ܬܫܪܪܐ : ܢܡܪܘܕ ܩܫܐ ،
ܣܐܡ ܨܘܒܚܝ
ܐܡܝܢܝ̈ܐܗ̄ܘܘ ܥܒܘܕܘ̈ܬܐ ܕܝܘܡܐ ܬܪܝܢܐ ܡܢ ܥܕܥܐܕܐ ܕܒܐܡܐ ܣܘܪܝܝܐ ܒܕܘܪܬܗ ܩܕܡܝܬܐ، ܝܘܡ ܥܪܘܒܬܐ 15 ܟܢܘܢ ܩܕܡܝܐ 2023، ܗܘ ܡܛܟܣܐܠܗ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܠܡܬܚܐ ܡܢ 14-16 ܟܢܘܢ ܩܕܡܝܐ ܓܘ ܪܘܣܬܩܐ ܕܥܢܟܒܐ ܒܗܘܦܪܟܝܐ ܕܐܪܒܝܠ.
ܘܫܘܪܐܠܗ ܝܘܡܐ ܬܪܝܢܐ ܟܫܝܪܘܬܗ ܒܚܠܩܬܐ ܕܘܪܫܝܬܐ ܨܦܪܝܬܐ، ܓܘ ܐܘܢܐ ܕܦܢܕܩܐ ܕܗܝܟܣܘܣ، ܚܕܪ (ܒܟܪܘܬܐ ܒܐܡܝܬܐ ܓܘ ܥܝܪܩ.. ܒܟܪܘܬܐ ܣܘܪܝܝܬܐ) ، ܗܝ ܕܟܡ ܡܩܪܒܠܗܿ ܪܫܐ ܕܟܠܢܝܘܬ ܐܡܢ̈ܐ ܫܦܝܪ̈ܐ ܒܒܝܬ ܨܘܒܐ ܕܒܒܠ ܩܕܝܡܐ ܕܟܬܘܪ ” ܥܠܝ ܐܠܪܘܒܝܥܝ” ܘܪܫܐ ܕܟܠܢܝܘܬ ܐܡܢ̈ܐ ܫܦܝܪ̈ܐ ܒܒܝܬ ܨܘܒܐ ܕܡܘܨܠ ܕܟܬܘܪ ” ܢܫܐܬ ܡܘܒܐܪܟ”.
ܘܬܢܐܠܗ ܕܟܬܘܪ ” ܥܠܝ ܐܠܪܘܒܝܥܝ” ܚܕܪ ܡܫܪܝܐ ܐܢܢܩܝܐ ܡܢ ܬܫܥܝܬܐ ܕܒܐܡܐ ܣܘܪܝܝܐ، ܟܕ ܪܡܙܠܗ ܠܓܠܚܐ ܒܐܡܝܐ ܩܕܡܝܐ ܓܘ ܥܝܪܩ ܝܗ̄ܘܐ ܕܣܘܪ̈ܝܝܐ ܒܓܠܚܐ ܕܡܛܐܠܬܐ ܕ(يوسف الصديق) ، ܗܝ ܕܩܝܡܠܗ ܒܡܦܩܢܘܬܗܿ ܐܒܐ “ܡܐܪܝ ܓ̰ܘܙܝܦܿ” ܘܦܝܫܠܗܿ ܡܘܩܪܒܬܐ ܓܘ 4 ܬܫܪܝܢ ܩܕܡܝܐ ܫܢ̄ܬܐ ܕ(1874) ܓܘ ܡܕܪܫܬܐ ܕܐܒܗ̈ܬܐ ܠܬܝܢܝ̈ܐ ܓܘ ܒܓܕܕ.
ܘܟܠܐܠܗ ” ܐܠܪܘܒܝܥܝ” ܓܘ ܡܡܠܗ ܠܒܐܡܐ ܕܫܒܪܐ ܘܫܘܪܪܠܗ ܕܨܚܚܐ ܒܐܡܝܐ ܩܕܡܝܐ ܛܒܝܥܐ ܓܘ ܥܝܪܩ ܝܠܗ (ܠܛܝܦܿ ܘܚܕܒܫܒܐ- لطيف وخوشابا)، ܘܐ̄ܡܪܗ ܕܒܐܡܐ ܓܘ ܥܝܪܩ ܩܝܡܠܗ ܘܫܘܪܐܠܗ ܘܦܝܫܠܗ ܡܫܘܬܐܣܐ ܥܠ ܐܝܕܐ ܕܣܘܪ̈ܝܝܐ.
ܒܬܪ ܗܕܟ ܬܢܐܠܗ ܕܟܬܘܪ ” ܢܫܐܬ ܡܘܒܐܪܟ” ܚܕܪ ( ܪ̈ܡܙܝܘܬܐ ܕܫܬܐܣܬܐ ܓܘ ܒܐܡܐ ܣܘܪܝܝܐ-رمزيات التأسيس في المسرح السرياني) ، ܘܪܡܙܠܗ ܕܒܐܡܐ ܣܘܪܝܝܐ ܐܝܬܠܗ ܚܕ ܐܣܐ ܐܢܢܩܝܐ ܝܠܗ ܐܣܐ ܕܛܟܼܣ̈ܐ ܬܘܕܝܬܢܝ̈ܐ، ܕܚܒܫܝ ܐܢܝ ܙܘܝܚ̈ܐ ܥܕܬܢܝ̈ܐ ܡܢܝܢܐ ܡܢ ܝܗܝ̈ܒܬܐ ܐܢܝ ܕܡܨܝܢܬܐܝܠܗܿ ܕܡܦܠܚܬܝܗܝ ܓܘ ܓܠܚܐ ܒܐܡܝܐ ܘܗܘ ܕܐܝܬ ܓܘܗ ܩܘܕܫܐ ܬܘܕܝܬܢܝܐ ܒܐܘܪܚܐ ܕܟܗܢܐ ܘܟܢܫܐ.
