ܦܝܫܠܗܘܢ ܚܬܝܡ̈ܐ، ܝܘܡ ܥܪܘܒܬܐ 8 ܟܢܘܢ ܩܕܡܝܐ 2023، ܥܒܘܕܘ̈ܬܐ ܕܥܕܥܐܕܐ ܡܪܕܘܬܢܝܐ ܩܕܡܝܐ ܕܡܒܥܢ̈ܐ ܕܥܡܢ ܡܬܘܬܒ̈ܐ ܓܘ ܠܒܢܢ، ܗܘ ܟܡ ܛܟܣܐܠܗ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܒܥܘܕܪܢ ܥܡ ܐܣܝܪܘܬܐ ܣܘܪܝܝܬܐ ܓܘ ܠܒܢܢ ܬ̄ܚܘܬ ܪܘܫܡܐ (ܡܒܥܢܐ ܣܘܪܝܝܐ ܢܨܝܚܘܬܐ ܕܠܐ ܬܚܘܡ̈ܐ) ، ܓܘ ܐܘܢܐ ܕܡܪܝ ܝܥܩܘܒ ܕܣܪܘܓܼ ܓܘ ܦܢܝܬܐ ܣܒܬܝܬܐ ܒܐܪܫܟܝܬܐ ܒܝܪܘܬ.
ܘܦܝܫܠܗ ܦܬܝܚܐ ܥܕܥܐܕܐ ܒܡܡܠܐ ܕܐܣܝܪܘܬܐ ܣܘܪܝܝܬܐ ܒܝܕ ܪܫܗܿ “ܚܒܝܒ ܐܦܪܐܡ” ܗܘ ܪܡܙܠܗ ܓܘܗ ܕ( ܐܚܢܝ ܝܗ̄ܘܚ ܚܕ ܕܡܐ ، ܚܕܐ ܨܒܘܬܐ ܫܡܗܿ ܚܐܪܘܬܐ، ܒܪ ܐܬܪܝܘܬܐ ܘܫܘܝܘܬܐ، ܘܡܫܟܢܢ ܫܒܘܩ ܡܢ ܟܠ ܥܣܩܘ̈ܬܐ ܕܦܝܫܚ ܓܘ ܐܪܥܢ)، ܘܫܘܪܪܠܗ ܕ(ܡܕܢܚܐ ܝܠܗ ܐܪܥܢ، ܘܫܡܝܐ ܐܦ ܗܕܟ ܡܢ ܗܝܡܢܘܬܢ ܝܠܗܿ، ܥܣܩܐܝܠܗ ܕܬܢܚ ܚܕܪ ܫܪܫܝܘܬܐ ܒܥܕܢ ܚܨܪܐ ܘܕܝܫܬܐ، ܐܠܐ ܠܝܬ ܚܠܦܐ ܡܢܝܗܝ).
ܒܬܪ ܗܕܟ ܡܘܩܪܒܠܗ ܡܕܒܪܢܐ ܓܘܢܝܐ ܕܡܕܪܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ܡܡܠܗ ܗܘ ܪܡܙܠܗ ܓܘܗ ܕ( ܕܬܪ̈ܥܐ ܕܡܕܒܪܢܘܬܐ ܓܘܢܝܬܐ ܦܬܝܚ̈ܐܝܠܗܘܢ ܠܥܘܕܪܢܐ ܥܡ ܟܠ ܫܘܬܐܣ̈ܐ ܘܡܘܪ̈ܕܢܐ ܡܢ ܒܢܝ̈ ܥܡܢ ܐܢܝ ܕܫܒܘܩ ܡܢ ܬܘܬܒܘܬܝܗܝ ܐܠܐ ܡܕܒܪܢܘܬܐ ܒܕ ܩܝܡܐ ܒܘܠܝܬܗܿ ܨܘܒܝܗܝ)، ܘܫܘܪܪܠܗ ܕܐܢܝ ܟܫܝܪ̈ܘܬܐ ܕܩܝܡܐ ܓܘܝܗܝ ܡܕܒܪܢܘܬܐ ܟܐܬܝ ܡܢ ܣܢܕܬܐ ܪܒܬܐ ܡܢ ܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܒܦܪܨܘܦܐ ܕܪܫܗܿ ܡܝܩܪܐ “ܡܣܪܘܪ ܒܐܪܙܐܢܝ”، ܫܒܘܩ ܡܢ ܐܝܟܢܘ̈ܬܐ ܐܩܢܘܡܝ̈ܐ ܥܣܩ̈ܐ ܕܐܝܬ ܓܘ ܩܠܝܡܐ ܐܠܐ ܣܢܕܬܗܿ ܐܡܝܢܝܐܝܠܗ ܠܡܘܪ̈ܕܢܐ ܘܐܡܢ̈ܐ ܣܘܪ̈ܝܝܐ ܠܐ ܓܘ ܩܠܝܡܐ ܕܟܘܪܕܣܬܢ ܘܥܝܪܩ ܒܠܚܘܕ ܐܠܐ ܓܘ ܐܬܪ̈ܘܬܐ ܫܒܒ̈ܐ ܐܦ ܗܕܟܼ.
ܒܬܪ ܗܕܟ ܡܘܩܪܒܠܗ ܐܒܐ ” ܐܢܕܪܐܘܣ ܚܙܥܠ” ܡܡܠܗ ܗܘ ܆ܕܦܝܫܠܗ ܡܛܝܒܐ ܐܝܟ ܡܛܦܣܢܐ ܡܢ ܡܝܛܪܦܘܠܝܛܘܬܐ ܕܛܘܪܐ ܕܠܒܢܢ ܘܛܪܒܠܣ ܕܣܘܪ̈ܝܝܐ ܐܪ̈ܬܕܘܟܣܝܐ، ܒܬܪ ܗܕܟ ܫܘܪܐܠܗܘܢ ܥܒܘܕܘ̈ܬܐ ܕܥܕܥܐܕܐ ܒܣܘܓܼܝܬܐ ܕܫܒܪܬܐ “ܡܠܐܟ ܫܟܪܝ” ܘܣܘܓܼܝܬܐ ܐ̄ܚܪܬܐ ܕܥܠܝܡܬܐ ” ܠܦܝܢܝܐ ܐܕܡ”، ܒܬܪ ܗܕܟ ܡܘܩܪܒܠܗ ܐܡܢܐ ܥܠܝܡܐ ” ܓ̰ܐܕ ܐܠܚܕܐܕ” ܢܩܫܬܐ ܠܚܘܕܝܬܐ ܥܠ ܥܘܕܐ ܒܫܡܐ ܕ( ܒܓܕܝܕܐ ܝܩܕܐ).
ܘܒܬܪ ܗܕܟ ܡܘܩܪܒܠܗܘܢ ܡܢܝܢܐ ܡܢ ܡܚܘܪ̈ܐ ܡܫܘܚܝ̈ܬܝܗܝ ܒܬܪܝܢ ܠܫܢ̈ܐ ܣܘܪܝܝܐ ܘܥܪܒܝܐ، ܟܕ ܡܫܘܬܦܠܗܘܢ ܬܠܬܐ ܡܚܘܪ̈ܐ ܡܢ ܥܝܪܩ ܘܝܠܝܗܝ ( ܡܚܘܪܐ ܪܡܙܝ ܗܘܪܡܙ ܝܐܟܘ، ܡܚܘܪܐ ܥܝܨܐܡ ܫܒܐ ܦܠܦܠ، ܘܡܚܘܪܐ ܐܒܠܚܕ ܝܐܟܘ) ، ܥܡ ܡܚܘܪܬܐ ܘܡܬܢܝܢܝܬܐ ܥܠܝܡܬܐ ܡܝܫܠܝܢ ܦܛܪܘܣ ܡܢ ܠܒܢܢ.
ܘܚܒܫܠܗܘܢ ܥܒܘܕܘ̈ܬܐ ܕܥܕܥܐܕܐ ܡܢܝܢܐ ܡܢ ܢܘܩܙ̈ܐ ܐܡܢܝ̈ܐ ܐܢܝ ܕܡܘܩܪܒܠܗ ܚܕ ܣܗܡܐ ܡܢܝܗܝ ܐܡܢܐ ܥܠܝܡܐ ( ܝܘܣܦ ܣܡܝܪ) ܘܚܕܟܡܐ ܐ̄ܚܪܢܐ ܒܝܕ ܥܠܝܡܐ “ܢܘܐܪ ܓ̰ܡܝܠ” ، ܕܦܝܫ ܚܬܝܡܐ ܥܕܥܐܕܐ ܒܦܠܓܼ̄ܝܬܐ ܕܕܫܢ̈ܐ ܕܡܝܩܪܢܘܬܐ ܥܠ ܡܫܘܬܦܢ̈ܐ ܒܓܘܝܗ ܘܥܡ ܣܝܥܬܐ ܕܛܘܝܒܐ ܗܝ ܕܡܫܘܬܦܠܗܿ ܒܛܘܝܒܗ ܘܛܟܣܬܗ.
