ܦܝܫܠܗܘܢ ܚܬܝܡ̈ܐ ܓܘ ܐܘܢܐ ܕܦܛܪܝܪܟܐ ܝܘܣܦ ܫܬܝܬܝܐ ܐܘܕܘ ܓܘ ܟܢܘܫܝܐ ܓܘܢܝܐ ܕܪܒܢܘܬܐ ܐܢܛܘܢܝܬܐ ܗܘܪܡܙܕܝܬܐ ܟܠܕܝܬܐ ܒܥܢܟܒܐ ܓܘ ܐܪܒܝܠ، ܝܘܡ ܫܒܬܐ 7 ܐܝܠܘܠ 2024، ܦܘܠܚܢ̈ܐ ܕܣܝܡܦܘܙܝܘܡ ܣܘܪܝܝܐ ܩܕܡܝܐ ܒܐܬܪܐ، ܗܘ ܕܦܝܫܠܗ ܡܛܘܟܣܐ ܒܝܕ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܩܢܛܪܘܢ ܕܝܘܢܢ ܗܘܙܝܐ ܕܒܘܨܝ̈ܐ ܘܕܪܫܝܬܐ ܕܥܬܝܕܝ̈ܐ، ܘܬ̄ܚܘܬ ܪܘܫܡܐ (ܣܘܪܝܝܘܬܐ ܡܪܕܘܬܼܐ ܚܝܬܐ ܡܬܥܫܢܐ ܐܣ̈ܐ ܕܡܩܘܝܢܘܬܢ).
ܘܫܘܪܐܠܗ ܝܘܡܐ ܬܠܝܬܝܐ ܘܐ̄ܚܪܝܐ ܦܘܠܚܢ̈ܗ، ܒܡܡܠܐ ܕܩܘܒܠܛܝܒܘܬܐ ܠܪܒܢܘܬܐ ܐܢܛܘܢܝܬܐ ܗܘܪܡܙܕܝܬܐ ܠܚܦܩܬܗܿ ܥܒܼܘܕܘ̈ܬܐ ܕܚܘܬܡܐ ܕܣܝܡܦܘܙܝܘܡ، ܥܡ ܡܩܪܒܬܐ ܕܩܘܒܠܛܝܒܘܬܐ ܠܪܥܝܐ ܕܡܪܥܝܬܐ ܕܐܪܒܝܠ ܟܠܕܝܬܐ ܡܪܝ (ܒܫܐܪ ܡܬܝ ܘܪܕܐ) ܘܪܫܢܘܬܐ ܕܒܝܬ ܨܘܒܐ ܩܬܘܠܝܩܝܐ ܓܘ ܐܪܒܝܠ.
ܘܚܒܫܠܗܘܢ ܝܬܒ̈ܝܬܐ ܕܝܘܡܐ ܬܠܝܬܝܐ، ܒܡܩܪܒܬܐ ܕܡܢܝܢܐ ܡܢ ܒܘܨܝ̈ܐ ܒܠܫܢܐ ܣܘܪܝܝܐ ܘܥܪܒܝܐ ܘܐܢܓܠܝܙܝܐ، ܘܐ̄ܬܝܠܗܘܢ ܒܘܨܝ̈ܐ ܒܠܫܢܐ ܣܘܪܝܝܐ ܐܝܟ ܕܐܬܐ:
- (ܩܛܪ̈ܐ ܕܠܫܢܐ ܓܘ ܫܒܝܠ̈ܐ ܕܝܘܕܥܐ ܣܘܪܝܝܐ) ܕܒܨܘܝܐ (ܥܐܕܠ ܕܢܘ ܝܘܚܢܐ).
- ( ܣܪܛܐ ܡܚܝܕܐ ܕܠܫܢܐ ܡܚܝܕܐ) ܕܒܨܘܝܐ (ܐܢܘܪ ܐܬܘ).
