ܣܘܩܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ ” ܟܠܕܘ ܪܡܙܝ ܐܘܓܼܢܐ”، ܝܘܡ ܐܪܒܥܒܫܒܐ 14 ܫܒܛ 2024، ܓܘ ܒܢܝܢܐ ܕܡܕܒܪܢܘܬܐ ܒܪܘܣܬܩܐ ܕܥܢܟܒܐ، ܟܬܘܒܐ ܘܡܬܢܝܢܐ ܥܝܪܩܝܐ “ܐܚܡܕ ܣܥܕܐܘܝ” ܘܣܦܪܐ ܣܘܪܝܝܐ “ܢܝܢܒ ܠܡܐܣܘ” ܠܕܘܪܫܐ ܕܬܪܡܝܬܐ ܕܬܘܪܓܡܐ ܕܬܘܢܝܬܐ ܕ(ܦܪܐܢܟܫܬܝܢ ܓܘ ܒܓܕܕ) ܠܠܫܢܐ ܣܘܪܝܝܐ.
ܘܦܝܫܠܗ ܡܣܘܙܓܪܐ ܓܘ ܬܦܩܬܐ ܠܬܘܪܓܡܐ ܕܬܘܢܝܬܐ ܕ(ܦܪܐܢܟܫܬܝܢ ܓܘ ܒܓܕܕ)، ܗܝ ܫܩܝܠܬܐ ܕܫܢܐ ܕܒܘܟܪ، ܠܠܫܢܐ ܣܘܪܝܝܐ ܒܣܢܕܬܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܒܦܘܠܚܢ̈ܐ ܕܣܦܪܐ “ܢܝܢܒ ܠܐܡܣܘ”، ܗܘ ܒܕ ܗܘܐ ܚܝܘܪܐ ܠܛܘܝܒܐ ܕܢܘܣܟܐ ܣܘܪܝܝܐ ܡܢ ܬܘܢܝܬܐ.
ܘܦܝܫ ܡܚܘܫܒܢܐ ܗܢ ܦܘܠܚܢܐ ܚܕܐ ܝܬܝܪܘܬܐ ܚܕܬܐ ܘܦܪܝܫܬܐ ܠܦܘܠܚܢ̈ܐ ܘܟܫܝܪ̈ܘܬܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܗܝ ܕܡܛܐܠܗ ܒܪܬ ܩܠܐ ܕܦܘܠܚܢ̈ܗܿ ܠܡܨܥܐ ܕܐܪܫܟܝܬܐ ܒܓܕܕ، ܘܒܬܪ ܬܡܡܬܐ ܕܬܪܡܝܬܐ ܒܕ ܡܙܝܕ ܠܒܝܬ ܐܪ̈ܟܐ ܣܘܪܝܝܐ ܒܬܘܢܝܬܐ ܛܝܡܢܬܐ ܒܠܫܢܐ ܣܘܪܝܝܐ، ܘܦܪܝܫܐܝܬ ܕܚܒܫܝ ܓܕܫ̈ܗܿ ܡܠܘ̈ܐܐ ܐܢܢܩܝ̈ܐ ܠܟܢܘܫܝܐ ܥܝܪܩܝܐ ܒܡܟܝܢ̈ܬܗ ܘܡܪ̈ܕܘܬܗ ܡܫܚܠܦ̈ܐ.
ܘܦܝܫ ܕܟܝܪܐ، ܕ(ܦܪܐܢܟܫܬܝܢ ܓܘ ܒܓܕܕ)، ܝܠܗ ܬܘܢܝܬܐ ܕܟܬܘܒܐ ܥܝܪܩܝܐ “ܐܚܡܕ ܣܥܕܐܘܝ” ܢܦܩܠܗܿ ܓܘ ܐܕܪ 2013 ܡܢ ܦܪ̈ܝܣܬܐ ܕܐܠܓ̰ܡܠ ܓܘ ܒܝܪܘܬ، ܘܢܦܩܠܗ ܡܢܗܿ 28000 ܢܘܣܟ̈ܐ ܥܠ 14 ܛܒܥܝ̈ܬܐ، ܘܩܪܡܠܗ ܒܕܫܢܐ ܕܬܘܢܝܬܐ ܥܪܒܝܬܐ ܕܫܢ̄ܬܐ ܕ 2014 ، ܘܕܫܢܐ GPI ܦܪܢܣܝܐ ܕܫܢ̄ܬܐ 2017 ܡܢ ܣܗܡܐ ܕܬܘܢܝ̈ܬܐ ܡܬܘܪܓܡܐ ܠܠܫܢܐ ܦܪܢܣܝܐ.
