ܢܦܩܠܗ ܡܢܝܢܐ ܚܕܬܐ ܡܢ ܡܓܼܠܬܐ ܕܒܢܐܦܠ ܒܫܫܠܬܐ (53) ܡܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ، ܒܬܪܝܢ ܢܘܣܟܼ̈ܐ ܘܪܩܝܐ ܘܐܠܟܬܪܘܢܝܐ، ܘܐ̄ܬܐܠܗ ܡܢܝܢܐ ܡܠܝ̈ܐ ܒܡܠܘ̈ܐܐ ܥܬܝܪ̈ܐ ܘܒܘܨܝ̈ܐ ܘܕܪ̈ܫܝܬܐ ܡܫܚܠܦ̈ܐ.
ܘܚܒܫܠܗ ܡܢܝܢܐ (ܡܡܠܐ ܩܕܡܝܐ) ܐ̄ܬܐܠܗ ܓܘܗ، (ܥܡ ܫܡܥܬܐ ܕܩܠܐ ܚܝܠܢܐ ܕܛܝܣ̈ܝܬܐ ܘܥܒܪܬܐ ܕܡܐܢ̈ܐ ܕܡܘܬܐ ܘܬܠܚܬܐ ܒܝܘ̈ܡܬܐ ܥܒܝܪ̈ܐ، ܠܥܠ ܡܢ ܪ̈ܫܝܢ ، ܘܥܡ ܟܠ ܗܢ ܓܠܚܐ ܠܡܐܢ̈ܐ ܕܬܠܚܬܐ ܒܡܕܢܚܢ ܡܨܥܝܐ، ܘܩܐܡܢ ܡܪܕܘܬܢܝܐ ܐܡܝܢܝܐܝܠܗ ܒܩܠܗ ܘܛܘܝܒܗ ܥܠܝܐ، ܗܘ ܒܫ ܚܝܠܢܐ ܡܢ ܓܘܠܠܐ ܘܐܦ ܡܢ ܡܘܬܐ.
ܘܡܘܒܝܢܗ ܦܘܬܚܐ، ܕܡܓܠܬܐ ܕܒܢܐܦܠ ܢܦܩܠܗܿ ܒܡܢܝܢܗܿ ܚܕܬܐ (53) ܠܫܢ̄ܬܗܿ ܕܥܣܪܝܢ ܘܬܡܢܝܐ، ܫܒܘܩ ܡܢ ܟܠ ܐܝܟܢ̈ܘܬܐ ܒܩܪܒܐ ܐܘ ܒܫܝܢܐ، ܒܩܛܪܐ ܗܘܠܢܝܐ ܐܘ ܒܪܘܚܢܐ، ܘܐܕܝܘܡ ܢܦܩܐ ܘܢܨܚܐ ܥܠ ܟܠ ܥܣܩ̈ܘܬܐ ܘܩܛܪ̈ܐ، ܒܚܝܠܐ ܕܛܢܢ̈ܐ، ܘܟܬܘܒ̈ܗܿ، ܐܡܝܢܝܬܐܝܠܗܿ ܒܡܐܙܠܬܗܿ ܥܡܘܟܢ، ܒܣܦܪܐ ܠܟܠ ܡܐ ܕܚܕܪ ܒܗܘܢܘܟܢ ܘܩܢܝܘܟܢ ܚܐܪ̈ܐ ܡܢ ܕܪ̈ܫܝܬܐ ܘܡܐܡܪ̈ܐ ܡܙܝܕܝ ܥܬܝܪܘܬܐ ܠܩܐܡ ܡܪܕܘܬܢܝܐ ܒܐܬܪܐ.
