ܢܦܩܠܗ ܡܢܝܢܐ ܚܕܬܐ ܡܢ ܡܓܠܬܐ ܕܒܢܐܦܠ ܗܘ ܕܛܥܢ ܫܫܠܬܐ (52) ܡܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ، ܒܬܪܝܢ ܢܘܣܟ̈ܐ ܘܪܩܝܐ ܘܐܠܟܬܪܘܢܝܐ، ܘܐܬܝܠܗ ܡܢܝܢܐ ܡܠܝܐ ܒܡܠܘ̈ܐܐ ܥܬܝܪ̈ܐ ܘܒܘܨܝ̈ܐ ܘܕܪ̈ܫܝܬܐ ܡܫܚܠܦ̈ܐ.
ܘܫܘܪܐܠܗ ܡܢܝܢܐ ܒ(ܡܠܬܐ ܕܦܘܬܚܐ)، ܕܐܬܝܠܗ ܓܘܗܿ ܡܓܠܬܐ ܕ(ܒܢܐܦܠ) ܡܬܘܡܡܠܐ ܫܢ̄ܬܗܿ ܕܥܣܪܝܢ ܘܫܬ، ܟܕ ܢܦܩܠܗ ܡܢܝܢܐ ܩܕܡܝܐ ܡܢܗܿ ܫܢ̄ܬܐ ܕ(1998) ܘܗܠ ܐܕܝܘܡ ܐܡܝܢܝܬܐܝܠܗܿ ܒܢܘܦܩܐ ܒܛܒܘܬܐ ܕܩܪ̈ܘܝܗܿ ܡܝܩܪ̈ܐ ܘܟܬܘܒ̈ܗܿ ܘܡܕܒܪܢܘܬܗܿ.
ܘܡܘܒܝܢܗ ܦܘܬܚܐ ، (ܐܝܡܢ ܕܩܪܘܚ ܡܢܝܢܐ ܚܕܬܐ ܡܢ (ܒܢܐܦܠ) ܒܪܓܼܘܫ ܕܡܪܕܘܬܢ ܗܠ ܕܗܐ ܒܛܒܬܐܝܠܗܿ ܘܟܬܘܒܝ̈ܢ ܐܡܝܢܝ̈ܐܝܠܝܗܝ ܒܡܙܝܕܬܢ ܒܒܘܨܝ̈ܐ ܛܝܡܢ̈ܐ ܘܨܚܚ̈ܐ ܣܦܪ̈ܝܐ ܘܗܢ ܡܢܕܝ ܟܕܪܐ ܓܘܢ ܣܒܼܪܐ، ܒܥܠܬܐ ܕܩܢܝ̈ܐ ܕܡܘܪ̈ܕܢܐ ܠܐ ܡܟܠܝܠܗܘܢ ܣܝܦ̈ܐ ܘܪ̈ܘܡܚܐ ܘܩܠܐ ܕܓܘܠܠ̈ܐ،
ܘܚܒܫܐ ܡܢܬܐ ܥܪܒܝܬܐ ܡܢ ܡܓܠܬܐ ܡܐܡܪ̈ܐ ܘܕܪ̈ܫܝܬܐ ܛܝܡܢ̈ܐ ܘܥܡܝܩ̈ܐ ܡܢܝܗܝ ܡܐܢ̈ܐ ܡܘܣܝܩܝ̈ܐ ܒܐܬܪܐ ܕܒܝܬ ܢܗܪܝܢ ܒܝܕ (ܢܝܢܘܣ ܫܠܝܡܘܢ ܝܘܣܦ ) ܡܢ ܣܘܝܕ، ܘܥܡ ܕܪܫܬܐ ܦܝܫܠܗܿ ܡܛܝܒܬܐ ܒܝܕ( ܪܐܟܐܢ ܦܪܓ̰) ܚܒܫܐ ܬܪܡܝܬܐ ܕܡܠܟܐ ܣܢܚܪܝܒ ܠܬܪܘܝܬܐ ܕܡܕܝܢ̄ܬܐ ܕܐܪܒܝܠ، ܘܒܚܩܠܐ ܣܦܪܝܐ ܟܬܒܠܗ (ܓ̰ܒܘ ܒܗܢܡ) ܥܠ ܟܘܢܫ ܡܘܫ̈ܚܬܐ ܕܡܚܘܪܐ (ܣܡܝܪ ܚܘܪܐܢܝ) ܗܘ ܕܢܦܩܠܗ ܒܡܬܚܐ ܐ̄ܚܪܝܐ ܒܫܡܐ ܕ(ܟܪ̈ܟܬܐ ܕܚܠܡ̈ܐ ܕܬܫܪ̈ܝܬܐ -تلافيف احلام الخريف)، ܘܚܒܫܠܗܿ ܗܕ ܡܢܬܐ ܡܕܟܪܬܐ ܠܫܘܦܐ ܡܬܢܝܢܐ ܘܫܘܥܝܬܢܝܐ ܡܫܢܝܐ (ܣܥܕܝ ܐܠܡܐܠܚ) ܟܕ ܟܬܒܠܗ ܥܠܗ ܣܦܪܐ (ܗܝܬܡ ܒܗܢܡ ܒܘܪܕܐ) ܡܐܡܪܐ ܒܫܡܐ ܕ(ܡܙܕܡܢܢܘ̈ܬܐ ܒܡܝܩܪܘܬܐ ܕܣܦܪܐ ܣܥܕܝ ܐܠܡܐܠܚ- (انثيالات في حضرة الاديب سعدي المالح )
ܘܚܒܫܠܗ ܡܢܝܢܐ ܡܐܡܪ̈ܐ ܘܡܘܫ̈ܚܬܐ ܘܨܚܚ̈ܐ ܡܚܪ̈ܝܐ ܡܫܚܠܦ̈ܐ، ܥܡ ܛܒ̈ܐ ܘܟܫܝܪ̈ܘܬܐ ܕ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܡܬܚܐ ܥܒܝܪܐ.
