ܫܘܬܦܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܝܘܡ ܥܪܘܒܬܐ 12 ܐܝܠܘܠ 2025، ܒܦܘܬܚܐ ܕܒܝܬ ܓܠܚܐ ܕܡܐܟܼܘܠܝ̈ܬܐ ܥܡܡܝ̈ܐ ܘܦܘܠܚܢ̈ܐ ܕܐܝܕܐ، ܗܘ ܕܟܡ ܛܟܣܐܠܗ ܡܛܟܣܬܐ ܕܫܩܠܒܐܕ ܕܡܪܒܝܬܐ ܕܥܠܝܡ̈ܐ ܒܥܘܕܪܢ ܥܡ ܒܝܬ ܣܡܟܐ ܕܠܝܐܠܝ ܣܦ̮ܿܝܢ ܒܝܬܝܐ ܒܪܘܣܬܩܐ ܕܫܩܠܒܐ، ܡܢ ܥܒܘܕܘ̈ܬܐ ܕܥܕܥܐܕܐ ܕܥܐܕܐ ܕܨܠܝܒܐ، ܗܘ ܕܩܝܡܐ ܓܘܗ ܥܕܬܐ ܕܫܩܠܒܐ.
ܘܫܘܪܪܠܗ (ܐܘܓܼܢܐ) ܒܣܘܘܕܗ ܚܕܪ ܒܝܬ ܓܠܚܐ : (ܗ̄ܘܐܗ̄ܘܐ ܚܕ ܠܘܚܐ ܚܝܐ ܡܓܘܫܡܢܗ ܠܥܘܡܩܐ ܕܝܪܬܘܬܐ ܥܡܡܝܬܐ ܘܡܒܥܢܘܬܐ ܕܥܠܝܡܝ̈ܢ ܘܢܫܝ̈ܢ)، ܘܪܡܙܠܗ : (ܐܐܪ̈ܐ ܦܝܫܠܗܘܢ ܡܣܘܩܠ̈ܐ ܒܟܗ̈ܬܐ ܫܪ̈ܫܝܐ ܘܐܘܡܢ̈ܘܬܐ ܕܐܝܕܐ ܐܢܝ ܕܡܘܚܙܐܠܗܘܢ ܪܘܚܐ ܕܒܝܬܝܘܬܐ ܘܗܝܝܘܬܐ).
ܘܦܝܫܠܗ ܚܙܝܐ ܒܒܝܬ ܓܠܚܐ ܫܘܬܦܬܐ ܡܢ ܡܛܝܒ̈ܐ ܚܕܪ ܡܐܟܼܘܠܝ̈ܬܐ ܘܐܘܡܢ̈ܘܬܐ ܝܪ̈ܬܘܬܢܝܐ، ܐܢܝ ܕܡܘܚܙܠܗܘܢ ܚܕ ܛܒܥܐ ܝܪܬܘܬܢܝܐ ܘܦܠܟܠܘܪܝܐ ܒܦܘܪܣܐ، ܟܕ ܦܪܫܠܗ ܒܡܩܪܒܬܐ ܕܨܚܢ̈ܐ ܥܡܡܝ̈ܐ ܘܝܪ̈ܬܘܬܢܝܐ ܡܫܚܠܦ̈ܐ، ܐܢܝ ܕܡܘܚܙܠܗܘܢ ܥܬܝܪܘܬܐ ܕܒܝܬ ܒܘܫܠܐ ܕܘܟܬܢܝܐ ܘܫܪܫܝܘܬܗ، ܥܡ ܓܠܚܬܐ ܕܬܦܪ̈ܝܬܐ ܘܦܘܠܚܢ̈ܐ ܕܐܝܕܐ، ܐܢܝ ܕܓܠܐܠܗܘܢ ܝܕܝܥܬܐ ܘܡܒܥܢܘܬܐ ܕܥܠܝܡ̈ܐ ܘܢܫ̈ܐ ܒܢܛܪܬܐ ܕܝܪܬܘܬܐ ܥܡܡܝܬܐ ܘܚܕܬܬܗܿ ܒܪܘܚܐ ܕܪܝܐ.
ܘܐܢܝ ܟܫܝܪ̈ܘܬܐ ܡܡܬܠܝ ܚܕ ܓܫܪܐ ܠܐܣܪܬܐ ܕܝܘܒܠ̈ܐ ܒܫܪ̈ܫܝܗܝ، ܘܣܢܕܬܐ ܕܡܨܝܢܘ̈ܬܐ ܥܠܝܡܘܬܢܝ̈ܐ ܕܗܘܝ ܫܘܬܦ̈ܐ ܥܒܼܘܕ̈ܐ ܒܢܛܪܬܐ ܕܗܝܝܘܬܐ ܘܚܝܠܢܬܐ ܕܝܘܪܬܢܐ ܡܪܕܘܬܢܝܐ.
ܘܦܝܫ ܕܟܝܪܐ، ܕܒܝܬ ܓܠܚ̈ܐ ܕܡܐܟܼܘܠܝ̈ܬܐ ܥܡܡܝ̈ܐ ܘܦܘܠܚܢ̈ܐ ܕܐܝܕܐ، ܝܠܗ ܒܪܥܝܘܬܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ، ܘܒܪܥܝܘܬܐ ܘܒܘܪܟܬܐ ܕܥܕܬܐ ܟܠܕܝܬܐ ܒܫܩܠܒܐ.