ܘܚܒܫܐ ܡܢܬܐ ܥܪܒܝܬܐ ܡܢ ܡܓܠܬܐ ܡܐܡܪ̈ܐ ܘܕܪ̈ܫܝܬܐ ܡܫܚܠܦ̈ܐ، ܟܕ ܐܡܝܢܝܐܝܠܗ ܥܡܢ ܕܟܬܘܪ (ܐܒܪܐܗܝܡ ܐܠܢܨܪܝ) ܚܕܪ ܕܝܪ̈ܐ ܘܥ̈ܕܬܐ ܬܫܥܝܬܢܝ̈ܐ ܓܘ ܬܟܪܝܬ، ܘܐܝܬ ܡܐܡܪܐ ܚܕܪ ܟܘܢܫ ܡܘܫ̈ܚܬܐ ܕ(ܥܒܕܠܠܗ ܢܘܪܝ) ܕܟܬܘܒܐ (ܝܘܢܐܕܡ ܒܢܝܡܝܢ ܚܘܝܒܐܪ)، ܥܡ ܡܐܡܪܐ ܕܡܠܦܢܐ ܕܟܬܘܪ (ܥܐܡܪ ܥܒܕܠܠܗ ܐܠܓ̰ܡܝܠܝ) ܚܒܫ ܠܡܐܟܠ̈ܐ ܒܝܢ ܣܘܪܝܝܐ ܘܥܝܪܩܝܐ، ܫܩܝܠܐ ܡܢ ܠܥܙܐ ܥܝܪܩܝܐ ܣܘܕܝܐ ܚܕܛܘܦ̮ܣܐ.
ܘܚܒܫܐ ܡܢܬܐ ܥܪܒܝܬܐ ܐܦ ܗܕܟ ܡܐܡܪܐ ܥܠ ܡܫܝܚܝ̈ܐ ܕܗܢܕ ܒܫܡܐ ܕ(ܚܝܘܬܐ ܡܫܝܚܝܬܐ ܕܣܘܪ̈ܝܝܐ ܕܐܘܚܕܢܐ ܕܟܝܪܐܠܐ ܗܢܕܘܝܬܐ) ܟܡ ܟܬܒܠܗ ܠܡܓܠܬܐ (ܒܕܪܝ ܢܘܐܝܠ ܝܘܣܦ) ܡܢ ܣܘܝܕ، ܘܡܐܡܪܐ ܐ̄ܚܪܢܐ ܒܠܫܢܐ ܥܪܒܝܐ ܘܣܘܪܝܝܐ ܚܕܪ ܡܚܪ̈ܐ ܕ(ܐܝܣܚܩ ܕܐܢܛܝܘܟܝ) ܕܟܬܘܒܐ ܘܣܦܪܐ ܡܗܝܪܐ (ܒܫܝܪ ܛܘܪܝܐ)، ܥܡ ܡܐܡܪܐ ܒܫܡܐ (ܡܪܕܘܬܐ ܣܦܬܢܝܬܐ ܕܐܝܡܐ ܐܘܡܬܐ ܝܠܗܿ ܚܕܐ ܡܢ ܢܗܪ̈ܘܢܐ ܕܡܪܕܘܬܗܿ ܐܘܡܬܢܝ̈ܐ)، ܟܡ ܟܬܒܠܗ ܠܡܓܼܠܬܐ ܗܕܡܐ ܕܓܘܫܡܐ ܕܣܝܘܡܘܬܐ ܟܬܘܒܐ (ܦܛܪܘܣ ܢܒܬܝ).
ܘܐܦ ܗܕܟ ܚܒܫܠܗ ܡܢܝܢܐ ܡܐܡܪ̈ܐ ܘܡܘܫ̈ܚܬܐ ܘܨܚܚ̈ܐ ܡܚܪ̈ܝܐ ܡܫܚܠܦ̈ܐ، ܥܡ ܛܒ̈ܐ ܘܟܫܝܪ̈ܘܬܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܡܬܚܐ ܥܒܝܪܐ.
ܘܚܒܫܠܗܿ ܡܢܬܐ ܣܘܪܝܝܬܐ ܡܐܡܪܐ ܫܘܡܗܝܐ ܠܟܬܘܒܐ (ܐܟܕ ܡܘܪܕ)، ܚܒܫܠܗ ܣܥܘܪܘܬܐ ܕܩܕܝܫܘܬܗ ܕܦܦܐ ܡܢܚܐ (ܦܪܢܣܝܣ) ܠܒܓܼܕܕ ܘܐܪܒܝܠ ܘܣܥܘܪܘܬܗ ܠܡܘܨܠ ܘܒܓܼܕܝܕܐ ܘܚܝܪܬܗ ܚܕܪܫܝܬܐ ܠܡܐ ܕܥܒܕܠܗ ܛܘܟܣܐ ܕܕܥܫ ܡܢ ܚܪܒܬܐ ܘܬܠܚܬܐ ܒܥܕ̈ܬܐ ܘܕܝܪ̈ܐ ܘܥܡܠܝ̈ܬܐ ܐܡܝܢܝ̈ܐ ܠܬܢܝܬܐ ܕܒܢܝܬܝܗ.
