ܣܘܩܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܘܡܕܒܪܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܡܝܩܪܐ (ܒܪܢܐܪܕ ܝܘܣܦ)، ܝܘܡ ܬܠܬܒܫܒܐ 5 ܬܫܪܝܢ ܬܪܝܢܐ 2024، ܒܒܢܝܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܪܘܣܬܩܐ ܕܥܢܟܒܐ، ܩܝܘܡܐ ܕܨܒܘ̈ܬܐ ܓܘܢܝ̈ܐ ܒܐܝܙܓܕܘܬܐ ܐܡܪܝܟܝܬܐ ܒܒܓܕܕ، (ܐܕܡ ܣܝܓܼܠܡܐܢ).
ܘܟܪܟܠܗ (ܣܝܓܼܠܡܐܢ) ܒܡܢܘ̈ܬܐ ܕܒܝܬ ܥܬܝܩ̈ܬܐ ܘܚܙܐܠܗ ܩܢܝܢ̈ܗ ܘܡܘܠܟܢ̈ܗ ܥܬܩܝ̈ܐ، ܘܡܘܚܙܐܠܗ ܕܡܝܪܘܬܗ ܒܡܬܩܕܡܢܘܬܐ ܒܪܝܬܐ ܒܬܪ̈ܡܝܬܐ ܐܢܝ ܕܩܝܡ ܓܘܝܗܝ ܒܝܬ ܥܬܝܩ̈ܬܐ ܒܥܘܕܪܢ ܥܡ ܘܟܝܠܘܬܐ ܐܡܪܝܟܝܬܐ ܕܫܘܘܚܐ ܬܒܝܠܝܐ (USAID)، ܘܦܪܝܫܐܝܬ ܒܬܪܡܝܬܐ ܕ(ܢܛܪܬܐ ܕܝܪܬܘܬܐ ܡܪܕܘܬܢܝܬܐ ܕܒܨܘܪ̈ܘܬܐ ܒܥܝܪܩ) ܒܐܘܪܚܐ ܕܐܪܫܦܬܐ ܕܝܪܬܘܬܐ ܣܘܪܝܝܬܐ ܘܫܒܩܬܗ ܒܐܝܕܐ ܕܒܨܘܝ̈ܐ.
ܘܒܚܘܬܡܐ ܕܣܥܘܪܘܬܐ، ܦܝܫܠܗ ܡܛܝܒܐ (ܣܝܓܼܠܡܐܢ) ܠܚܕ ܣܗܡܐ ܡܢ ܒܝܬ ܦܘܠܚܢܐ ܕܟܡ ܛܟܣܐܠܗ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܒܥܘܕܪܢ ܥܡ ܚܘܕܪܐ ܕܩܨܪܐ ܕܠܘܡܕ̈ܐ ܒܘܙܝܪܘܬ ܡܪܕܘܬܐ ܘܕܝܪܘܬܐ ܘܥܬܩ̈ܐ ܥܝܪܩܝܬܐ، ܒܐܘܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܪܘܣܬܩܐ ܕܥܢܟܒܐ، ܒܢܝܫܐ ܕܕܘܪܫܐ ܕܫܒܝܠ̈ܐ ܚܫܝܚ̈ܐ ܠܚܡܝܬܐ ܕܡܟܝܢ̈ܬܐ ܥܝܪ̈ܩܝܐ ܡܢ ܡܡܠ̈ܐ ܕܣܢܝܘܬܐ.
