ܦܝܫܠܗܘܢ ܚܬܝܡܐ ܝܘܡ ܬܪܝܢܒܫܒܐ 1 ܟܢܘܢ ܬܪܝܢܐ 2024، ܥܒܘܕܘ̈ܬܐ ܕܥܕܥܐܕܐ ܕܥܢܟܒܐ ܟܪܝܣܡܣ ܒܕܘܪܬܗ ܬܠܝܬܝܬܐ، ܗܘ ܕܦܝܫܠܗ ܐܡܝܢܝܐ ܡܬܚܐ ܕ(10) ܝܘܡ̈ܐ ܒܥܐܕ̈ܐ ܕܡܘܠܕܐ ܫܒܝܚܐ ܘܪܫܐ ܕܫܢ̄ܬܐ ܡܘܠܕܝܬܐ ܚܕܬܐ ܥܠ ܓܢܢ̈ܐ ܕܩܢܛܪܘܢ ܐܟܕܝܡܝܐ ܟܢܘܫܝܝܐ ܓܘ ܥܢܟܒܐ.
ܘܡܘܩܪܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ، ܚܕ ܡܡܠܐ ܒܚܘܬܡܐ ܕܥܕܥܐܕܐ، ܫܘܪܪܠܗ ܓܘܗ ، (ܥܕܥܐܕܐ ܗܘ ܟܡ ܚܦܩܐܠܗ ܡܕܝܢ̄ܬܐ ܕܥܢܟܒܐ ܝܠܗ ܫܘܪܪܐ ܥܠ ܡܕܝܢܝܘܬܐ ܘܡܪܕܘܬܐ ܕܥܡܢ)، ܘܪܡܙܠܗ ܕ(ܥܕܥܐܕܐ ܚܒܫ ܚܕܐ ܐܓܪܬܐ ܐ̄ܢܫܝܬܐ ܕܚܘܒܐ ܘܫܠܡܐ).
ܘܡܘܝܕܠܥܗ “ܐܘܓܼܢܐ” ܓܘ ܡܡܠܗ ܕܥܢܟܒܐ ܒܕ ܩܝܡܐ ܒܩܝܛܐ ܐܬܝܢܐ ܒܥܒܕܬܐ ܕܢܘܣܟܐ ܬܒܝܠܐ ܡܢ ܗܢ ܥܕܥܐܕܐ ܒܫܡܐ ܕ(ܥܕܥܐܕܐ ܕܥܢܟܒܐ ܬܒܠܝܐ)، ܘܪܡܙܠܗ ܕܥܢܟܒܐ ܚܫܚܝܠܗܿ ܕܦܝܫ ܥܒܝܕܐ ܓܘܗܿ ܡܢܝܢܐ ܡܢ ܥܕܥܐܕ̈ܐ ܫܢ̄ܬܐܝܬ.
ܘܡܛܘܝܡܢܗ “ܐܘܓܼܢܐ” ܒܚܘܬܡܐ ܕܡܡܠܗ، ܥܠ ܓܪܐ ܕܘܙܝܪܐ ܕܡܘܒܠܢܘܬܐ ܘܛܘܦܝ̈ܐ ܓܘ ܫܘܠܛܢܘܬܐ ܕܩܠܝܡܐ ܡܝܩܪܐ “ܐܢܘ ܓ̰ܘܗܪ ܥܒܕܘܟܐ” ، ܒܣܢܕܬܗ ܠܥܕܥܐܕܐ ܘܟܠ ܥܒܘܕܘ̈ܬܐ ܕܦܝܫܝ ܥܒܝܕܐ ܓܘ ܥܢܟܒܐ، ܘܗܘ ܡܘܩܪܒܠܗ ܚܕ ܡܡܠܐ ܡܛܘܝܡܢܗ ܓܘܗ ܠܓܪܐ ܕܟܠܝܗܝ ܓܢ̄ܒܢ̈ܐ ܘܥܒܘܕܘ̈ܬܐ ܘܫܘܬܐܣ̈ܐ ܐܢܝ ܕܡܫܘܬܦܠܗܘܢ ܒܩܝܡܬܐ ܕܗܢ ܥܕܥܐܕܐ ܫܢ̄ܬܢܝܐ.
ܘܡܘܩܪܒܠܗ “ܥܒܕܘܟܐ” ܓܘ ܡܡܠܗ ܩܘܒܠܛܝܒܘܬܐ ܠܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܘܒܩܘܕܡܗܿ ܪܫ ܫܘܠܛܢܘܬܐ ܡܝܩܪܐ “ܡܣܪܘܪ ܒܐܪܙܐܢܝ”، ܘܗܘܦܪܟܐ ܕܐܪܒܝܠ ܘܩܝܡܩܡܐ ܕܥܢܟܒܐ، ܥܡ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܗܘ ܕܛܥܢܗ ܣܗܡܐ ܪܒܐ ܡܢ ܛܘܟܣܐ ܕܥܕܥܐܕܐ.
ܘܚܒܫܠܗ ܙܘܝܚܐ ܕܚܘܬܡܐ ܦܠܓ̄ܝܬܐ ܕܕܘܪ̈ܥܐ ܕܡܝܩܪܢܘܬܐ ܠܓܢ̄ܒܢ̈ܐ ܣܢܕܢ̈ܐ ܘܪ̈ܥܘܝܐ ܕܥܕܥܐܕܐ ( ܩܢܛܪܘܢ ܐܟܕܝܡܝܐ ܟܢܘܫܝܝܐ ܓܘ ܥܢܟܒܐ، ܒܝܬ ܣܡܟܐ ܕܥܠܝܡ̈ܐ ܕܥܢܟܒܐ ܟܢܘܫܝܝܐ، ܪܕܝܘ ܥܢܟܒܐ، ܫܘܬܦܘܬܐ ܕ MG ܕܪ̈ܕܝܬܐ، ܒܝܬ ܐܣܝܘܬܐ ܕܘܝܣܬ ܐܝ، ܟܘܪܕܣܬܢ ܦܿܝܒ، ܐܝܦܿܝܕܝܢܬ ܓܪܘܦ، ܫܘܬܦܘܬܐ ܕܐܪܒܝܠ ܦܿܠܝ، ܐܘܢܐ ܕܟܠܟܣܝ، ܦܢܕܩܐ ܕܗܝܣܟܘܣ)، ܥܡ ܗܕܡ̈ܐ ܕܣܝܥܬܐ ܕܛܘܟܣܐ ܕܥܕܥܐܕܐ.
ܘܚܒܫܠܗ ܝܘܡܐ ܐ̄ܚܪܝܐ ܡܢ ܥܕܥܐܕܐ، ܢܘܩܙ̈ܐ ܐܡܢܝ̈ܐ، ܡܘܣܝܩܝ̈ܐ، ܙܡܝܪ̈ܝܐ، ܥܡ ܪ̈ܩܕܐ ܝܪ̈ܬܘܬܢܝܐ ܡܘܒܣܡܠܗܘܢ ܠܒܐ ܕܟܢܫܐ، ܗܘ ܕܠܐ ܟܠܐܠܗ ܫܒܘܩ ܡܢ ܐܐܪ̈ܐ ܩܪܝܪ̈ܐ ܒܡܫܘܬܦܬܐ ܒܥܒܘܕܘ̈ܬܐ ܕܥܕܥܐܕܐ ܗܠ ܫܥ̈ܐ ܡܬܘܚܪ̈ܐ ܡܢ ܦܠܓܐ ܕܠܠܝܐ.
ܘܡܘܩܪܒܠܗܘܢ ܬܪܝ ܐܡܢ̈ܐ “ܓ̰ܘܪܓ̰ ܡܢܨܘܪ” ܐܬܝܢܐ ܡܢ ܟܢܕܐ ܘ ” ܙܐܢܐ ܡܓ̰ܝܕ” ܒܝܘܡܐ ܐ̄ܚܪܝܐ ܡܢ ܥܕܥܐܕܐ ܡܢܝܢܐ ܡܢ ܙܡܝܪ̈ܬܐ ، ܕܚܬܡ ܐܡܢܐ ܩܘܪܕܝܐ ” ܐܠܢܕ ܚܐܙܡ” ܙܘܝܚܐ ܒܡܢܝܢܐ ܡܢ ܙܡܝܪ̈ܬܐ ܣܘܪ̈ܝܝܐ ܘܩܘܪ̈ܕܝܐ، ܕܡܘܒܣܡܠܗܘܢ ܠܒܐ ܕܟܢܫܐ ܕܥܠܝܡ̈ܐ ܡܛܝܒ̈ܐ.
ܘܦܝܫ ܕܟܝܪܐ، ܕܥܕܥܐܕܐ ܕܥܢܟܒܐ ܟܪܝܣܡܣ ܒܕܘܪܬܗ ܬܠܝܬܝܬܐ، ܗܘ ܕܫܘܪܐܠܗܘܢ ܥܒܘܕܘ̈ܬܗ ܒܣܝܩܘܡ 22 ܟܢܘܢ ܩܕܡܝܐ ܥܒܝܪܐ ܒܛܘܝܒܐ ܪܘܫܡܝܐ ܡܢ ܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܕܦܝܫܠܗ ܥܒܝܕܐ ܒܪܥܝܘܬ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ݁̈ܐ ܣܘܪ̈ܝܝܐ ܘܩܝܡܩܡܘܬܐ ܕܪܘܣܬܩܐ ܕܥܢܟܒܐ. ܒܫܘܬܦܬܐ ܕܡܢܝܢܐ ܡܢ ܡܛܟܣܝ̈ܬܐ ܕܟܢܘܫܝܐ ܡܕܝܢܝܐ ܥܠܝܡܝ̈ܐ ܘܟܢܘܫܝܝ̈ܐ ܓܘ ܥܢܟܒܐ.