ܘܐܦ ܗܕܟ ܚܒܫܠܗܿ ܡܢܬܐ ܣܘܪܝܝܬܐ ܡܢ ܡܓܠܬܐ ܡܐܡܪܐ ܒܫܡܐ ܕ(ܣܘܪܚܢܐ ܕܣܡܝܠܐ ܓܘ ܩܢܘܢܐ ܬܒܝܠܝܐ) ܬܢܐ ܓܘܗ ܟܬܘܒܐ ܘܣܢܐܓܼܪܐ (ܡܠܟܘ ܚܕܒܫܒܐ) ܡܢ ܕܗܘܟ ܚܕܪ ܥܠܠ̈ܬܐ ܕܗܢ ܣܘܪܚܢܐ ܘܚܘܟܡܝܗܝ ܠܦܘܬ ܩܢܘܢܐ ܬܒܝܠܝܐ، ܘܡܐܡܪܐ ܐ̄ܚܪܢܐ ܕܟܬܘܒܐ (ܝܘܣܦ ܒܓܬܫ) ܡܢ ܡܪܕܝܢ.
ܘܒܡܢܬܐ ܩܘܪܕܝܬܐ، ܚܒܫܠܗ ܡܓܠܬܐ ܬܪܝܢ ܡܐܡܪ̈ܐ، ܗܘ ܩܕܡܝܐ ܒܫܡܐ ܕ(ܡܫܝܚܝ̈ܐ ܒܙܒܢܐ ܡܠܟܝܐ) ܕܟܬܘܒܐ (ܚܠܝܠ ܥܒܕܠܠܗ)، ܘܡܐܡܪܐ ܐ̄ܚܪܢܐ ܥܠ ܡܕܝܢ̄ܬܐ ܕ(ܗܝܪܐܢ) ܒܝܕ (ܣܪܬܝܒܿ ܘܚܝܕ ܐܓܼܐ ܒܟ).
ܘܒܚܪܬܐ ܚܒܫܠܗܿ ܡܢܬܐ ܐܢܓܠܝܙܝܬܐ ܡܢ ܡܓܠܬܐ، ܬܦܩܬܐ ܥܡ ܡܣܟܡܢܝܬܐ ܕܐܣܟܝܡ̈ܐ (ܠܒܘܫ̈ܐ) ܥܠܝܡܬܐ (ܨܚܘܐ ܒܝܬ ܟܐܕܘ)، ܘܦܝܫܠܗܿ ܥܒܝܕܬܐ ܬܦܩܬܐ ܒܝܕ ܝܘܕܥܝܬܐ (ܡܐܪܓܪܝܬ ܐܕܘܪ). ܥܡ ܡܢܝܢܐ ܡܢ ܟܫܝܪ̈ܘܬܐ ܒܨܘܪ̈ܬܐ ܫܦܝܪ̈ܐ ܘܠܫܢ̈ܐ ܡܫܚܠܦ̈ܐ ܟܡܚܙܝ ܛܘܝܒܢ ܡܪܕܘܬܢܝܐ ܒܡܬܚܐ ܥܒܝܪܐ.
ܘܦܝܫ ܕܟܝܪܐ، (ܒܢܐܦܠ) ܝܠܗܿ ܡܓܠܬܐ ܫܘܚܠܦܝܬܐ ܡܪܕܘܬܢܝܬܐ ܢܦܩܐ ܡܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܒܐܪܒܥܐ ܠܫܢ̈ܐ ܝܠܝܗܝ (ܣܘܪܝܝܐ، ܥܪܒܝܐ، ܩܘܪܕܝܐ ܘܐܢܓܠܝܙܝܐ)، ܘܡܪܐ ܕܦܘܪܫܢܗܿ ܘܙܝܪܐ ܕܡܪܕܘܬܐ ܘܥܠܝܡ̈ܐ ܒܫܘܠܛܢܘܬܐ ܕܩܠܝܡܐ، ܘܪܫ ܣܝܘܡܘܬܗܿ (ܟܠܕܘ ܪܡܙܝ ܐܘܓܼܢܐ).
ܡܨܝܬܘܢ ܩܪܝܬܐ ܕܡܢܝܢܐ ܒܐܣܘܪܐ ܕܐܬܐ: