ܩܝܡܠܗ ܒܣܥܘܪܘܬܐ ܩܢܨܠܐ ܐܡܪܝܟܝܐ ܓܘܢܝܐ ܒܐܪܒܝܠ ” ܐܝܪܦܢ ܗܝܟܣ” ܠܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܥܢܟܒܐ ܝܘܡܐ ܕܚܡܫܒܫܒܐ 13 ܬܡܘܙ 2023، ܘܝܗ̄ܘܐ ܒܣܩܒܠܬܗ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ، ܘܡܝܩܪܐ ” ܒܪܢܐܪܕ ܝܘܣܦ” ܡܕܒܪܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ.
ܘܟܪܟܠܗ ܐܪܚܐ ܓܘ ܡܢܘ̈ܬܐ ܕܒܝܬ ܥܬܝܩ̈ܬܐ ܘܚܙܠܗ ܩܢܝܢ̈ܗ. ܘܡܘܚܘܐܠܗ ܕܡܝܪܘܬܗ ܒܓܠܚ̈ܐ ܘܦܪܝܫܐܝܬ ܦܪܣܬܐ ܓܘܕܢܝܬܐ ܬܫܥܝܬܢܝܬܐ ܗܝ ܕܦܝܫܠܗܿ ܥܒܝܕܬܐ ܡܢ ܬܪܡܝܬܐ ܕܢܛܪܬܐ ܥܠ ܝܪܬܘܬܐ ܡܪܕܘܬܢܝܬܐ ܕܒܨܘܪ̈ܘܬܐ ܓܘ ܥܝܪܩ ܒܣܢܕܬܐ ܒܝܕ ܘܟܝܠܘܬܐ ܐܡܪܝܟܝܬܐ ܕܫܘܘܚܐ (ܡܪܒܝܬܐ) ܬܒܠܝܐ “USAID” ܘܐܘܝܘܬܐ ܕܥܬܩ̈ܐ.
ܘܡܘܥܒܪܗ ܩܢܨܠܐ ܓܘܢܝܐ ܥܠ ܝܨܝܦܘܬܗ ܘܐܝܩܪܗ ܠܓܪܐ ܗܘ ܕܩܝܡ ܓܘܗ ܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܥܢܟܒܐ ܒܣܓܼܠܢܬܗ ܡܡܠܐ ܟܪܝܐ ܓܘ ܣܓܼܠ̈ܐ ܕܣܥܘܪ̈ܘܬܐ.
ܘܫܘܪܐܠܗ ܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܓܘ ܐܝܪ ܥܒܝܪܐ، ܡܢ ܬܪܡܝܬܐ ܝܬܗܿ، ܫܘܦܗ ܐܠܟܬܪܘܢܝܐ ܐܫܛܪܝܐ ܒܐܪܒܥܐ ܠܫܢ̈ܐ ( ܣܘܪܝܝܐ، ܩܘܪܕܝܐ، ܥܪܒܝܐ ܘܐܢܓܠܝܙܝܐ) ، ܒܛܘܝܒܐ ܕܥܕܘܪܬܐ ܕܩܢܨܠܐ ܐܡܪܝܟܝܐ ܓܘ ܐܪܒܝܠ “ܙܗܪܐ ܒܝܠ” ܗܘ ܕܝܗ̄ܒܠ ܦܘܪܣܐ ܠܩܢܝܬܐ ܕܡܘܕܥܢܘ̈ܬܐ ܪ̈ܒܐ ܘܕܩܝܩ̈ܐ ܚܕܪ ܒܝܬ ܥܬܝܩ̈ܬܐ ܘܐܝܬܘ̈ܬܗ ܘܟܠ ܡܢܕܝ ܕܐܝܬܠܗ ܐܣܘܪܐ ܒܝܪܬܘܬܐ ܣܘܪܝܝܬܐ.
