ܫܘܪܐܠܗܘܢ ܓܘ ܪܘܣܬܩܐ ܕܥܢܟܒܐ ، ܝܘܡ ܥܪܘܒܬܐ 22 ܟܢܘܢ ܩܕܡܝܐ 2023، ܥܒܘܕܘ̈ܬܐ ܕܥܕܥܐܕܐ ܕܥܢܟܒܐ ܟܪܝܣܡܣ ܒܕܘܪܬܗ ܬܠܝܬܝܬܐ، ܒܛܘܝܒܐ ܪܘܫܡܝܐ ܒܝܕ ܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܘܟܢܫܐ ܪܒܐ ܥܠ ܓܢܢ̈ܐ ܕܩܢܛܪܘܢ ܐܟܕܝܡܝܐ ܟܢܘܫܝܝܐ ܓܘ ܥܢܟܒܐ.
ܘܦܝܫܠܗܿ ܡܛܝܒܬܐ ܠܙܘܝܚܐ ܕܦܘܬܚܐ ܡܫܕܪܘܬܐ ܪܘܫܡܝܬܐ ܪܒܬܐ ܡܢ ܫܘܠܛܢܘܬܐ ܕܩܠܝܡܐ ܚܒܫܠܗܿ ܘܙܝܪ ܓܘܝ̈ܬܐ “ܪܝܒܪ ܐܚܡܕ”، ܘܙܝܪ ܡܘܒܠܢܘܬܐ ܘܛܘܦܝ̈ܐ “ܐܢܘ ܓ̰ܘܗܪ ܥܒܕܘܟܐ” ، ܗܘܦܪܟܐ ܕܐܪܒܝܠ ” ܐܘܡܝܕ ܚܘܫܢܘ”، ܪܫܐ ܕܚܘܕܪܐ ܕܐܣܘܪ̈ܐ ܒܪ̈ܝܐ “ܣܦܝܢ ܕܙܝܝܼ”، ܪܫܐ ܕܚܘܕܪܐ ܕܝܘܕܥܐ ܘܡܘܕܥܢ̈ܘܬܐ ܕ.”ܓ̰ܘܬܝܐܪ ܥܐܕܠ”، ܡܠܠܐ ܒܫܡܐ ܕܫܘܠܛܢܘܬܐ ܕܩܠܝܡܐ “ܦܝܫܘܐ ܗܘܪܐܡܝ” .
ܘܫܘܪܐܠܗܘܢ ܥܒܘܕܘ̈ܬܐ ܕܙܘܝܚܐ ܒܚܕ ܠܘܚܐ ܓܘܠܚܝܐ ܦܝܫܠܗ ܡܘܩܪܒܐ ܒܝܕ ܝܗܠܐ ܣܘܪܝܝܐ ܕܐܡܢ̈ܐ ܢܩܝܦܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܒܬܪ ܗܕܟ ܦܝܫܠܗ ܡܘܩܪܒܐ ܡܡܠܐ ܕܡܕܒܪܢܘܬܐ ܒܝܕ ܡܕܒܪܢܗܿ ܓܘܢܝܐ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ܫܘܪܪܠܗ ܓܘܗ (ܥܢܟܒܐ ܦܝܫܠܗܿ ܗܘ ܫܘܦܐ ܕܟܦܫ ܫܒܘܩ ܡܢ ܡܫܝܚܝ̈ܐ ܕܩܠܝܡܐ ܕܟܘܪܕܣܬܢ ܘܥܝܪܩ ܘܐܦ ܡܢ ܐܬܪ̈ܘܬܐ ܐ̄ܚܪ̈ܢܐ)، ܘܪܡܙܠܗ (ܘܠܝܬܢ ܐܕܝܘܡ ܝܠܗܿ ܦܪܣܬܐ ܕܐܓܪܬܐ ܗܝ ܕܟܡ ܡܠܦܠܢܝܠܗܿ ܡܪܢ ܝܫܘܥ ܡܫܝܚܐ، ܐܓܪܬܐ ܕܫܠܡܐ ܘܚܘܒܐ، ܘܐܚܢܝ ܝܗ̄ܘܚ ܥܡܐ ܚܝܐ ܫܒܘܩ ܡܢ ܐܝܟܢܘ̈ܬܐ ܥܣܩ̈ܐ ܕܒܚܙܝܐܝܗ̄ܘܚ).
ܘܡܘܒܝܢܗ “ܐܘܓܼܢܐ” ، (ܥܕܥܐܕܐ ܕܗܕ ܫܢ̄ܬܐ ܦܪܝܫܐܝܠܗ ܒܩܝܡܬܗ ܒܡܦܪܝܬܐ ܕܦܘܪ̈ܣܐ ܕܦܘܠܚܢܐ ܠܥܠܝܡ̈ܐ ܒܡܩܪܒܬܐ ܕܫܘܦ̈ܐ ܡܓܢ ܠܣܢܕܬܐ ܕܦܘܠܚܢ̈ܝܗܝ، ܥܡ ܐܝܬܘܬܐ ܕܙܘܕܐ ܡܢ (28) ܫܘܦ̈ܐ ܠܦܘܠܚܢ̈ܐ ܕܐܝܕܐ ܕܥܠܝܡ̈ܐ) ، ܘܡܘܒܝܢܗ ܕܝܠܗ ܗܘ ܢܝܫܐ ܒܫ ܪܒܐ ܕܥܕܥܐܕܐ.
