ܦܝܫܠܗܘܢ ܥܒܝܕܐ ܓܘ ܕܪܬܐ ܕܒܝܬ ܣܡܟܐ ܕܐܟܐܕ ܥܢܟܒܐ ܐܬܠܝܛܝܐ ܒܪܘܣܬܩܐ ܕܥܢܟܒܐ، ܒܪܡܫܐ ܕܝܘܡ ܚܕܒܫܒܐ 3 ܐܒ 2025، ܘܒܛܘܝܒܐ ܕܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܚܘܪ̈ܩܢܐ ܕܣܩܒܠܬܐ ܕܒܪܬܐ ܕܥܢܟܒܐ (ܐܝܦܐ ܨܠܝܒܐ ܒܝܬܘܢ)، ܘܒܪ ܙܘܓܗܿ (ܓ̰ܘܪܓ̰ ܣܦܐܬܪ) ܐܬܝܢ̈ܐ ܡܢ ܐܠܡܢܝܐ ܒܚܕ ܚܙܘܩܝܐ ܐܪܝܟܐ ܘܥܠ ܕܪܓܼܬܐ.
ܘܦܝܫܠܗܘܢ ܥܒܝܕܐ ܐܢܝ ܚܘܪ̈ܩܢܐ ܕܣܩܒܠܬܐ ܠܬܪܝܢ ܙܘܓ̈ܐ ܓܘ ܥܢܟܒܐ، ܡܝܩܪܢܘܬܐ ܠܝܗܝ ܥܠ ܥܡܠ̈ܐ ܝܚܝܕ̈ܐ ܘܦܪ̈ܝܫܐ ܐܢܝ ܕܡܘܓܪܫܠܗܘܢ ܡܬܚܐ ܕܙܘܕܐ ܡܢ ܚܕ ܝܪܚܐ ܒܚܙܘܩܝܐ ܡܢ ܐܠܡܢܝܐ ܠܥܝܪܩ، ܒܚܕܐ ܫܪܝܬܐ ܦܪܨܘܦܝܬܐ ܡܥܒܪܐ ܥܠ ܒܝܬܝܘܬܐ ܘܪܘܚܐ ܕܣܩܘܒܠܝܘܬܐ، ܘܐ̄ܣܝܪܘܬܐ ܥܡܘܩܬܐ ܒܡܕܝܢ̄ܬܐ ܘܘܪ̈ܝܕܐ.
ܘܫܘܬܦܠܗܿ ܓܘ ܣܩܒܠܬܐ ܡܫܕܪܘܬܐ ܡܢ ܟܕܝܪ̈ܐ ܘܫܕܬܢ̈ܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܐ̄ܚܪܝܬܐ ܡܢ ܒܝܬ ܣܡܟܐ ܕܐܟܐܕ ܥܢܟܒܐ ܐܬܠܝܛܝܐ، ܘܡܘܩܪܒܠܗܘܢ ܣܩܒܠܢ̈ܐ ܡܐܣܪܬܐ ܕܘܪ̈ܕܐ ܘܨܡܕܐ ܠܡܝܩܪܬܐ (ܒܝܬܘܢ) ܡܢ ܦܘܠܚܢ̈ܐ ܕܐܝܕܐ ܗܘ ܕܛܥܢ ܨܘܪܬܐ ܕܥܕܬܐ ܕܡܪܝ ܓܝܘܪܓܝܣ، ܚܕܐ ܡܢ ܥܕ̈ܬܐ ܒܘܫ ܫܪ̈ܫܝܐ ܒܥܢܟܒܐ.
ܘܩܛܥܠܗܘܢ ܬܪܝܢ ܙܘܓ̈ܐ ܒܡܬܚܐ ܕܚܙܘܩܝܝܗܝ ܗܘ ܕܫܘܪܐܠܗ ܡܢ ܐܠܡܢܝܐ ܩܘܪܒܐ ܕ(4500) ܟܡ ܒܡܬܚܐ ܕ(37) ܝܘܡ̈ܐ، ܗܘ ܟܡܥܒܪ ܥܠ ܟܡܝܘܬܐ ܕܨܒܝܢܐ ܘܚܘܒܐ ܕܐܢ̄ܬܬܐ ܥܢܟܒܝܬܐ ܒܟܠܝܬܐ ܕܪܩܘܒܠ ܥܣܩܘ̈ܬܐ ܘܡܩܒܠܢܘܬܐ ܕܚܝܘܬܐ.
ܘܦܝܫ ܕܟܝܪܐ، ܕܚܙܘܩܝܐ ܕܬܪܝܢ ܙܘܓ̈ܐ ܚܒܫܠܗ ܥܒܪܬܐ ܒ(10) ܐܬܪ̈ܘܬܐ ܐܘܪ̈ܘܦܝܐ ܘܐܣܝܘܝ̈ܐ، ܡܢ ܡܥܪܒܐ ܕܐܘܪܘܦܐ ܠܡܕܢܚܐ ܡܨܥܝܐ ܘܫܪܝܬܐ ܡܢ ܐܠܡܢܝܐ، ܒܬܪ ܗܕܟ ܬܫܝܟ ܘܢܡܣܐ ܘܡܓ̰ܪ، ܘܥܒܪܬܐ ܒܪܘܡܢܝܐ ܘܨܪܒܝܐ ܘܒܠܓܼܪܝܐ ܘܝܘܢܢ ܘܬܘܪܟܝܐ، ܘܒܚܪܬܐ ܥܒܪܬܐ ܠܥܝܪܩ ܒܐܘܪܚܐ ܕܐܒܪܐܗܝܡ ܚܠܝܠ ܒܗܘܦܪܟܝܐ ܕܕܗܘܟ ܒܩܠܡܐ ܕܟܘܪܕܣܬܢ ܕܥܝܪܩ.