ܘܡܘܙܝܕܠܗ “ܡܘܒܐܪܟ” ܒܐܡܪܐ ، ܕܙܘܝܚܐ ܓܘ ܒܐܡܐ ܣܘܪܝܝܐ ܩܝܡܐܝܠܗ ܒܡܐ ܕܐܝܬܠܢ ܡܢ ܝܘܪ̈ܬܢܐ ܐܢܝ ܕܡܨܚ ܒܓܘܝܗܝ ܕܡܫܬܐܣܚ ܒܐܡܐ ܣܘܪܝܝܐ، ܒܥܠܬܐ ܕܐܝܬܠܗ ܫܪܫܝܘܬܗ ܘܐܣܛܘܟܣ̈ܗ ܡܪ̈ܕܘܬܢܝܐ ܘܟܢܘܫܝܝ̈ܐ ܘܬܘܕܝܬܢܝ̈ܐ.
ܘܒܚܘܬܡܐ ܕܚܠܩܬܐ ܕܘܪܫܝܬܐ ܬܢܐܠܗ ܕܟܬܘܪ “ܡܘܨܥܒ ܐܒܪܐܗܝܡ” ܒܘܪܩܐ ܛܥܝܢܐ ܬܚܘܝܬܐ ( ܗܝܝܘܬܐ ܕܒܐܡܐ ܣܘܪܝܝܐ ܒܝܢܬ ܬܣܦܝܬܐ ܘܫܪܫܝܘܬܐ- هوية المسرح السرياني بين التقليد والتأصيل).
ܘܚܒܫܠܗ ܢܘܩܙܐ ܪܡܫܝܐ ܬܪܝ ܓܠܚ̈ܐ ܒܐܡܝ̈ܐ ، ܗܘ ܩܕܡܝܐ ܠܝܗܠܐ ܕܒܐܡܐ ܕܩܪܩܘܫ ܒܫܡܐ ܕ(ܛܟܣ̈ܐ ܕܩܝܣܐ- طقوس الحطب) ، ܡܢ ܣܝܘܡܘܬܐ ܕ”ܐܒܪܐܗܝܡ ܝܘܚܢܐ ܟܘܠܐܢ” ܘܡܦܩܢܘܬܐ ܕܕܟܬܘܪ “ܢܫܐܬ ܡܘܒܪܐܟ ܨܠܝܒܐ”، ܘܡܫܘܬܦܠܗ ܒܡܡܬܠܢܘܬܐ (ܘܝܣܐܡ ܚܨܿܪ ܡܘܣܐ، ܡܘܨܥܒ ܐܒܪܐܗܝܡ ܡܚܡܕ، ܨܕܐܡ ܣܐܠܡ ܚܢܐ، ܡܐܪܐܠ ܨܒܐܚ، ܕܝܡܐ ܡܬܝ، ܡܐܪܝ ܡܐܓ̰ܕ، ܡܝܠܝܣܝܐܥܡܐܪ).
ܘܡܛܐܠܬܐ ܬܪܝܢܝܬܐ ܦܝܫܠܗ ܡܘܩܪܒܬܐ ܒܝܕ ܝܗܠܐ ܕܫܡܫܡܐ ܠܡܡܬܠܢܘܬܐ ܒܫܡܐ ܕ( ܛܘܒܝܐ)، ܗܝ ܕܩܝܡܠܗ ܒܡܦܩܢܘܬܗܿ “ܠܛܝܦܿ ܢܥܡܐܢ” ܒܥܘܕܪܢ (ܐܢܣ ܥܘܠܘ، ܚܘܐܢ ܣܝܦܐܢ)، ܘܡܫܘܬܦܠܗ ܒܡܬܠܢܘܬܐ ( ܠܛܝܦܿ ܢܥܡܐܢ، ܐܝܦܐܢ ܣܥܕܝ، ܗܕܝܪ ܟܘܢܕܐ، ܐܦܝܢ ܒܐܗܪ).
ܘܦܝܫ ܕܟܝܪܐ، ܕܥܕܥܐܕܐ ܕܒܐܡܐ ܣܘܪܝܝܐ ܒܕܘܪܬܗ ܩܕܡܝܬܐ ܗܡ ܡܛܣܟܐܠܗ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܠܡܬܚܐ ܡܢ 14-16 ܟܢܘܢ ܩܕܡܝܐ، ܚܒܫ ܡܢܝܢܐ ܡܢ ܥܒܘܕܘ̈ܬܐ ܒܐܡܝ̈ܐ ܘܚܠܩܝ̈ܬܐ ܕܘܪ̈ܫܝܐ ܐܢܝ ܕܡܫܘܬܦܝ ܓܘܝܗܝ ܡܢܝܢܐ ܡܢ ܐܡܢ̈ܐ ܘܐܟܕܝܡܝ̈ܐ ܝܨܘܦ̈ܐ ܒܨܒܘܬܐ ܒܐܡܝܬܐ.