ܘܒܘܨܝ̈ܐ ܒܠܫܢܐ ܥܪܒܝܐ ، ܐ̄ܬܝܠܗܘܢ ܐܝܟ ܕܐܬܐ:
- (ܣܪ̈ܝܛܬܐ ܕܪܒܢܘܼܬܼܐ ܐܢܛܘܿܢܝܬܐ ܗܘܼܪܡܙܕܝܬܐ ܟܠܕܝܬܐ: ܚܝܪܬܐ ܬܫܥܝܼܬܼܢܝܬܐ ܚܕܪ ܛܘܪܢܬܐ ܕܟܢܘܫܬܐ ܘܐܢܢܩܝܘܼܬܗܿ، ܘܓܪܐ ܕܒܝܬܼ ܐܪ̈ܟܐ ܣܘܼܪܝܝܐ ܒܢܛܪܬܗܿ ܘܪܩܡܢܬܗܿ ܘܡܚܘܝܢܘܼܬܗܿ) ܪܫ ܕܝܪܐ (ܣܐܡܪ ܨܘܿܪܝܫܘܿ ܝܘܚܢܐ).
- (ܦܘܬܚܐ ܡܪܕܘܼܬܼܢܝܐ ܕܡܠܠ̈ܐ ܒܠܫܢܐ ܣܘܪܝܝܐ ܠܦܘܼܬ ܦܘܼܣܩܢܐ ܪܩܡܐ (251) ܒܫܢ̄ܬܐ 1972) ܕܒܨܘܝܐ (ܠܘܪܢܣ ܢܐܕܪ ܡܚܘ).
- (ܕܪܐ ܡܢ ܫܘܚܠܦܐ ܕܝܡܘܓܼܪܦܝܐ: ܕܐܝܟܼ ܐܡܝܢܝ̈ܐܝ̄ܠܝܗܝ ܐܬܼܘܿܪ̈ܝܐ ܒܚܣܝܪܘܬܐ ܕܐܪ̈ܥܬܝܗܝ ܬܫܥܝܬܢܝ̈ܐ؟ ܗܘܦܪܟܝܐ ܕܕܗܘܿܟ (1992-2022) ܐܝܟܢܘܬܐ ܠܕܪܫܬܐ) ܕܒܨܘܝܐ (ܡܝܟܼܐܝܠ ܒܢܝܡܝܢ ܕܘܝܕ).
- (ܓܪܐ ܕܡܓܠܬܐ ܕܒܝܬܼ ܢܗܪܝܢ ܓܘ ܦܪܣܬܐ ܕܡܪܕܘܼܬܐ ܣܘܼܪܝܝܬܐ) ܕܐܒܼܐ (ܐܠܒܝܪ ܗܝܫܐܡ ܢܥܘܡ).
- (ܛܠܘܡܝ̈ܐ ܕܪܗܝܒܘܼܬܼܐ ܠܫܘܦ̈ܐ ܕܝܪܬܘܼܬܐ ܡܕܝܢܝܬܐ ܓܘ ܡܘܨܠ -ܥ̈ܕܬܼܐ ܡܫܝܚܝ̈ܐ- ܛܘܼܦ̮ܣ̈ܐ ܡܓܘܒܝ̈ܐ) ܕ. (ܐܢܡܐܪ ܥܒܕ ܐܠܓ̰ܒܐܪ ܓ̰ܐܣܡ).
- ( ܣܦܪܝܘܬܐ ܕܓܠܘܬܐ ܐܠܝܨܬܐ ܘܕܝܠܝ̈ܘܬܗܿ) ܕܝܪܝܐ (ܘܝܣܐܡ ܡܐܪܙܝܢܐ ܚܨܿܪ).
- (ܓܕܝܡܘܬܐ ܒܓܘܢܚ̈ܐ ܘܐܝܟܢ̈ܘܬܐ ܕܡܫܝܚܝ̈ܐ ܕܐܬܪܐ ܕܒܝܬ ܢܗܪܝܢ ܓܐܘܓܪܦ̮ܝܐ ܘܕܝܡܘܓܼܪܦ̮ܝܐ: ܣܪ̈ܛܐ ܕܓܝܫܬܐ ܛܘܗܡܢܝ̈ܐ ܘܣܪ̈ܛܐ ܕܬܠܚܬܐ ܛܝܦܝ̈ܐ) ܕ. (ܣܥܕ ܣܠܘܡ).