ܘܛܘܝܡܢܗ “ܐܘܓܼܢܐ” ܒܚܘܬܡܐ ܕܡܡܠܗ ܠܓܪܐ ܕܓܢ̄ܒܢ̈ܐ ܡܫܘܬܦ̈ܐ ܘܪ̈ܥܘܬܢܝܐ ܕܥܕܥܐܕܐ (ܩܝܡܩܡܘܬܐ ܕܪܘܣܬܩܐ ܕܥܢܟܒܐ، ܩܢܛܪܘܢ ܐܟܕܝܡܝܐ ܟܢܘܫܝܝܐ ܓܘ ܥܢܟܒܐ، ܒܝܬ ܣܡܟܒܐ ܕܥܠܝܡ̈ܐ ܕܥܢܟܒܐ ܟܢܘܫܝܝܐ ، ܒܝܬ ܐܣܝܘܬܐ (ܡܫܦܐ) ܕܘܝܣܬ ܐܝ، ܫܘܬܦܘܬܐ ܕܐܪܒܝܠ ܦܠܝ ܘܫܘܬܦܘܬܐ ܕ(MG) ܕܪ̈ܕܝܬܐ )، ܘܪܡܙܠܗ ܕܥܕܥܐܕܐ ܕܥܢܟܒܐ ܟܪܝܣܡܣ ܝܠܗ ܚܕ ܡܢ ܥܕܥܐܕ̈ܐ ܒܫ ܪ̈ܒܐ ܘܓܢ̄ܒܪ̈ܐ ܕܦܝܫܝ ܥܒܝܕܐ ܓܘ ܩܠܝܡܐ ܕܟܘܪܕܣܬܢ.
ܒܬܪ ܗܕܟ ܡܘܩܪܒܠܗ ܘܙܝܪ ܡܘܒܠܢܘ̈ܬܐ ܘܛܘܦܝ̈ܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܡܝܩܪܐ “ܐܢܘ ܓ̰ܘܗܪ ܥܒܕܘܟܐ” ܡܡܠܗ ܗܘ ܕܩܘܠܣܠܗ ܓܘܗ ܥܠ ܦܘܠܚ̈ܐ ܓܘ ܛܘܟܣܐ ܕܥܕܥܐܕܐ، ܒܬܪ ܗܕܟ ܦܝܫܠܗܘܢ ܡܘܩܪܒܐ ܣܘܓܼܝ̈ܬܐ ܬܘܕܝܬܢܝ̈ܐ ܒܝܕ ܝܗܠܐ ܐܟܕܝܡܝܝܐ ܕܐܘܪܢܝܢܐ، ܒܬܪ ܗܕܟ ܪ̈ܩܕܐ ܝܪ̈ܬܘܬܢܝܐ ܡܫܘܬܦܠܗܘܢ ܓܘܝܗܝ ܗܕܡ̈ܐ ܕܝܗܠܐ ܣܘܪܝܝܐ ܕܐܡܢ̈ܐ.
ܘܦܝܫܠܗ ܐܡܝܢܝܐ ܝܘܡܐ ܩܕܡܝܐ ܕܥܕܥܐܕܐ ܒܡܩܪܒܬܐ ܕܥܒܘܕܘ̈ܬܗ ܡܢ ܢܘܩܙ̈ܐ ܐܡܢܝ̈ܐ، ܡܘܣܝܩܝ̈ܐ، ܙܡܝܪ̈ܝܐ ܘܐ̄ܚܪ̈ܢܐ ܝܪ̈ܬܘܬܢܝܐ ܘܗܠ ܦܠܓܐ ܕܠܝܠܐ .
ܘܦܝܫ ܕܟܝܪܐ، ܕܥܕܥܐܕܐ ܕܥܢܟܒܐ ܟܪܝܣܡܣ ܒܕܘܪܬܗ ܬܠܝܬܝܬܐ، ܗܘ ܕܦܝܫ ܥܒܝܕܐ ܒܪܥܝܘܬ ܩܝܡܩܡܘܬܐ ܕܪܘܣܬܩܐ ܕܥܢܟܒܐ ܘܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ݁̈ܐ ܣܘܪ̈ܝܝܐ ܒܫܘܬܦܬܐ ܕܡܢܝܢܐ ܡܢ ܡܛܟܣܝ̈ܬܐ ܕܟܢܘܫܝܐ ܡܕܝܢܝܐ ܥܠܝܡܝ̈ܐ ܘܟܢܘܫܝܝ̈ܐ، ܒܕ ܡܓܪܫ (10) ܝܘܡ̈ܐ ܡܬܚܐ ܕܥܐܕ̈ܐ ܕܡܘܠܕܐ ܡܫܘܒܚܐ ܘܪܫܐ ܕܫܢ̄ܬܐ ܡܘܠܕܝܬܐ ܚܕܬܐ ܥܠ ܓܢܢ̈ܐ ܕܩܢܛܪܘܢ ܐܟܕܝܡܝܐ ܟܢܘܫܝܝܐ ܓܘ ܥܢܟܒܐ.
