ܒܪܥܝܘܬ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ، ܦܝܫܠܗܘܢ ܥܒܝܕܐ ܝܘܡ ܬܠܬܒܫܒܐ 18 ܫܒܛ 2025 ܚܘܪ̈ܩܢܐ ܕܡܘܗܒܬܐ ܕܪܫܝܬܐ ܡܓܢܝܬܐ ܠ (10) ܡܢ ܒܢܝ̈ ܥܡܢ، ܗܝ ܒܕ ܝܗ̄ܒܐ ܟܠ ܢܦܩ̈ܬܝܗܝ ܕܪ̈ܫܝܐ ܠܬܡܡܬܐ ܕܫܢ̄ܬܐ ܕܪܫܝܬܐ ܓܘ ܒܝܬ ܨܘܒܐ ܩܬܘܠܝܩܝܐ ܒܐܪܒܝܠ.
ܘܡܘܩܪܒܠܗ ܪܫ ܒܝܬ ܨܘܒܐ ܕܟܬܘܪ (ܢܙܐܪ ܦܘܠܘܣ ܫܐܒܝܠܐ)̤ ܒܛܘܝܒܐ ܕܐܒܐ (ܟܪܡ ܩܫܐ) ܚܠܦ ܪܫܐ ܕܒܝܬ ܨܘܒܐ ܓܘ ܡܡܠܗ، ܩܘܒܠܛܝܒܘܬܗ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܡܕܒܪܢܘܬܐ ܕܥܕܥܕܐ ܕ(ܥܢܟܒܐ ܟܪܝܣܡܣ) ܠܪܥܝܘܬܝܗܝ ܡܘܗܒ̈ܝܬܐ ܥܠܝܡܝ̈ܐ ܡܢ ܒܢܝ̈ ܥܡܢ ܘܣܢܕܬܝܗܝ ܠܬܡܡܬܐ ܕܕܪܫܬܝܗܝ ܒܝܬ ܨܘܒܝܬܐ.
ܘܡܢ ܓܢ̄ܒܗ ܫܘܪܪܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، (ܡܗܘܡܢܘܬܢ ܪܒܬܐܝܠܗܿ ܒܒܝܬ ܨܘܒܐ ܩܬܘܠܝܩܝܐ ܓܘ ܐܪܒܝܠ، ܘܓܒܝܬܢ ܠܐܢܝ ܦܪ̈ܨܘܦܐ ܒܡܘܗܒܬܐ ܕܪܫܒܝܬܐ ܡܓܢܝܬܐ ܐܬܝܠܗܿ ܒܡܫܘܚܝ̈ܬܐ ܦܝܫܠܗܘܢ ܡܬܚܡܐ ܒܝܕ ܒܝܬ ܨܘܒܐ)، ܘܪܡܙܠܗ ܕ( ܢܝܫܢ ܝܠܗ ܡܢ ܗܕ ܡܘܗܒܬܐ ܡܩܪܒܬܐ ܕܦܘܪܣܐ ܠܐܢܝ ܦܪ̈ܨܘܦܐ ܠܬܡܡܬܐ ܕܕܪܫܬܝܗܝ، ܟܕ ܫܩܠܗܿ ܣܝܥܬܐ ܕܥܕܥܐܕܐ ܣܢܕܬܐ ܕܡܨܝ̈ܬܐ ܥܠܝܡܝ̈ܐ ܓܘ ܟܢܘܫܝܢ).
ܘܦܝܫܐ ܡܚܘܫܒܢܬܐ ܗܕ ܦܣܘܥܬܐ، ܓܗܐ ܩܕܡܝܬܐ ܗܝ ܕܡܩܪܒܐ ܓܘܗܿ ܥܕܥܐܕܐ ܕܥܢܟܒܐ ܡܘܗܒܝ̈ܬܐ ܕܪ̈ܫܝܐ ܡܓܢܝ̈ܐ ܠܝܠܘܦ̈ܐ ܒܝܬ ܨܘܒܝ̈ܐ ܡܢ ܒܢܝ̈ ܥܡܢ.
ܘܦܝܫ ܕܟܝܪܐ، ܕܥܕܥܐܕܐ ܕܥܢܟܒܐ ܟܪܝܣܡܣ ܒܢܘܣܟܗ ܪܒܝܥܝܐ ܗܘ ܕܦܝܫܠܗܘܢ ܚܬܝܡܐ ܥܒܘܕܘ̈ܬܗ ܒܣܝܩܘܡ 4 ܟܢܘܢ ܬܪܝܢܐ 2025، ܗܘ ܕܟܡ ܛܟܣܠܗ ܒܐܡܐ ܕܥܕܥܐܕܐ ܕܥܢܟܒܐ ܒܪܥܝܘܬ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܒܥܘܕܪܢ ܥܡ ܩܢܛܪܘܢ ܐܟܕܝܡܝܐ ܟܢܘܫܝܝܐ ܘܒܝܬ ܣܡܟܐ ܕܥܠܝܡ̈ܐ ܕܥܢܟܒܐ ܟܢܘܫܝܝܐ.
