ܡܘܩܪܒܠܗܿ ܡܕܒܪܢܘܬܐ ܕܥܕܥܐܕܐ ܕ(ܥܢܟܒܐ ܟܪܝܣܡܣ) ܒܕܘܪܬܗ ܪܒܝܥܝܬܐ، ܝܘܡ ܐܪܒܥܒܫܒܐ 21 ܐܝܪ 2025، ܡܘܗܒܝ̈ܬܐ ܡܠܝ̈ܐ ܠܡܢܝܢܐ ܡܢ ܡܕܪ̈ܫܝܬܐ ܫܘܠܛܢܝ̈ܐ ܒܪܘܣܬܩܐ ܕܥܢܟܒܐ ܒܗܘܦܪܟܝܐ ܕܐܪܒܝܠ ، ܒܢܝܫܐ ܕܣܢܕܬܐ ܕܥܡܠܝܬܐ ܬܪܒܝܬܢܝܬܐ ܘܬܫܡܫܬܐ ܕܝܠܘܦ̈ܐ ܕܥܡܢ، ܠܣܢܕܬܝܗܝ ܠܬܡܡܬܐ ܕܡܠܦܢܘܬܝܗܝ ܐܣܝܬܐ ܘܬܪܝܢܝܬܐ ܘܗܠ ܕܡܛܝ ܠܡܫܩܠܐ ܨܘܒܝܐ.
ܘܚܒܫܠܗܘܢ ܡܘܗܒܝ̈ܬܐ، ܡܩܪܒܬܐ ܕܣܢܕܬܐ ܡܠܝܬܐ ܠܙܒܢܐ ܕܬܘܩܢ̈ܐ ܕܢܣܟܬܐ ܠܡܕܒܪ̈ܢܘܬܐ ܕܡܢܝܢܐ ܡܢ ܡܕܪ̈ܫܝܬܐ ܫܘܠܛܢܝ̈ܐ ܒܥܢܟܒܐ، ܘܝܠܝܗܝ ܟܠ ܡܢ ( ܬܪܝܢܝܬܐ ܕܥܢܟܒܐ، ܡܕܪܫܬܐ ܕܥܢܟܒܐ ܐܣܝܬܐ، ܬܪܝܢܝܬܐ ܕܐܘܪ ܣܘܪܝܝܬܐ، ܡܕܪܫܬܐ ܕܝܙܕܢܕܘܟܬ ܐܣܝܬܐ)، ܒܬܪ ܡܩܪܒܬܐ ܕܡܕܒܪܢܘܬܐ ܕܥܕܥܐܕܐ ܣܢܕܬܐ ܩܕܡ ܡܬܚܐ ܠܡܢܝܢܐ ܐ̄ܚܪܢܐ ܡܢ ܡܕܪ̈ܫܝܬܐ.
ܘܦܝܫܠܗܘܢ ܝܗ̄ܒܝܠܐ ܡܘܗܒܝ̈ܬܐ ܒܚܘܬܡܐ ܕܣܩܒܠܬܐ ܕܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܠܡܕܒܪ̈ܢܐ ܘܗܕܡ̈ܐ ܕܓܘܫܡܐ ܡܕܪܫܬܢܝܐ ܕܡܕܪ̈ܫܝܬܐ ܚܒܘܫ̈ܐ ܒܡܘܗܒܝ̈ܬܐ، ܓܘ ܒܢܝܢܐ ܕܡܕܒܪܢܘܬܐ ܒܪܘܣܬܩܐ ܕܥܢܟܒܐ ܓܘ ܐܪܒܝܠ.
ܘܡܘܩܪܒܠܗܿ ܡܕܒܪܢܘܬܐ ܕܥܕܥܐܕܐ ܕ(ܥܢܟܒܐ ܟܪܝܣܡܣ) ܒܕܘܪܬܗ ܪܒܝܥܝܬܐ، ܒܫܘܪܝܐ ܕܝܪܚܐ ܩܐܡܝܐ ܣܢܕܬܐ ܡܠܝܬܐ ܠܡܢܝܢܐ ܡܢ ܡܕܪ̈ܫܝܬܐ ܫܘܠܛܢܝ̈ܐ ܒܪܘܣܬܩܐ ܕܥܢܟܒܐ ܒܗܘܦܪܟܝܐ ܕܐܪܒܝܠ، ܘܚܒܫܠܗܿ ܣܢܕܬܐ ܒܗܘ ܡܬܚܐ ܟܠ ܡܢ ( ܛܘܝܒܝܬܐ ܕܥܢܟܒܐ ܚܠܝܛܬܐ، ܛܘܝܒܝܬܐ ܕܐܟܝܬܘ ܕܒܢܘܢ̈ܐ، ܡܕܪܫܬܐ ܕܚܡܘܪܒܝ ܐܣܝܬܐ ، ܘܡܕܪܫܬܐ ܕܙܓܐ).
ܘܦܝܫ ܕܟܝܪܐ، ܕܥܕܥܐܕܐ ܕܥܢܟܒܐ ܟܪܝܣܡܣ ܒܕܘܪܬܗ ܪܒܝܥܝܬܐ، ܗܘ ܕܚܬܡܠܗ ܥܒܘܕܘ̈ܬܗ ܒܝܘܡ 4 ܟܢܘܢ ܬܪܝܢܐ 2025، ܗܘ ܟܡ ܛܟܣܠܗ ܒܐܡܐ ܕܥܕܥܐܕܐ ܕܥܢܟܒܐ ܒܪܥܝܘܬ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܥܘܕܪܢ ܥܡ ܩܢܛܪܘܢ ܐܟܕܝܡܝܐ ܟܢܘܫܝܝܐ ܘܒܝܬ ܣܡܟܐ ܕܥܠܝܡ̈ܐ ܕܥܢܟܒܐ ܟܢܘܫܝܝܐ.