- (ܛܟܼܣܐ ܕܪܩܡܬܐ ܓܘ ܠܫܢܐ ܣܘܪܝܝܐ: ܚܝܪܬܐ ܚܕܬܐ) ܕ. (ܟܘܬܪ ܢܓ̰ܝܒ ܥܒܕܠܐܚܕ ܥܣܟܪ)
ܘܒܘܨܝ̈ܐ ܒܠܫܢܐ ܐܢܓܠܝܙܝܐ ܐ̄ܬܝܠܗܘܢ ܐܝܟ ܕܐܬܐ:
- (ܬܢܝܬܐ ܕܚܝܪܬܐ ܒܐܣܘܿܪܐ ܒܝܢܬܼ ܣܘܼܪܬܼ ܕ (ܛܘܼܪܝܐ) ܘܣܘܼܪܬܼ (ܐܪܡܝܐ ܚܕܬܼܐ ܓܪܒܝܝܐ ܡܕܢܚܝܐ) ܕ. (ܫܒܘ ܛܠܐܝ).
- (ܚܘܼܫܒܢܐ ܕܣܘܼܪܝܝܐ: ܨܘܿܒ ܗܘܢܐ ܡܨܢܥܐ) ܕ. (ܓ̰ܘܪܓ̰ ܐܢܛܘܿܢ ܟܝܪܐܙ)
- (ܚܝܠܢܬܐ ܕܡܨܝܬܐ ܕܬܘܪܓܡܐ ܪܩܡܝܐ ܠܠܫܢܐ ܣܘܪܝܝܐ: ܝܠܝܦܘܬܼܐ ܣܢܕܢܬܐ ܠܛܘܦ̮ܣ̈ܐ ܕܗܘܢܐ ܡܨܢܥܐ) ܕܒܨܘܝܐ (ܡܐܝܟܠ ܓܠܝܢܐ).
- (ܡܢ ܐܫܛܪܬܐ ܠܡܚܝܬܐ: ܫܩܠܬܐ ܕܝܘܼܬܪܢܐ ܡܢ ܒܘܝܢ̈ܐ ܘܗܘܢܐ ܡܨܢܥܐ ܠܡܕܥܪܬܐ ܕܠܫܢܐ ܐܪܡܝܐ ܓܪܒܝܝܐ ܡܕܢܚܝܐ ܚܕܬܼܐ ܘܚܝܠܢܬܐ ܕܟܢܘܼܫܝܐ) ܕܒܨܘܝܐ (ܡܐܬܝܘ ܢܨܿܪܝ).
- (ܪܩܡܬܐ ܘܢܛܪܬܐ ܕܨܚܚ̈ܐ ܐܬܘܿܪ̈ܝܐ ܚܕ̈ܬܐ: ܣܘܡܣܡܐ ܕܣܩܘܒܼܠܝ̈ܘܬܐ ܕܠܫܢ̈ܐ ܡܪܝ ܥܠܠ̈ܬܐ ܒܨܘܪ̈ܐ ܒܐܘܼܪܚܐ ܕܫܪ̈ܝܬܼܐ ܬܟܢܘܿܠܘܿܓ̰ܝܐ ܡܬܼܩܕܡܢܬܐ) ܠܡܠܦܢܐ ܕ. (ܣܪܓܘܢ ܗܣܘ).
ܘܒܚܘܬܡܐ ܕܣܝܡܦܘܙܝܘܡ ܣܘܪܝܝܐ ܩܕܡܝܐ ܒܐܬܪܐ، ܡܘܦܩܠܗܿ ܣܝܥܬܐ ܕܡܕܒܪܢܘܬܐ ܕܝܬܒܝ̈ܬܐ ܕܣܝܡܦܘܙܝܘܡ ܚܕ ܒܘܝܢܐ ܥܡ ܡܢܝܢܐ ܡܢ ܦܘܩܕ̈ܐ، ܡܢܝܗܝ ܒܥܝܬܐ ܡܢ ܪܫ ܘܙܝܪ̈ܐ ܓܘ ܫܘܠܛܢܘܬܐ ܚܘܝܕܝܬܐ ܒܐܢܢܩܝܘܬܐ ܕܬܢܝܬܐ ܕܦܘܬܚܐ ܕܓܘܫܡܐ ܕܠܫܢܐ ܣܘܪܝܝܐ ܓܘ ܟܢܘܫܝܐ ܝܘܠܦܢܝܐ ܥܝܪܩܝܐ، ܘܒܥܝܬܐ ܡܢ ܪܫܢܘܬܐ ܕܩܠܝܡܐ ܕܟܘܪܕܣܬܢ ܠܫܬܐܣܬܐ ܕܐܟܕܝܡܝܘܬܐ ܣܘܪܝܝܬܐ، ܘܝܨܝܦܘܬܐ ܒܠܫܢܐ ܣܘܪܝܝܐ ܘܕܪ̈ܫܝܬܐ ܣܘܪ̈ܝܝܐ ܒܐܘܪܚܐ ܕܣܢܕܬܐ ܕܚܘܝܕܐ ܕܣܦܪ̈ܐ ܘܣܝܘܡ̈ܐ ܣܘܪ̈ܝܝܐ، ܘܐܦ ܗܕܟ ܦܩܕܠܗܿ ܣܝܥܬܐ ܒܚܘܬܡܐ ܕܦܘܩܕ̈ܗܿ ܒܐܢܢܩܝܘܬܐ ܕܐܡܝܢܝܘܬܐ ܕܥܒܕܬܐ ܕܐܝܟ ܐܢܝ ܠܘܡܕ̈ܐ ܓܘ ܐܬܪܐ.
ܘܩܒܠܗܿ ܒܐܪܚܘܬܐ ܥܕܬܐ ܕܡܕܢܚܐ ܐܬܘܪܝܬܐ݂ ܒܚܘܬܡܐ ܕܣܝܡܦܘܙܝܘܡ، ܗܕܡ̈ܐ ܡܫܘܬܦ̈ܐ ܓܘ ܝܬܒܝ̈ܬܗ، ܒܚܕ ܪܡܫܐ ܦܝܫܠܗܘܢ ܡܛܝܒܐ ܓܘܗ ܦܛܪܝܪܟܐ ܕܥܕܬܐ ܕܡܕܢܚܐ ܐܬܘܪܝܬܐ ܒܥܝܪܩ ܘܬܒܝܠ ܩܕܝܫܘܬܗ ܕܡܪܝ ܐܒܼܐ ܬܠܝܬܝܐ، ܘܡܝܩܪ̈ܐ ܐܦܣܩܘܦ̈ܐ ܕܥ̈ܕܬܝܢ ܡܝܬܪ̈ܐ ܘܐܒܗ̈ܬܐ ܟܗܢ̈ܐ ܙܗܝ̈ܐ.
ܘܦܝܫ ܕܟܝܪܐ، ܕܦܘܠܚܢ̈ܐ ܕܣܝܡܦܘܙܝܘܡ ܣܘܪܝܝܐ ܩܕܡܝܐ ܒܐܬܪܐ، ܡܫܘܪܐܠܗܘܢ ܝܘܡ ܚܡܫܒܫܒܐ 5 ܐܝܠܘܠ 2024، ܓܘ ܐܘܢܐ ܕܩܨܪܐ ܣܗܕܐ ܣܥܕ ܥܒܕܠܠܗ ܕܠܘܡܕ̈ܐ ܒܐܪܒܝܠ، ܒܪܥܝܘܬܐ ܕܪܫ ܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܡܝܩܪܐ ( ܡܣܪܘܪ ܒܐܪܙܢܝ).
