ܠܘܣܝ ܐܝ ܒܰܪܬ݂ܐ ܕܩܘܪܝܰܩܘܣ ܟ݂ܷܕܷܪܫܰܗ. ܡܘ ܓܘܳܪܰܢܐ ܗܰܘܷܢ ܚܰܡܫܐ ܢܰܥܝ̈ܡܶܐ، ܐܶܠܐ ܡܰܝܺـܝܬ݂ܝ ܬܠܳܬ݂ܐ ܡܰܢܢܶܗ ܘܦܰܝـܝܫܝ ܬܰܪܬܶܐ ܒܢܳܬ݂ܶܐ ܒܷܠܚܘܕ݂ܶܗ. ܐܰܬ ܬܰܪܬܶܐ ܒܢܳܬ݂ܰܝ̈ܕ݂ܶܗ ܒܷܬ݂ܷܪ ܡܶܐ ܕܓܰܘܝܪܝ ܐܰܙܙܷܢ ܠܐܰܡܶܪܝܟܰܐ ܛ. ܟܬ݂ܳܘ̈ܶܐ ܥܰܬܝ̈ܩܶܐ ܒܡܰܪܕܶܐ ܢܰܥܘܡ ܦܰܝܷܩ ܒܰܢ ܐܰܠܦܐ ܘܬܫܰܥܡܐ ܘܐܰܪܒܰܥ (1904) ܕܝܣܰܐ ܗܰܘܝ ܡܰܠܦܳܢܐ ܒܐܳܡܝܕ݂. ܥܰܡ ܓܰܒܶܗ ܕܘ ܬܶܘܠܝܦܐ ܟܳܬ݂ܰܘܘܰܐ ܐܰܢ ܐܶܓܰܪ̈ܝܳܬ݂ܶܐ ܕܕܰܝܪܳܝܐ ܐܰܠܝܰܐܣ ܫܰܟܷܪ ܒܰܢ ܐܰܠܦܐ ܘܬܫܰܥܡܐ ܘܚܰܡܡܷܫ (1905) ܥܰܡ ܓܘܕܐ ܕܚܰܘܪ̈ܳܢܶܐ ܐܰܙܙܶܗ ܠܡܰܪܕܶܐ ܠܝ ܕܰܝܪܐ ܕܘ ܙܰܥܦܱܪܰܢ. ܢܰܥܘܡ ܦܰܝܷܩ ܛܪܶܠܶܗ ܕܐܰܟ ܟܬ݂ܳܘ̈ܶܐ ܥܰܬܝ̈ܩܶܐ ܕܟܷܬܘܝܢܶܐ ܒܝ ܕܰܝܪܐ ܕܡܝܒܰܚܢܝ ܘܡܝܦܰܬܫܝ. ܗܝـܝܶܐ ܬܰܡܐ ܗܘܠܶܗ ܡܰܡܠܐ ܒܘ ܝܰܘܡܐ ܕܘ ܙܘܝܳܚܐ ܕܘ ܫܘܠܛܳܢܐ ܒܘ ܒܷܢܝܳܢܐ ܕܝ ܚܟܘܡܶܐ ܕܡܰܪܕܶܐ ܝ. ܐܘ ܫܘܪܳܝܐ ܕܘ ܐܰܓ݂ܘܢܐ ܐܘܡܬ݂ܳܢܳܝܐ ܒܰܢ ܐܰܠܦܐ ܘܬܫܰܥܡܐ ܘܬܡܳܢܶܐ (1908) ܐܝ ܫܘܠܛܢܘܬ݂ܐ ܕܰܥ ܥܘ̈ܬ݂ܡܰܢܳܝܶܐ ܡܰܘܦܰܩܠܰܗ ܩܳܢܘܢܐ ܕܣܷܡܠܶܗ ܫܘܚ̈ܠܳܦܶܐ ܒܘ ܟܷܢܫܐ. ܥܡ ܐܘ ܩܳܢܘܢܰܢܐ ܗܰܘܝ ܪܡܳܫܐ ܒܰܝܢ ܐܘ ܥܰܡܐ ܣܘܪܝܳܝܐ ܣܬܶܐ. ܢܰܥܘܡ ܦܰܝܷܩ ܙܷܕܬܷܪ ܩܰܘܝ ܒܘ ܪܷܢܝܐ ܕܟܷܬܘܰܝܠܶܗ ܘܡܰܚܘܶܠܶܗ ܐܰܓ݂ܘܢܐ ܠܰܔܰܢ ܐܰܙ ܙܷܕܩܶܐ ܕܘ ܥܰܡܰܝܕ݂ܶܗ. ܡܫܰܪܶܠܶܗ ܕܦܳܠܰܚ ܠܘ ܓܳܪܰܐܢ ܕܘ ܢܝܫܐ ܘܕܝ ܦܳ݁ܠܝܛܝܩܰܐ ܕܚܰܐ ܚܘܕ݂ܪܳܐ ܐܷܫܡܶܗ ܐܝܢܬܝܒܰܐܗ ܐܰܘܟܝܬ݂ ܥܝܪܘܬ݂ܐ. ܐܰܟ ܟܬ݂ܰܘ̈ܝܳܬ݂ܶܐ ܕܘ ܚܘܕ݂ܪܐ، ܗܝـܝܶܐ ܟܳܬ݂ܰܘܘܰܠܠܶܗ. ܒܷܬ݂ܷܪ ܒܫܰܢ̱ܬܐ ܡܫܰܪܶܠܶܗ ܒܐܳܡܝܕ݂ ܒܘ ܛܒܳܥܐ ܕܷܝ ܡܓ݂ܰܠܬ݂ܐ ܕܟܰܘܟܒܐ ܕܡܰܕܷܢܚܐ. ܒܥܰܝܢܝ ܙܰܒܢܐ ܡܕܰܘܰܡܘܰܐ ܒܝ ܡܰܠܦܳܢܘܬ݂ܰܝܕ݂ܶܗ، ܐܳܒܶܘܰܐ ܬܘܪܓܳܡܶܐ، ܣܳܝܰܡܘܰܐ ܟܢܘ̈ܫܝܶܐ ܘܦܳܠܰܚܘܰܐ ܠܰܔܰܢ ܕܡܷܦܬܳܚـܝ ܡܰܕܪ̈ܰܫܝܳܬ݂ܶܐ ܘܡܰܛܒܰܥ̈ܝܳܬ݂ܶܐ ܚܰܕ̱̈ܬ݂ܶܐ. ܐܘ ܙܰܒܢܐ ܟܘܠܶܗ ܫܓ݂ܝܡܳܝܐ ܘܰܐ ܒܘ ܦܘܠܚܳܢܐ ܦܳܠܝܛܝܩܳܝܐ ܕܘ ܥܰܡܐ ܘܕܝ ܐܘܡܬ݂ܰܝܕ݂ܶܗ. ܡܕܰܘܰܡܠܶܗ ܗܰܘܟ݂ܰܐ ܒܐܳܡܝܕ݂ ܗܘܠ ܠܝ ܫܰܬܐ ܕܐܰܢ ܐܰܠܦܐ ܘܬܫܰܥܡܐ ܘܬܪܰܥܣܰܪ (1912). ܝܐ. ܡܰܙܠܐ ܠܐܰܡܶܪܝܟܰܐ ܬܪܶܐ ܘܥܷܣܪܝ ܒܐܝܠܘܠ ܐܰܠܦܐ ܘܬܫܰܥܡܐ ܘܬܪܰܥܣܰܪ (22-09-1912) ܠܰܔܰܢ ܕܷܐܷܙܙܶܗ ܠܐܰܡܶܪܝܟܰܐ ܢܰܦܷܩ ܡܶܐ ܐܳܡܝܕ݂ ܘܐܰܙܙܶܗ ܠܒܰܝܪܘܬ. ܚܰܡܫܐ ܒܟܳܢܘܢ ܐܘ ܩܰܡܳܝܐ ܗܝـܝܶܐ ܘܐܝ ܐܝܩܰܪܬ݂ܰܝܕ݂ܶܗ ܡܰܛܷܢ ܠܐܰܡܶܪܝܟܰܐ. ܐܝ ܥܷܠܬ݂ܐ ܕܷܛܪܶܠܰܗ ܕܢܰܥܘܡ ܦܰܝܷܩ ܕܢܳܦܷܩ ܘܛܳܪܶܐ ܡܘ ܐܰܬ݂ܪܐ، ܐܘ ܪܕ݂ܘܦܝܐ ܘܰܐ ܕܗܰܘܝ ܒܘ ܙܰܒܢܐ ܕܘ ܩܪܳܒܐ ܕܷܛܪܰܒܠܘܣ ܕܠܝܒܝܰܐ ܥܰܠ ܐܰܥ ܥܰܡܶܐ ܡܫܝ̈ـܚܳܝܶܐ، ܕܬܰܚܬ ܐܝ ܫܘܠܛܢܘܬ݂ܐ ܥܘܬ݂ܡܰܢܰܝܬܐ. ܒܘ ܙܰܒܢܰܘܐ ܓ݂ܱܠܱܒܶܐ ܡܰܡ ܡܫܝ̈ـܚܳܝܶܐ ܡܓܰܠܘܰܠܠܶܗ ܘܚܰܐ ܡܰܢܝ ܣܬܶܐ ܢܰܥܘܡ ܦܰܝܷܩ ܘܰܐ ܝܒ. ܒܐܰܡܶܪܝܟܰܐ ܢܰܥܘܡ ܦܰܝܷܩ ܗܰܘܝܘܰܐ ܡܫܰܡܗܐ ܓ݂ܱܠܱܒܶܐ ܡܰܦ ܦܘܠ̈ܚܳܢܶܐ ܕܣܳܝܰܡܘܰܐ. ܐܰܟ ܟܬ݂ܰܘ̈ܝܳܬ݂ܰܝܕ݂ܶܗ ܡܷܦܪܳܣܝܘܰܐ ܒܰܡ ܡܓ̈ܰܠܶܐ ܕܐܝܢܬܝܒܰܐܗ ܘܕܟܰܘܟܒܐ ܕܡܰܕܷܢܚܐ، ܕܡܝܫܰܕܪܳܘܰܐ ܠܐܰܡܶܪܝܟܰܐ ܣܬܶܐ. ܟܷܬܘܰܐ ܬܰܡܐ ܢܳܫ̈ܶܐ ܓ݂ܱܠܱܒܶܐ ܕܷܡܝܰܩܪܝܘܰܝܠܶܗ ܡܰܟ ܟܬ݂ܰܘ̈ܝܳܬ݂ܰܝܕ݂ܶܗ، ܡܰܘܟ݂ܰܐ ܒܐܰܡܶܪܝܟܰܐ ܣܬܶܐ ܡܫܰܪܶܠܶܗ ܕܦܳܪܷܣ ܣܦܰܪܝܰܘܡܐ ܠܰܣ ܣܘܪ̈ܝܳـܝܶܐ. ܐܳܒܰܥܘܰܐ ܕܡܰܚܷܬ ܓܷܫܪܐ ܒܰܝܢ ܐܰܣ ܣܘܪ̈ܝܳܝܶܐ ܕܐܰܡܶܪܝܟܰܐ ܘܕܘ ܐܰܬ݂ܪܐ. ܒܰܢ ܐܰܠܦܐ ܘܬܫܰܥܡܐ ܘܐܷܫܬܰܥܣܰܪ (1916) ܡܰܘܦܰܩܠܶܗ ܣܦܰܪܝܰܘܡܐ ܚܪܶܢܐ ܐܷܫܡܶܗ ܒܶܝܬ݂ܢܰܗܪܝܢ. ܐܰܟ ܟܬ݂ܰܘ̈ܝܳܬ݂ܶܐ ܕܓܰܘܶܗ ܡܷܦܪܳܣܝܘܰܐ ܒܷܬܠܳܬ݂ܐ ܠܶܫ̈ܳܢܶܐ: ܒܘ ܣܘܪܝܳܝܐ، ܒܘ ܥܰܪܰܒܳܝܐ ܘܒܘ ܬܘܪܟܳܝܐ. ܐܘ ܣܦܰܪܝܰܘܡܰܢܐ ܡܕܰܘܰܡܠܶܗ ܒܘ ܛܒܳܥܐ ܘܦܪܳܣܐ ܫܶܬ݂ ܐܷܫܢܶܐ ܒܰܢ ܐܰܠܦܐ ܘܬܫܰܥܡܐ ܘܚܕ݂ܐ ܘܥܷܣܪܝ (1921) ܗܰܘܝ ܡܕܰܒܪܳܢܐ ܕܷܣܦܰܪܝܰܘܡܐ ܚܪܶܢܐ، ܐܷܫܡܶܗ ܐܝܬܬܝـܚܰܐܕ. ܒܷܬ݂ܷܪ ܡܶܐ ܕܷܦܠܷܚܠܶܗ ܙܰܒܢܐ ܒܘ ܣܦܰܪܝܰܘܡܰܢܐ، ܕܝܣܰܐ ܦܬܷܚܠܶܗ ܐܘ ܣܦܰܪܝܰܘܡܐ ܕܒܶܝܬ݂ܢܰܗܪܝܢ ܘܡܕܰܘܰܡܠܶܗ ܒܘ ܬܘܦܝܩܰܝܕ݂ܶܗ ܗܘܠ ܠܝ ܚܰܪܰܝܬܐ ܕܰܚ ܚܰـܝ̈ܰـܝܕ݂ܶܗ. ܡܶܐ ܓܰܒܐ ܦܳܠܰܚܘܰܐ ܒܘ ܣܦܰܪܝܰܘܡܐ ܘܡܶܐ ܓܰܒܐ ܚܪܶܢܐ ܡܰܘܦܰܩܘܰܐ ܡ̈ܓ݂ܰܠܶܐ، ܛܳܒܰܥܘܰܐ ܟܬ݂ܳܘ̈ܶܐ ܘܡܰܘܠܰܦܘܰܐ ܐܘ ܠܶܫܳܢܳܐ ܣܘܪܝܳܝܐ ܠܰܢ ܢܰܥܝ̈ܡܶܐ ܕܰܣ ܣܘܪ̈ܝܳܝܶܐ ܒܐܰܡܶܪܝܟܰܐ. ܐܳܒܶܘܰܐ ܝܘܩܪܐ ܠܰܥ ܥܠܰܝ̈ܡܶܐ ܕܥܷܒܪܝ ܠܰܚ ܚܘܕ݂ܪ̈ܶܐ ܠܰܔܰܢ ܕܩܳܘܷܢ ܒܝ ܐܘܡܬ݂ܳܢܳܝܘܬ݂ܰܬ݂ܬ݂ܶܗ ܘܡܰܩܘܷܢ ܐܝ ܗܝـܝܘܬ݂ܰܬ݂ܬ݂ܶܗ ܝܓ. ܐܘ ܡܰܘܬܰܝܕ݂ܶܗ ܒܰܢ ܐܰܠܦܐ ܘܬܫܰܥܡܐ ܘܫܘܰܥ ܘܥܷܣܪܝ (1927) ܡܚܰܣܝܐ ܠܘܣܝ، ܐܝ ܐܰܬ݂ܬܐ ܕܢܰܥܘܡ ܦܰܝܷܩ. ܬܠܰܬ݂ ܐܷܫܢܶܐ ܒܷܬ݂ܷܪ ܡܝ ܐܰܬ݂ܬܰܝܕ݂ܶܗ ܡܚܰܣܶܐ ܢܰܥܘܡ ܦܰܝܷܩ ܚܰܡܫܐ ܒܐܷܫܘܷܛ ܐܰܠܦܐ ܘܬܫܰܥܡܐ ܘܬܠܶܬ݂ܝ (05-02-1930) ܒܢܝܘ ܔܷܪܙܝ ܒܐܰܡܶܪܝܟܰܐ ܘܣܝܡ ܐܘ ܥܘܦܳܝܰـܝܕ݂ܶܗ ܒܙܘܝܳܚܐ ܪܰܒܐ. Kaṯowo: Malfono Qawme Dik d be Qawme |
