ܣܥܪܠܗܿ ܡܫܕܪܘܬܐ ܡܢ ܣܝܥܬܐ ܡܛܟܣܢܝܬܐ ܕܥܕܥܐܕܐ ܕ(ܥܢܟܒܐ ܟܪܝܣܡܣ) ܒܕܘܪܬܗ ܪܒܝܥܝܬܐ ܒܪܫܢܘܬܐ ܕܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ ( ܟܠܕܘ ܪܡܙܝ ܐܘܓܼܢܐ) ، ܝܘܡ ܬܠܬܒܫܒܐ 19 ܬܫܪܝܢ ܬܪܝܢܐ 2024، ܠܕܝܘܢ ܕܗܘܦܪܟܝܐ ܕܐܪܒܝܠ ܘܬܦܩܠܗܿ ܡܫܕܪܘܬܐ ܒܗܘܦܪܟܐ ܕܐܪܒܝܠ ܡܝܩܪܐ (ܐܘܡܝܕ ܚܘܫܢܘ)، ܠܟܠܝܬܐ ܓܢ̄ܒ ܣܢܝܩ̈ܘܬܐ ܕܥܕܥܐܕܐ ܘܫܒܝ̈ܠܐ ܚܫܝܚܝ̈ܐ ܠܢܨܝܚܘܬܗ.
ܘܫܘܪܪܠܗ (ܚܘܫܢܘ) ܒܡܬܚܐ ܕܬܦܩܬܐ ܥܠ (ܣܢܕܬܗ ܪܒܬܐ ܠܢܨܝܚܘܬܐ ܕܐܢܝ ܥܒܘܕܘ̈ܬܐ ܐܢܝ ܕܓܠܝ ܐܕܫܢܝܘܬܐ ܡܟܝܢܝܬܐ ܒܗܘܦܪܟܝܐ، ܒܐܘܪܚܐ ܕܥܘܕܪܢܐ ܐܡܝܢܝܐ ܒܝܢܬ ܕܝܘܢ ܕܗܘܦܪܟܝܐ ܘܘܙܝܪܘܬ ܡܪܕܘܬܐ ܘܥܠܝܡ̈ܐ ܓܘ ܩܠܝܡܐ)، ܘܪܡܙܠܗ ܒܣܘܘܕܗ ( ܥܢܟܒܐ ܝܗ̄ܘܐ ܘܦܝܫܬܐܝܠܗܿ ܩܘܒܠܬܐ ܕܐܝܬܘܬܐ ܡܫܝܚܝܬܐ ܒܡܕܢܚܐ ܘܠܐ ܒܩܠܝܡܐ ܕܟܘܪܕܣܬܢ ܒܠܚܘܕ).
ܘܡܘܩܪܒܠܗܘܢ ܗܕܡ̈ܐ ܕܡܫܕܪܘܬܐ، ܗܝ ܕܚܒܫܠܗܿ ܡܡܬܠܢ̈ܐ ܡܢ ܡܛܟܣܝ̈ܬܐ ܕܟܢܘܫܝܐ ܡܕܝܢܝܐ ܫܘܬܦ̈ܐ ܒܥܕܥܐܕܐ، ܒܡܬܚܐ ܕܣܥܘܪܘܬܝܗܝ ܩܘܒܠܛܝܒܘܬܝܗܝ ܪܒܬܐ ܘܐܝܩܪܝܗܝ ܠܣܢܕܬܗ ܐܡܝܢܝܬܐ ܠܟܫܝܪ̈ܘܬܐ ܘܥܒܘܕܘ̈ܬܐ ܥܠܝܡܝ̈ܐ ܘܡܪ̈ܕܘܬܢܝܐ ܐܢܝ ܕܦܝܫܝ ܥܒܝܕܐ ܒܥܢܟܒܐ.
ܘܦܝܫ ܕܟܝܪܐ، ܕܥܕܥܐܕܐ ܕܥܢܟܒܐ ܟܪܝܣܡܣ، ܦܝܫ ܡܚܘܫܒܢܐ ܥܕܥܐܕܐ ܒܘܫ ܪܒܐ ܕܟܪܝܣܡܣ ܦܝܫ ܥܒܝܕܐ ܟܠ ܫܢ̄ܬܐ ܠܡܫܝܚܝ̈ܐ ܒܥܢܟܒܐ ܘܦܢܝ̈ܬܐ ܡܫܚܠܦ̈ܐ ܕܥܡܢ، ܘܚܒܫ ܐܠܦܝ̈ܐ ܕܡܫܝܚܝ̈ܐ ܡܢ ܓܘܝ̈ܐ ܕܐܬܪܐ ܘܐܬܪ̈ܘܬܐ ܕܓܠܘܬܐ ܒܐܘܪܘܦܐ ܘܐܘܣܬܪܠܝܐ ܘܐܡܪܝܟܐ، ܘܦܝܫ ܡܛܘܟܣܐ ܒܪܥܝܘܬܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܫܘܬܦܬܐ ܕܡܢܝܢܐ ܡܢ ܡܛܟܣܝ̈ܬܐ ܕܟܢܘܫܝܐ ܡܕܝܢܝܐ ܥܠܝܡܝ̈ܐ ܘܟܢܘܫܝܝ̈ܐ، ܘܒܕ ܓܪܫ ܗܕ ܫܢ̄ܬܐ ܠܡܬܚܐ ܕ(12) ܝܘܡ̈ܐ ܒܡܬܚܐ ܕܥܐܕ̈ܐ ܕܡܘܠܕܐ ܫܒܝܚܐ ܘܪܫܐ ܕܫܢ̄ܬܐ ܚܕܬܐ.
