ܩܒܠ ܒܐܪܚܘܬܐ ܒܝܬ ܨܘܒܐ ܕܗܐܪܦܐܪܕ، ܚܕ ܡܢ ܒܬܝ̈ ܨܘܒ̈ܐ ܬܒܝܠܝ̈ܐ ܒܘܫ ܛܒ̈ܐ ܘܫܪ̈ܫܝܐ، ܘܒܚܕ ܓܕܫܐ ܡܪܕܘܬܢܝܐ ܓܠܝܐ، ܝܘܡ ܬܪܝܢܒܫܒܐ ܐܬܝܢܐ، 10 ܐܕܪ 2025، ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܠܡܩܪܒܬܐ ܕܐܡܘܪܘܬܐ ܐܢܢܩܝܬܐ ܥܠ ܢܛܪܬܐ ܕܝܪܬܘܬܐ ܡܪܕܘܬܢܝܬܐ ܕܟܠܕܝ̈ܐ ܣܘܪ̈ܝܝܐ ܐܬܘܪ̈ܝܐ ܓܘ ܥܝܪܩ.
ܘܒܕ ܬܢܐ (ܐܘܓܼܢܐ) ܦܪܝܫܐܝܬ ܥܠ ܥܡܠ̈ܐ ܪ̈ܒܐ ܐܢܝ ܕܡܩܪܒܐܠܗܘܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܢܛܪܬܐ ܕܝܪܬܘܬܐ ܡܪܕܘܬܢܝܬܐ ܕܥܡܢ، ܥܡ ܓܠܚܬܐ ܕܣܩܘܒܠܝ̈ܘܬܐ ܐܢܝ ܕܟܠܝ ܕܪܩܘܒܠ ܗܢ ܝܘܪܬܢܐ ܘܫܒܝܠ̈ܐ ܕܛܘܪܢܬܗ ܒܥܝܪܩ ܘܩܠܝܡܐ ܕܟܘܪܕܣܬܢ.
ܘܟܐܬܝܐ ܗܕ ܫܪܝܬܐ، ܗܝ ܡܛܟܣܐܠܗܿ ܡܢܬܐ ܕܠܫܢ̈ܐ ܘܡܕܝܢܝ̈ܘܬܐ ܕܡܕܢܚܐ ܬܚܬܝܐ ܓܘ ܒܝܬ ܨܘܒܐ ܕܗܐܪܦܐܪܕ، ܒܣܕܝܪܘܬܐ ܥܡ ܨܢܕܘܩܐ ܕܡܝܫܐܠ ܘܠܝܠܐ ܢܐܒܝ ܕܐܡܘܪ̈ܘܬܐ ܐܬܘܪ̈ܝܐ، ܕܡܚܙܝܐ ܝܨܝܦܘܬܐ ܐܟܕܝܡܝܬܐ ܪܒܬܐ ܒܕܪܫܬܐ ܕܝܪܬܘܬܐ ܕܥܡܢ ܘܓܠܝܬܗܿ ܥܠ ܫܘܝܐ ܬܒܝܠܝܐ.
ܘܦܝܫ ܡܚܘܫܒܢܐ ܒܝܬ ܨܘܒܐ ܕܗܐܪܦܐܪܕ، ܗܘ ܕܡܘܦܩܠܗ ܬܡܢܝܐ ܡܢ ܪ̈ܫܢܐ ܕܐܘܚܕܢ̈ܐ ܡܚܝܕ̈ܐ، ܚܕ ܒܐܡܐ ܐܟܕܝܡܝܐ ܬܒܝܠܝܐ ܡܫܘܬܦ ܒܬܪܨܬܐ ܕܪܢܝܐ ܘܦܩܘܕܘܬܐ، ܘܡܢ ܠܒܐ ܕܡܕܝܢ̄ܬܐ ܕ(ܒܘܣܛܢ) ܒܐܘܚܕܢܐ ܕ(ܡܐܣܐܬܫܘܣܬܣ) ܐܡܪܝܟܝܐ، ܘܒܕ ܗܘܐ ܠܗܢ ܓܕܫܐ ܚܕ ܓܪܐ ܪܒܐ ܒܓܠܝܬܐ ܕܡܪܕܘܬܐ ܘܝܪܬܘܬܐ ܣܘܪܝܝܬܐ ܓܘ ܫܛܚܐ ܬܒܝܠܝܐ.