ܘܚܒܫܠܗܿ ܡܢܬܐ ܣܘܪܝܝܬܐ ܬܦܩܬܐ ܐܪܝܟܬܐ ܚܕܪ ܢܘܣܝܐ ܐܡܢܝܐ ܕܐܡܢܐ ܣܘܟܡܝܐ (ܦܘܠ ܦܬܘ) ܡܢ ܐܘܚܕܢ̈ܐ ܡܚܝܕ̈ܐ ܐܡܪ̈ܝܟܝܐ، ܘܕܪܫܬܐ ܕܪܫܬܐ ܚܕܪ (ܥܣܩ̈ܘܬܐ ܘܚܘܦܛ̈ܐ ܕܡܠܦܢܘܬܐ ܒܠܫܢܐ ܝܡܝܐ ܒܓܠܘܬܐ) ܒܝܕ ܟܬܘܒܐ (ܐܢܘܪ ܐܬܘ) ܗܘ ܕܓܠܚ ܓܘܗ ܬܠܬܐ ܥܣܩ̈ܘܬܐ ܪ̈ܫܝܐ ܒܪܩܘܒܠ ܝܠܝܦܘܬܐ ܕܒܢܝ̈ ܓܠܘܬܐ ܠܫܢܢ ܣܘܪܬ ܘܡܘܚܫܚܠܗ ܡܐ ܕܚܙܐܠܗ ܛܒܐ ܠܣܡܣܡܬܝܗܝ ܡܢܗ، ܘܓܠܚ ܟܬܘܒܐ (ܥܐܕܠ ܕܢܘ) ܒܡܐܡܪܗ ܠܡܫܪ̈ܝܐ ܒܘܫ ܐܢܢܩܝ̈ܐ ܒܚܝܘܬܐ ܘܣܝܡ̈ܐ ܕܝܕܘܥܐ ܡܢܚܐ (ܒܢܝܡܢ ܚܕܐܕ)، ܘܒܚܩܠܐ ܣܦܪܝܐ ܩܪܘܚ ܬܪܝܢ ܡܫܘܚܝ̈ܬܐ ܒܠܫܢܐ ܣܘܪܝܝܐ ܚܕ ܡܢܝܗܝ ܕܟܬܘܒܐ ܘܡܚܘܪܐ (ܢܙܐܪ ܕܝܪܝܐ) ܘܐ̄ܚܪܝܬܐ ܠܣܦܪܐ (ܦܛܪܘܣ ܢܒܬܝ).
ܘܒܡܢܬܐ ܩܘܪܕܝܬܐ، ܚܒܫܠܗܿ ܡܓܠܬܐ ܡܐܡܪܐ ܥܠ ܡܢܚܐ (ܣܥܕܝ ܐܠܡܐܠܚ) ܘܫܘܬܦܝܬ̈ܗ ܒܚܩܠܐ ܡܪܕܘܬܢܝܐ ܒܝܕ ܟܬܘܒܐ ܩܘܪܕܝܐ (ܚܠܝܠ ܥܒܕܠܠܗ)، ܒܫܡܐ ܕ(ܣܥܕܝ ܐܠܡܐܠܚ، ܩܢܝܐ ܕܕܗܒܐ- سعدي المالح ، القلم الذهب) ܘܟܬܒܠܗ ܣܦܪܐ (ܗܐܘܙܝܢ ܨܠܝܒܐ) ܚܕܪ ܩܪܝܬܐ ܕܐܪܡܘܛܐ ܒܠܫܢܐ ܩܘܪܕܝܐ.
ܘܒܚܪܬܐ ܚܒܫܠܗܿ ܡܢܬܐ ܐܢܓܠܝܙܝܬܐ ܡܢ ܡܓܠܬܐ، ܕܪܫܬܐ ܘܡܢܝܢܐ ܡܢ ܟܫܝܪ̈ܘܬܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܡܬܚܐ ܥܒܝܪܐ ܘܗܠ ܥܕܢܐ ܕܢܘܦܩܐ ܕܗܢ ܡܢܝܢܐ.
ܘܦܝܫ ܕܟܝܪܐ، ܡܓܠܬܐ ܕ(ܒܢܐܦܠ) ܝܠܗܿ ܡܓܠܬܐ ܐܩܡܝܬܐ ܡܪܕܘܬܢܝܬܐ ܢܦܩܐ ܡܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܒܐܪܒܥܐ ܠܫܢ̈ܐ، ܣܘܪܝܝܐ، ܥܪܒܝܐ ، ܩܘܪܕܝܐ ܘܐܢܓܠܝܙܝܐ، ܘܡܪܐ ܕܦܘܪܫܢܐ ܘܙܝܪܐ ܕܡܪܕܘܬܐ ܘܥܠܝܡ̈ܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ، ܘܪܫ ܣܝܘܡܘܬܗܿ ܡܝܩܪܐ ( ܟܠܕܘ ܪܡܙܝ ܐܘܓܼܢܐ).
ܘܡܨܝܬܘܢ ܕܩܪܝܬܘܢ ܡܢܝܢܐ ܚܕܬܐ ܒܐܘܪܚܐ ܕܐܣܘܪܐ ܕܐܬܐ: